ໜ່ວຍຮາກຖານຊາວໜຸ່ມຫ້ອງວ່າການແຂວງສາລະວັນ ປະກາດເປັນໜ່ວຍ 4 ບຸກ ຈໍາປີ 2018.

ໃນ​​ຕອນ​ເຊົ້າ ຂອງ​ວັນ​ທີ 21 ພະຈິກ 2018 ທີ​ຜ່ານ​ມາ​ນີ້, ທີ່​ຫ້ອງ​ປະຊຸມ​ຊັ້ນ III ຂອງຫ້ອງ​ວ່າການແຂວງ ສາລະ​ວັນ​ ໜ່ວຍ​ຊາວ​ໜຸ່ມ​ຮາກ​ຖານ​ຫ້ອງ​ວ່າການ​ແຂວງໄດ້ຈັດ​ພິທີປະກາດໜ່ວຍຮາກຖານຊາວໜຸ່ມຫ້ອງວ່າການແຂວງ ​ເປັນ​ໜ່ວຍ 4 ບຸກ ປະຈໍາປີ 2018.

​ໂດຍການເປັນປະທານ ຂອງ ສະຫາຍ ຄົງສະ ໄໝ ວົງພັນ ເລຂາໜ່ວຍຊາວໜຸ່ມຮາກຖານ​ຫ້ອງ​ວ່າການ​ ແຂວງ​ສາລະ​ວັນ​, ​​ໃຫ້​ກຽດ​ເຂົ້າຮ່ວມ​ເປັນ​ຄະນະ​ປະທານ​ໂດຍ ສະຫາຍ ອູທອງ ມູນລາສີ ຮອງເລຂາຄະນະພັກຮາກຖານ, ຮອງຫົວໜ້າຫ້ອງວ່າການແຂວງ. ມີ​ຄະນະ​ໜ່ວຍຊາວໝຸ່ມຮາກ​ຖານອ້ອມຂ້າງໃກ້ຄຽງ, ອົງການຈັດຕັ້ງກໍາມະບານ , ອົງການຈັດຕັ້ງ ສະຫະພັນແມ່ຍິງ ແລະ ສະມາຊິກ​ຊາວໝຸ່ມຫ້ອງວ່າການແຂວງ ເຂົ້າຮ່ວມທັງໝົດ 54  ທ່ານ, ຍິງ 20 ທ່ານ.

​ໃນ​ພິທີ, ກອງປະຊຸມໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 4 ບຸກປະຈຳ​ປີ 2018 ແລະ ທິດທາງແຜນການປີ 2019, ຈາກ​ນັ້ນ, ຜູ້​​ແທນ​ກອງ​ປະຊຸມ​ກໍ​ໄດ້​ປະກອບ​ຄຳ​ເຫັນ​ໃສ່​ຢ່າງ​ເປັນຟົດ​ຟື້ນ ​ແລະ ມີ​ຄວາມຮັບຜິດ​ຊອບ. ​ເຊິ່ງຜົນງານ​ຈາກ​ການ​ປະຕິບັດ​ໃນ 1ປີຜ່ານມາ, ໜ່ວຍ​ຊາວ​ໜຸ່ມ​ຮາກ​ຖານ​ແມ່ນ​ສາມາດ​ປະຕິບັດ​ຄາດໝາຍ​ບັນລຸ 90%, ກາຍ​ເປັນໜ່ວຍ 4 ບຸກສະ​ໄໝ​ທີ1 ​ແລະ ສະມາຊິກ​ຊາວ​ໜຸ່ມ​ໄດ້​ຈັດ​ໃນ​ປະ​ເພດ​ແຂງ 54 ສະຫາຍ, ​ເທົ່າ​ກັບ 98,18 %, ປະ​ເພດ​ກາງ 1 ສະຫາຍ ພ້ອມ​ທັງ​ໄດ້​ຮັບ​ໃບຢັ້ງຢືນ​ຈາກ ຄະນະ​ບໍລິຫານ​ງານ​ຊາວ​ໜຸ່ມ​ແຂວງ​ສາລະ​ວັນ, ທີ່​ໃຫ້​ກຽດ​ມອບ​ໂດຍ: ສະຫາຍ ອູ​ທອງ ມູນ​ລາສີ  ຄະນະ​ພັກ​ຮາກ​ຖານ​, ຫົວໜ້າ​ຫ້ອງ​ວ່າ​ການ​ແຂວງ​ສາລະ​ວັນ.

ໃນຕອນທ້າຍ, ກອງປະຊຸມຍັງໄດ້ຟັງການໂອ້ລົມຈາກ ສະຫາຍ ອູທອງ ມູນລາສີ ຮອງເລຂາ​ຄະນະ​ພັກ​ຮາກ​ຖານ, ຮອງຫົວໜ້າ​ຫ້ອງ​ວ່າການ​ແຂວງ  ເຊິ່ງສະຫາຍກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້, ​ແຕ່​ເພື່ອ​ເຮັດ​​ໃຫ້​ວຽກ​ງານໜ່ວຍຮາກ​ຖານຊາວໜຸ່ມ​ຫ້ອງ​ວ່າການແຂວງ​ມີ​ຂະ​ບວນການ​ກວ້າງຂວາງກວ່າ​ເກົ່າ​ໃນ​ຕໍ່ໜ້າ ຕ້ອງໄດ້ເພີ່ມທະວີວຽກງານການສຶກສາອົບຮົມການເມືອງແນວຄິດ, ລົງ​ເລິກ ​ແລະ ສອດ​ຫ້ອຍ​ກັບ​ວຽກ​ງານ​ວິຊາ​ສະ​ເພາະ​, ຍົກ​ລະດັບ​ດ້ານ​ວິຊາ​ການ ​ແລະ ຄວາມ​ເປັນ​ເຈົ້າການ, ສ້າງ​ເງື່ອນ​ໄຂ​, ສ້າງ​ແຜນ​ງານ, ​ໂຄງການຕິດພັນກັບການ​ສ້າງ​ໜ່ວຍ​ພັກ​ປອດ​ໃສ, ​ເຂັ້ມ​ແຂງ, ໜັກ​ແໜ້ນ​ຂອງ​ພັກ, ​ເດັດຂາດຕ້ານປະກົດການຫຍໍ້ທໍ້ຕ່າງໆ, ກໍາແໜ້ນພາລະບົດບາດ ແລະ ສິດໜ້າທີ່ຂອງຕົນ, ເອົາໃຈໃສ່ສືບຕໍ່ປະຕິບັດເນື້ອໃນຂໍ້ແຂ່ງຂັນ 4 ບຸກຄື: ບຸກດ້ານແນວຄິດ, ບຸກດ້ານຝຶກຝົນຫຼໍ່ຫຼອມຮໍ່າຮຽນ, ບຸກດ້ານວຽກງານການຈັດຕັ້ງ, ບຸກດ້ານວິຊາອາຊີບ-ສ້າງວຽກເຮັດງານທໍາ ໃຫ້ປະກົດຜົນເປັນຈິງ. ນອກ​ນັ້ນ, ຄະນະໜ່ວຍຊາວໝຸ່ມຮາກ​ຖານຫ້ອງວ່າການແຂວງ ຕ້ອງ​ໄດ້​ເປັນ​ແບບຢ່າງ, ຊີ້ນໍາ – ນໍາພາຢ່າງໃກ້ຊິດ ຊຸກຍູ້ຜັກດັນໃຫ້ການຈັດຕັ້ງໜ່ວຍຊາວໜຸ່ມຮາກ​ຖານ​ໄດ້ເຄື່ອນ​ໄຫວຢ່າງເຕັ້ມສ່ວນ ຕາມພາລະບົດບາດ ກໍຄືການຈັດຕັ້ງພັກ – ລັດມອບໝາຍໃຫ້.

ການ​ປະ​ກາດ​ໜ່ວຍ 4 ບຸກຂອງ​ໜ່ວຍ​ຊາວ​ໜຸ່ມ​ຮາກ​ຖານ​ຫ້ອງວ່າການ​ແຂວງ​ໃນ​ຄັ້ງນີ້, ​ໄດ້​ກາຍ​ເປັນອີ​ກ​ໜຶ່ງຂະບວນການ​ໃຫ້​ແກ່​ການ​ກະກຽມ​ກອງ​ປະຊຸມ​ໃຫ່ຍຂອງ​ໜ່ວຍ​ພັກ ​ແລະ ຄະນະ​ພັກ​ຮາກຖານ​ຫ້ອງ​ວ່າການ​ແຂວງ​ ​ແລະ ກອງ​ປະຊຸມ​ໃຫ່ຍຂອງ​ຄະນະ​ບໍລິຫານ​ງານ​ຊາວ​ໜຸ່​ມທີ່​ຈະ​ເປີດ​ຂຶ້ນ​ໃນ​ມໍ່ໆ​ນີ້ນຳ​ອີກ​ດ້ວຍ.