ແຂວງສາລະວັນ ສປປ ລາວ – ແຂວງເທື່ອທຽນເຫວ້ ສສ ຫວຽດນາມ ເຊັນບົດບັນທຶກຮ່ວມກັນຮັດແໜ້ນຄວາມສາມັກຄີ ແລະ ສາຍພົວພັນຮອບດ້ານ.

ໃນຕອນເຊົ້າຂອງວັນທີ 18 ກັນຍາ 2019 ທີ່ຜ່ານມານີ້, ຄະນະນຳຂັ້ນສູງຂອງແຂວງສາລະວັນ ແລະ ແຂວງເທື່ອທຽນເຫວ້, ໄດ້ຮວ່ມກັນລົງນາມເຊັ່ນບົດບັນທຶກຮ່ວມກັນເພື່ອເພີ່ມຄວາມສາມັກຄີຮັດແໜ້ນສ່າຍພົວພັນຮອບດ້ານທີ່ສະໂມສອນໄຫຍ່ຂອງແຂວງສາລະວັນ, ເຊີ່ງແຂວງສາລະວັນນຳໂດຍທ່ານ ບົວທອງ ຄຸນຍອດປັນຍາ ຮອງເລຂາພັກແຂວງ ພ້ອມຄະນະ ແລະ ຄະນະນຳຂັ້ນສູງແຂວງເທື່ອທຽນເຫວ້ນຳໂດຍທ່ານ ບຸ່ຍ ແທັງຮ່າ ຮອງເລຂາພັກແຂວງໆເທື່ອທຽນເຫວ້ ທັງແມ່ນຜູ້ປະຈຳການ ພ້ອມຄະນະ. ທັງສອງຝ່າຍຍັງຈະສືບຕໍ່ເພີ່ມທະວີຮັກສາ ແລະ ພັດທະນາສາຍພົວພັນມິດຕະພາບ ຮ່ວມມືຮອບດ້ານແບບພິເສດ ທີ່ເປັນມູນເຊື້ອອັນດີງາມ ລະຫວ່າງສອງປະເທດ ລາວ – ຫວຽດນາມ, ແຂວງສາລະວັນ – ແຂວງເທື່ອທຽນເຫວ້ ຊຸກຍູ້ການຮ່ວມມືໃຫ້ດີຂື້ນທາງດ້ານຄຸນນະພາບກ່ຽວກັບການກໍ່ສ້າງຊັບພະຍາກອນມະນຸດ, ແຂວງເທື່ອທຽນເຫວ້ຈະສືບຕໍ່ໃຫ້ທືນການສຶກສາແກ່ແຂວງສາລະວັນ ຈຳນວນ 10 ທືນ, ເລີ່ມແຕ່ສົກຮຽນ 2019 – 2020 ແຂວງເທື່ອທຽນເຫວ້ໃຫ້ເພີ່ມ 02 ທືນ ໃນການກໍ່ສ້າງລະບົບປະລິນຍາໂທ ໃຫ້ແກ່ແຂວງສາລະວັນປະສານສົມທົບກັນຈັດຕັ້ງປະຕິບັດຢ່າງເຂັ້ມງວດ ລະບຽບການວ່າດ້ອຍເງື່ອນໄຂ ແລະ ການຄຸ້ມຄອງນັກສຶກສາລາວຢູ່ແຂວງເທື່ອທຽນເຫວ້ ສືບຕໍ່ໃຫ້ຄວາມສຳຄັນໃນການຄັດເລືອກນັກຮຽນໄປຮຽນຕໍ່ຢູ່ແຂວງເທື່ອທຽນເຫວ້, ກຳນົດໃຫ້ນັກສຶກສາຄັດເລືອກຄະແໜງຮຽນທີ່ມີຄວາມເໝາະສົມແນໃສ່ເພື່ອຍົກສູງທາງຜົນການຮຽນ ແລະ ຄຸນນະພາບ, ເພີ່ມທະວີການແລກປ່ຽນການຮ່ວມມື ລະຫວ່າງຂະແໜງສຶກສາຂອງສອງແຂວງທາງດ້ານການແລກປ່ຽນປະສົບການຮ່ວມກັນ ສືບຕໍ່ສະໜັບສະໜູນ ຊ່ວຍເຫຼືອດ້ານການກໍ່ສ້າງຊັບພະຍາກອນມະນຸດໃຫ້ແກ່ແຂວງສາລະວັນ, ສືບຕໍ່ຮັກສາການປະສານສົມທົບ ຈັດຕັ້ງບັນດາກິດຈະກຳ ແລກປ່ຽນວັດທະນະທຳ, ສີນລະປະເນື່ອງໃນໂອກາດວັນບຸນໃຫຍ່ຂອງຊາດສອງປະເທດ. ໃນໂອກາດທີ່ ທ່ານ ບຸ່ຍ ແທັງຮ່າ ຮອງເລຂາພັກແຂວງ ຜູ້ປະຈຳການຄະນະບໍລິຫານງານພັກແຂວງເທື່ອທຽນເຫວ້ ສສ ຫວຽດນາມ ພ້ອມດ້ວຍຄະນະ ມາຢ້ຽມຢາມ ແລະ ເຮັດວຽກຢູ່ແຂວງສາລະວັນ ໃນຄັ້ງນີ້, ທ່ານໄດ້ມອບເງິນສົດ ຈຳນວນ 200 ລ້ານດົງ ໃຫ້ແກ່ແຂວງສາລະວັນ ເພື່ອຊ່ວຍແກ້ໄຂຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ ເຊິ່ງຕ່າງໜ້າຮັບໂດຍ ທ່ານ ບົວທອງ ຄຸນຍອດປັນຍາ ຮອງເຈົ້າແຂວງໆສາລະວັນ.

ພ້ອມນີ້, ທ່ານ ບຸ່ຍ ແທັງ ຮ່າ ຍັງໄດ້ ສະແດງຄວາມເປັນຫ່ວງເປັນໄຍພໍ່ແມ່ປະຊາຊົນທົ່ວແຂວງສາລະວັນ ທີ່ປະສົບໄພນ້ຳຖ້ວມ, ພ້ອມທັງ ໃຫ້ກຳລັງໃຈຕໍ່ກັບອົງການປົກຄອງແຂວງ ກໍຄື ພໍ່ແມ່ປະຊາຊົນໃຫ້ຜ່ານພົ້ນວິກິດນີ້ໄປດ້ວຍດີ ແລະ ເຊື່ອໝັ້ນວ່າພາຍໃຕ້ການຊີ້ນຳໆພາຂອງພັກ – ລັດ ຖະບານ ກໍຄື ອຳນາດການປົກຄອງແຂວງ ຈະສາມາດຟື້ນຟູຜົນເສຍຫາຍໃຫ້ກັບຄືນເຂົ້າສູ່ສະພາບປົກກະຕິໂດຍໄວ. ຈາກນັ້ນ, ສະພາກາແດງແຂວງເທື່ອທຽນເຫວ້ ກໍໄດ້ມອບເງິນສົດອີກຈຳນວນ 40 ລ້ານກີບ ໃຫ້ອົງການກາແດງແຂວງ ເພື່ອນໍາໄປຈັດສັນຊ່ວຍເຫລືອແກ້ໄຂໃຫ້ກັບຜູ້ປະສົບໄພນ້ຳຖ້ວມເຊັ່ນດຽວກັນ, ໂອກາດນີ້ທ່ານ ບົວທອງ ຄຸນຍອດປັນຍາ ຮອງເຈົ້າແຂວງໆສາລະວັນ, ໄດ້ຕ່າງໜ້າໃຫ້ແກ່ອໍານາດການປົກຄອງແຂວງ ກໍຄື ພໍ່ແມ່ປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ຂໍສະແດງຄວາມຍ້ອງຍໍຊົມເຊີຍ ແລະ ຂອບໃຈມາຍັງ ທ່ານ ບຸ່ຍ ແທັງຮ່າ ຮອງເລຂາພັກແຂວງ ຜູ້ປະຈຳການຄະນະບໍລິຫານງານພັກແຂວງເທື່ອທຽນເຫວ້ ສສ ຫວຽດນາມ ພ້ອມດ້ວຍຄະນະ, ທີ່ເຫັນໄດ້ຄວາມສຳຄັນ ແລະ ຈຳເປັນໃນການຊ່ວຍເຫລືອບັນເທົາທຸກໃຫ້ແກ່ພໍ່ແມ່ປະຊາຊົນຢູ່ພາຍໃນແຂວງ, ພ້ອມທັງສະແດງຄວາມຢືນຢັນວ່າ ຈະຮີບຮ້ອນຊ່ວຍເຫລືອຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມໃນຄັ້ງນີ້.