ໜ່ວຍສະຫະພັນແມ່ຍິງຮາກຖານຫ້ອງວ່າການປົກຄອງແຂວງ ສາລະວັນ ໄດ້ຈັດກອງປະຊຸມສະຫຼຸບການແຂ່ງຂັນ ວຽກງານ 3 ດີ ປະຈໍາສົກປີ 2014 – 2015

ຕອນເຊົ້າເວລາ 8:00 ໂມງ ຂອງວັນທີ 2 ຕຸລາ 2015 ຢູ່ທີ່ຫ້ອງປະຊຸມຊັ້ນ III ຂອງຫ້ອງວ່າການປົກຄອງແຂວງ ໄດ້ຈັດກອງປະຊຸມສະຫຼຸບການແຂ່ງຂັນ ວຽກງານ 3 ດີ ຂອງໜ່ວຍສະຫະພັນແມ່ຍິງຮາກຖານຫ້ອງວ່າການປົກຄອງແຂວງ ສາລະວັນ ປະຈໍາສົກປີ 2014 – 2015 ໂດຍພາຍໃຕ້ການເປັນປະທານຮ່ວມຂອງ ທ່ານ ນາງ ບຸນທະວີ ດວງລາສີ ຄະນະປະຈໍາພັກແຂວງ, ຄະນະບໍລິຫານງານສູນກາງສະຫະພັນແມ່ຍິງລາວ, ປະທານຄະນະບໍລິຫານງານສະຫະພັນແມ່ຍິງແຂວງສາລະວັນ, ທ່ານ ນາງ ນີຈັນ ແກ້ວສຸມົນທາ ຄະນະ ພັກຮາກຖານຫ້ອງວ່າການປົກຄອງແຂວງ ແລະ ທ່ານ ນາງ ແສງສຸກ ບຸນພະສີ ປະທານສະຫະພັນແມ່ຍິງຮາກຖານຫ້ອງວ່າການປົກຄອງແຂວງ ເຊິ່ງມີຈຳນວນຄົນເຂົ້າຮ່ວມທັງໜົດ 30 ທ່ານ, ຍິງ 27 ທ່ານ.

ກອງປະຊຸມໄດ້ສະຫຼຸບຂະບວນການແຂ່ງຂັນ 3 ດີ ສົກປີ 2014 – 2015 ແລະ ເປີດຂະບວນການແຂ່ງຂັນ 3 ດີ ສົກປີ 2015 – 2016 ຂອງສະຫະພັນແມ່ຍິງຮາກຖານຫ້ອງວ່າການປົກຄອງແຂວງສາລະວັນ ເຊີ່ງໄດ້ດຳເນີນເຕັມໄປດ້ວຍບັນຍາກາດອັນຟົດພື້ນ ແລະ ມີຄວາມຮັບຜິດຊອບສູງ ຕະຫຼອດໄລຍະ 1 ຄາບຈາກນັ້ນກອງປະຊຸມຍັງໄດ້ເຊື່ອມຊືມມະຕິຜົນສຳເລັດຂອງກອງປະຊຸມໃຫ່ຍສະຫະພັນແມ່ຍິງແຂວງຕື່ມອີກ ຫຼັງຈາກນັ້ນ ທ່ານ ນາງ ບຸນທະວິ ດວງລາສີ ຄະນະປະຈຳພັກແຂວງ, ປະທານຄະນະບໍລິຫານງານສະຫະພັນແມ່ຍິງແຂວງ ກໍໄດ້ໃຫ້ກຽດມອບໃບຍ້ອງຍໍຂອງປະທານສະຫະພັນແມ່ຍິງສູນກາງ ຈຳນວນ 6 ທ່ານ, ໃບຍ້ອງຍໍຂອງສະຫະພັນແມ່ຍິງແຂວງ 5 ທ່ານ, ໃບຊົມເຊີຍຈາກປະທານສະຫະພັນແມ່ຍິງສູນກາງ 2 ທ່ານ ແລະ ໃບຢັ້ງຢືນຂອງຄະນະພັກຮາກຖານຫ້ອງວ່າການປົກຄອງແຂວງ 4 ທ່ານ.

ຕອນທ້າຍກໍຍັງໄດ້ຮັບຟັງການໂອ້ລົມຂອງປະທານສະຫະພັນແມ່ຍິງແຂວງໄດ້ເນັ້ນໜັກບາງບັນຫາດັ່ງນີ້:
1. ຄະນະ​ປະທານ​ຮາກ​ຖານ​ສະຫະພັນ​ແມ່ຍິງ ​ແລະ​ ສະມາຊິກ​ຕ້ອງ​ໄດ້​ສືບ​ຕໍ່​ບຸກບືນ​ພັດທະນາ​ຕົນ​ເອງ​ໃນ​ທຸກ​ດ້ານສືກສາ​ເອົາ​ໃຈ​ໃສ່​ສື​ກສາ​ອົບຮົມ​ທາງ​ດ້ານ​ການ​ເມືອງ​ແນວ​ຄິດ, ​ເຊື່ອມ​ຊືມ​ເນື້ອ​ໃນ​ຂໍ້​ແຂ່ງຂັນ 3 ດີ​ໃຫ້​ກວ້າງ ຂວາງ ​ແລະ ​ເລິກ​ເຊິ່ງ, ​ເພື່ອ​ສືບ​ຕໍ່​ປະຕິບັດ​ແນວທາງ​ນະ​ໂຍບາຍ​ຂອງ​ພັກ – ລັດ, ​ເປັນ​ເຈົ້າການ, ​ໃນ​ການ​ປະຕິບັດ​ສິດ – ໜ້າ​ທີ່ຂອງ​ຕົນ, ​ເສີມ​ຂະຫຍາຍ​ມູນ​ເຊື້ອ​ອັນ​ດີງາມ​ຂອງ​ຊາດ ​ແລະຂອງ​ແມ່ຍິງ​ລາວ, ​ໂດຍສ​ະ​ເພ​າະ​ແມ່ນ​ການ​ນຸ່ງ​ຖື​ທີ່​ເປັນ ​ເອກະລັກທີ່​ເປັນ​ມູນ​ເຊື້ອ​ຂອງ​ແມ່ຍິງ​ລາວ.
2. ເນັ້ນໜັກ​ຄວາມ​ສາມັກຄີ​ເປັນ​ເອກະ​ພາບ, ​ເພື່ອ​ພ້ອມ​ກັນ​ຈັດຕັ້ງປະຕິບັດ​ວຽກ​ງານ​ອົງການ​ຈັດຕັ້ງ​ແມ່ຍິງ ​ໃຫ້​ກ້າວ​ໄປ​ສູ່​ຈຸດ ໝາຍ​ຢ່າງ​ມີ​ຜົນສຳ​ເລັດສູງ, ​ໃຫ້​ໄດ້​ຮັບ​ນາມມະຍົດ3ດີ, 3ປີ​ຕໍ່​​ເນື່ອງ ​ແລະ​ ຍາດ​ເອົາ​ທຸງ​ໄຊ​ໃຫ້​ໄດ້.
3. ສືບ​ຕໍ່​ປັບປຸງ​ອົງການ​ຈັດຕັ້ງສະຫະ​ພັນ​ແມ່ຍິງ​ໃຫ້​ມີ​ຄວາມ​ໜັກ​ແໜ້ນ​ເຂັ້ມ​ແຂງ​ດ້ານ​ປະລິມານ ​ແລະ ​ຄຸນນະພາ​ບ, ດຳ​ເນີນ​ຊີ ວິດ​ຂອງ​ໜ່ວຍ​ໃຫ້​ຕໍ່​ເນື່ອງ, ຕິດຕາມ​ກວດກາ​ການຈັດຕັ້ງປະຕິບັດ​ຂໍ້​ແຂ່ງຂັນ​ທີ່​ວາງ​ໄວ້​ພ້ອມ​ທັງສ່ອງ​ແສງ​ລາຍ​ງານ​ໃຫ້​ສະຫະພັນ​ແມ່ຍິງ​ແຂວງ​ ກໍຄື​ຄະນະ​ພັກ​ຮາກ​ຖານ​ທີ່​ສັງກັດ​ຢ່າງ​ເປັນ​ປົກກະຕິ.
4. ເປີດ​ກວ້າງ​ຂະ​ບວນການ​ຂໍ້ແຂ່ງຂັນ 3 ດີ ​ໃຫ້​ກວ້າງຂວາງ, ​ເລິກ​ເຊິ່ງ ​ໃຫ້​ປະກົດ​ຜົນ​ເປັນ​ຈິງ.
5. ກຽມພ້ອມ​ໃນ​ການ​ປະກອບສ່ວນ​ໃນ​ວຽກ​ງານ​ຂອງ​ພັກ, ຂອງ​ລັດ ​ແລະ ອົງການ​ຈັດຕັ້ງສະຫະພັນ​ແມ່ຍິງ, ມາຮອດເວລາ 11: 40 ໂມງຂອງວັນດຽວກັນກອງປະຊຸມໄດ້ຊີ້ນສຸດລົງ