ແຂວງສາລະວັນ ສຳເລັດການຈັດຕັ້ງເຊື່ອມຊືມ 3 ມະຕິ 1 ຄຳສັ່ງຂອງກົມການເມືອງສູນກາງພັກ ແລະ ສະຫຼຸບວຽກງານຈັດຕັ້ງ, ກໍ່ສ້າງພັກ – ພະນັກງານປະຈໍາປິ 2017 ແລະ ທິດທາງແຜນການປີ 2018

ໃນຕອນເຊົ້າຂອງວັນທີ 6 ມີນາ 2018 ທີ່​ຜານ​ມາ​ນີ້, ທີ່ສະໂມສອນໃຫຍ່ຂອງແຂວງ ໄດ້ເປີດກອງປະຊຸມເຜີຍແຜ່ເຊື່ອມຊືມ 3 ມະຕິ 1 ຄຳ​ສັ່ງ ຂອງກົມການເມືອງສູນກາງພັກ ແລະ ສະຫຼຸບວຽກງານຈັດຕັ້ງ, ກໍ່ສ້າງພັກ – ພະນັກງານປະຈໍາປິ 2017 ແລະ ທິດທາງແຜນການປີ 2018 ໂດຍພາຍ​ໃຕ້ການເປັນປະທານຂອງ ສະຫາຍ ສີສຸວັນ ວົງຈອມສີ ກໍາມະການສູນກາງພັກ, ເລຂາພັກ – ເຈົ້າແຂວງໆສາລະວັນ, ມີ​ບັນດາ​ທ່ານ​ໃນ​ຄະນະ​ບໍລິຫານ​ງານ​ພັກ​ແຂວງ, ​ເລຂາ​ພັກ​ເມືອງ, ​ເລຂາ​ຮາກ​ຖານ​ພັກ, ໜ່ວຍ​ພັກ​ອ້ອມ​ຂ້າງ​ແຂວງ​ເຂົ້າຮ່ວມ​ຢ່າງພ້ອມພຽງ.

ກອງ​ປະຊຸມ​ໄດ້​ຮັບ​ຟັງບົດສະຫຼຸບຕິລາຄາການຈັດຕັ້ງປະຕິບັດວຽກງານກໍ່ສ້າງພັກ – ພະນັກງານປະຈໍາປີ 2017 ແລະ ທິດທາງແຜນການສົກປີ 2018, ແລະ ຜ່ານມະຕິຂອງກົມການເມືອງສູນກາງພັກ 3 ສະ ບັບ ຄື: ເລກທີ 030/ກມສພ, ວ່າດ້ວຍ: ມາດຕະຖານຂອງພະນັກງານນໍາພາ – ຄຸ້ມຄອງ;​ ເລກ​ທີ031/ກມສພ ວ່າດ້ວຍ: ວຽກງານຄຸ້ມຄອງພະນັກງານ ​ແລະ ​ເລກທີ 032/ກມສພ ວ່າ​ດ້ວຍ: ວຽກງານສ້າງແຜນກຳນົດພະນັກງານນໍາພາ – ຄຸ້ມຄອງ ​ທີ່​ສະ​ເໜີ​ໂດຍ ສະຫາຍ ບຸນທຽມ ແກ້ວໄຊຍະວົງ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງ. ຈາກ​ນັ້ນ, ກອງ​ປະຊຸມກໍຍັງ​ໄດ້​ຮັບ​ຟັງ ການ​ຜ່ານ​ເອກະສານຄຳສັ່ງ ຂອງກົມການເມືອງສູນກາງພັກສະບັບ ເລກທີ 01/ກມສພ,ລົງວັນທີ 3 ມັງກອນ 2018 ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສເຂັ້ມແຂງ ແລະ ໜັກແໜ້ນທີ່​ສະ​ເໜີ​ໂດຍ ສະຫາຍ ຄໍາຈັນແຈ່ມສະໜອນ ກຳມະການປະຈໍາພັກແຂວງ, ຫົວໜ້າຄະນະກວດກາພັກ – ລັດແຂວງ.

          ​ໃນ​ຕອນ​ທ້າຍ ສະຫາຍ ສີສຸວັນ ວົງຈອມສີ ກໍາມະການສູນກາງພັກ, ເລຂາພັກ – ເຈົ້າແຂວງໆ ສາລະວັນ  ກໍໄດ້ມີຄຳເຫັນໂອ້ລົມຕໍ່ກອງປະຊຸມຄັ້ງນີ້  ​ເຊິ່ງທ່ານໄດ້ຮຽກຮ້ອງໃຫ້ຄະນະພັກ, ຄະນະ​ປົກຄອງ​ແຂວງ​ເອົາ​ໃຈ​ໃສ່ຍົກສຸງວຽກງານການເມືອງ – ແນວຄິດໃຫ້ໜັກແໜ້ນ, ມີຄວາມເປັນເອກະພາບສູງຕໍ່ແນວທາງການເມືອງຂອງພັກ ເຊື່ອໜັ້ນຕໍ່ລະບອບໃໝ່ກໍ​ຄື​ຈຸດໜາຍກ້າວຂື້ນສັງຄົມນິຍົມດ້ວຍບາດກ້າວທີ່ໜັກແໜ້ນ. ຄະນະພັກ, ສະມາຊີກພັກທຸກສະຫາຍຕ້ອງ​ໄດ້ຝືກຝົນຫຼໍ່ຫອມຕົນເອງ, ເປັນເຈົ້າການໃນການເຮັດວຽກງານ, ສືບຕໍ່ເສີມຂະຫຍາຍວຽກງານການກໍ່ສ້າງພັກ – ພະນັກງານ, ​ເພື່ອຍົກສູງຄຸນນະພາບຂອງການຈັດຕັ້ງພັກຕິດ​ພັນ​ກັບຄຸນທາດການເມືອງຂອງພະນັກງານ – ສະມາຊິກພັກ. ປະຕິບັດຫຼັກການລວມສູນປະຊາທິປະໄຕ, ເພີ່ມທະວີການ​ປະຕິບັດລະບຽບວິ​ໄນຂອງ​ພັກຢ່າງເຂັ້ມງວດ, ຮັບປະກັນໃຫ້ສະມາຊິກພັກໄດ້ປະຕິບັດສິດຕ່າງໆທີ່ກໍານົດໄວ້ໃນກົດລະບຽບຂອງພັກຢ່າງຄົບຖ້ວນເພື່ອຕັ້ງໜ້າປັບປຸງແບບແຜນວິທີເຮັດວຽກຍົກສູງຄວາມສາມາດການນຳພາຂອງພັກ​ໃຫ້​ດີ​ຂຶ້ນ​ໄປ​ເລື້ອຍໆ.