ໜ່ວຍພັກຄົ້ນຄວ້າ – ສັງລວມວຽກລັດ ຈັດພິທີຮັບມາຫາຊົນກ້າວໜ້າເຂົ້າເປັນສະມາຊິກພັກສຳຮອງ.

ໃນຕອນເຊົ້າ ຂອງວັນທີ 18 ກໍລະກົດ 2018 ທີ່​ຜ່ານ​ມາ.  ທີ່ຫ້ອງປະຊຸມຊັ້ນສາມຂອງຫ້ອງວ່າການແຂວງສາລະວັນ. ໜ່ວຍ​ພັກ​ຄົ້ນຄວ້າ – ສັງ​ລວມວຽກ​ລັດ ທີ່​ຂຶ້ນ​ກັບ​ຄະນະ​ພັກ​ຮາກ​ຖານ​ຫ້ອງ​ວ່າການ​​ແຂວງ ​ໄດ້​ຈັດ​ພິທີ ຮັບ​ເອົາ ມະຫາຊົນ​ທີ່​ມີ​ຄວາມ​ກ້າວໜ້າ ​ເຂົ້າ​ເປັນ​ສະມາຊິກ​ພັກ​ສຳຮອງ ​ໂດຍ​ໃຫ້​ກຽດ​ເປັນປະທານຂອງ ສະຫາຍ ສົມຄິດ ວົງສາລີ ເລຂາໜ່ວຍພັກຄົ້ນຄວ້າ – ສັງ​ລວມວຽກ​ລັດ, ຮອງຫົວໜ້າຫ້ອງວ່າການແຂວງ, ມີບັນດາທ່ານ​ຕ່າງ​ໜ້າ​ຈາກ​ຄະນະ​ຈັດຕັ້ງ​ແຂວງ, ກວດກາ​ແຂວງ, ​ໂຄສະນາ​ອົບຮົມ​ແຂວງ, ໜວ່ຍພັກທີ່ຂື້ນກັບຄະນະພັກຮາກຖານຫ້ອງວ່າການແຂວງ, ຕາງໜ້າອົງການຈັດຕັ້ງມະຫາຊົນຂອງຫ້ອງວ່າການແຂວງ ແລະ ສະມາຊິກພັກພາຍ​ໃນ​ໜ່ວຍ​ພັກ​ຄົ້ນຄວ້າ – ສັງ​ລວມວຽກ​ລັດ ​ເຂົ້າຮ່ວມ.

ພິທີ​ຮັບ​ສະມາຊິກ​ພັກ​ໃໝ່​ຄັ້ງນີ້, ຖື​ໄດ້​ວ່າ​ເປັນ​ຜົນງານ​ຂອງ​ກາ​ນກໍ່ສ້າງ ​ແລະ ຂະຫຍາຍ​ພັກທີ່ໜ່ວຍ​ພັກຄົ້ນຄວ້າ – ສັງ​ລວມວຽກ​ລັດ, ສະມາຊິກ​ພັກ​ສົມບູນ​ຜູ່​ຕິດຕາມ​ ໃຊ້​ເປັນ​ເວລາ​ນານ​ພໍ​ສົມ ຄວນ ​ແລະ ທັງ​ເປັນ​ໝາກຜົນ​​ຂອງ​ມະຫາຊົນ​ກ້າວໜ້າເອງ​ທີ່ຝຶກ​ຝົນ​ຫຼໍ່​ຫຼອມ ​ແລະ ມີ​ຜົນສຳ​ເລັດ​ຕົວຈິງ. ​ເຊິ່ງບັນດາ​ທ່ານ​ທີ່​ໄດ້​ຜ່ານ​ການ​ຮັບ​ຄັ້ງນີ້​ປະກອບ​ມີ: ທ່ານ ສຸບັນ ກົງຈັກ​ພັນ ​ແລະ ທ່ານ ນາງ ວັນນະ​ເລີດ ​ໂຮມ​ຫົງ​ສາ. ​ໃນ​ພິທີ ສະຫາຍ ​ເລຂາ​ໜ່ວຍ​ພັກ ກໍ​ໄດ້​ໃຫ້​ກຽດ​ອະ​ທິບາຍ​ຄວາມ​ໝາຍ​ຂອງ​ພິທີ​ຢ່າງ​ລະອຽດ – ​ເລິກ​ເຊິ່ງ, ພ້ອມ​ທັງ​ເຊື່ອມ​ຊຶມ​ບັນດາ​ສິດ, ໜ້າ​ທີ່ , ຂໍ້​ຫ້າມ​ຂອງ​ສະມາຊິກ​ພັກ​ ຕິດ​ພັນ​ກັບ​ການ​ໂອ້​ລົມ​​ຊີ້​ທິດ​ເຍືອງ​ທາງ ​ໃຫ້​ແກ່​ສະມາຊິກ​ພັກ​ໃໝ່​ ຕັ້ງໜ້າ​ຝຶກ​ຝົນ​ຫຼໍ່​ຫຼອມ​ຕົນ​ເອງ ​ເພື່ອ​ໃຫ້​ສາມາດ​ກາຍ​ເປັນ​ສະ ມາຊິກ​ພັກ​ສົມບູນ​ໃນ​ອານາ​ຄົດ.