ແຂວງສາລະວັນ ດຳເນີນກອງປະຊຸມວຽກງານບໍລິຫານລັດຄັ້ງທີ 4 ສະໄໝທີ VIII

ໃນ​ລະຫວ່າງ​ວັນ​ທີ 27-28 ກັນຍາ 2018ນີ້, ທີ່ຫ້ອງປະຊຸມໃຫຍ່ຊັ້ນ II ( VIP) ສະ​ໂມ​ສອນ​ໃຫ່ຍຂອງ​ແຂວງ ​ສາລະ​ວັນ​​ ໄດ້​ເປີດ​ກອງ​ປະຊຸມ​ວຽກ​ງານ​ບໍລິຫານ​ລັດຄັ້ງທີ 4 ສະໄໝທີ VIII. ​ໂດຍ​ພາຍ​ໃຕ້​ການ​ເປັນ​ປະທານ​ຂອງ ທ່ານ ສີ​ສຸວັນ ວົງ​ຈອມ​ສີ ​ເຈົ້າ​ແຂວງ ສາລະ​ວັນ, ມີ​ບັນດາ​ທ່ານ​ຄະນະປະຈຳ​ພັກ​ແຂວງ; ຮອງເຈົ້າ​ແຂວງ, ປະທານສະພາປະຊາຊົນແຂວງ, ສະມາຊິກສະພາ, ເຈົ້າເມືອງ, ຫົວ​ໜ້າ​ພະ​ແນ​ກການ, ຮອງ​ພະ​ແນ​ກການ – ອົງການ​ທຽບ​​ເທົ່າ, ​ ອ້ອມ​ຂ້າງແຂວງ, ຫ້ອງການເງິນ-ອາກອນເມືອງ, ດ່ານສາກົນລະໄລ, ດ່ານທ້ອງຖິ່ນ ແລະ ທະນາຄານ ເຂົ້າຮ່ວມທັງ​ໝົດ 80 ທ່ານ, ຍິງ 04 ທ່ານ.

          ກອງປະຊຸມຄັ້ງນີ້​​ແມ່ນໄດ້​ຮັບ​ຟັງບົດລາຍງານແຜນພັດທະນາເສດຖະກິດ-ສັງຄົມ 09 ເດືອນ ແລະ ທິດທາງແຜນການ 03 ເດືອນທ້າຍປີ 2018, ການສົ່ງເສີມການລົງທຶນພາຍໃນ – ຕ່າງປະເທດ. ພ້ອມ​ເຜີ​ຍ​​ແຜ່ຄໍາສັ່ງເລກທີ 12 /ນຍ, ລົງ​ວັນ​ທີ 23/8/ 2018 ວ່າ​ດ້ວຍ: ການຈັດຕັ້ງປະຕິບັດ 8 ມາດ​ຕະການ​ຊຸກຍູ້​ເສດຖະກິດ, ການຈັດຕັ້ງປະຕິບັດການເກັບລາຍຮັບເຂົ້າງົບປະມານແຫ່ງລັດ 09 ເດືອນ ເດືອນ ແລະ ທິດທາງແຜນການ 03 ເດືອນທ້າຍປີ 2018. ໂດຍກອງປະຊຸມໄດ້ຄົ້ນຄວ້າ​ປະກອບຄໍາຄິດເຫັນດ້ວຍຄວາມຮັບຜິດຊອບສູງດ້ານທັດສະນະກົງໄປກົງມາ, ກະທັດຮັດໂດຍສຸ່ມໃສ່ບັນຫາການສົ່ງເສີມການລົງທຶນທັງພາຍໃນ ແລະ ຕ່າງປະເທດ, ບັນຫາ​ທີ່​ກົດ​ໜ່ວງ​ທ່ວງດຶງ​ການ​ດຶງ​ດູດ​ການ​ລົງ​ທືນ, ການ​ຜະລິດການກະກຽມ​ເຂົ້ານາແຊງ, ປູກພຶດລະດູແລ້ງ, ​ບັນຫາ​ການຈັດ​ເກັບ​ລາຍ​ຮັບ, ການ​ສົ່ງເສີມທຸລະກິດຂະໜາດນ້ອຍ, ກາງ, ການຄຸ້ມຄອງນໍາໃຊ້ທີ່ດິນ.  ​ປະກອບ​ຄຳ​ເຫັນ​ປຶກສາຫາກັນ​ຢ່າງ​ມີ​ຄວາມ​ຮັບຜິດຊອບ.

ຕໍ່​ກັບ​ບັນຫາ​ຕ່າງ​ໆ ປະທານ​ກອງ​ປະຊຸມ​ກໍໄດ້ມີ​ຄຳ​ເຫັນ​ຊີ້​ນຳ, ​​ໂດຍໄດ້ເນັ້ນ​ໜັກ​ຫຼາຍບັນຫາຄື:

  • ເພີ່ມທະວີຄວາມຮັບຜິດຊອບ, ເປັນເຈົ້າການຈັດຕັ້ງປະຕິບັດ ພາລະບົດບາດຂອງຕົນໃນການຈັດເກັບລາຍຮັບ ແກ້ໄຂລະບອບລະບຽບແຜນກົນໄກ, ກວດກາຄືນບັນຫາການເກັບລາຍຮັບ, ການໄລ່ລຽງຕໍ່ລອງ, ການຮົ່ວໄຫຼເກັບແລ້ວບໍ່ມອບ ຫຼື ມອບບໍ່ໝົດ ແລະ ສ້າງແຜນການເຄື່ອນໄຫວເກັບລາຍຮັບປະຈໍາວັນ, ອາທິດ, ເດືອນ, ງວດ ແລະ ປີໃນການຈັດຕັ້ງປະຕິບັດໃຫ້ເຂັ້ມງວດ.
  • ເອົາໃຈໃສ່ຢ່າງແຂງແຮງໃນການແກ້ໄຂຖານມູນເກັບລາຍຮັບຄືນໄໝ່ໃຫ້ລະອຽດຈະແຈ້ງທຸກຂະແໜງ ການຂອງແຂວງ, ເມືອງເປັນເຈົ້າການປິ່ນອ້ອມຊ່ວຍ, ຂະແໜງການເງິນຕິດຕາມຊຸກຍູ້ລາຍຮັບ.
  • ສົ່ງເສີມ ແລະ ຄຸ້ມຄອງການລົງທຶນເອົາໃຈໃສ່ປະຕິບັດພາລະບົດບາດຂອງຕົນໃຫ້ຖຶກຕ້ອງຕາມກົດໝາຍສົ່ງເສີມການດຶງດູດການລົງທຶນສ້າງອໍານວຍຄວາມສະດວກໃຫ້ແກ່ການມາລົງທຶນແກ້ໄຂດ້ານສະພາບການແກ່ຍາວ, ການກົດໜ່ວງທ່ວງດຶງຮຽກຮ້ອງຜົນປະໂຫຍດ ຫຼາຍຂັ້ນ-ຫຼາຍຂອດ, ເອົາໃຈໃສ່ປັບປຸງລະບອບແບບແຜນສ້າງນະໂຍບາຍຊຸກຍູ້ສົ່ງເສີມການລົງທຶນພາຍໃນ ແລະ ຕ່າງປະເທດໃຫ້ຈະແຈ້ງ, ຈັດຕັ້ງຫ້ອງການປະຕູດຽວຕາມຄໍາສັ່ງຂອງນາຍົກລັດຖະມົດຕີສະບັບເລກທີ 09 /ນຍ, ຂື້ນແຜນກະກຽມການຜະລິດລະດູແລ້ງເປັນຕົ້ນເຂົ້ານາແຊງ, ປູກພຶດ, ຝຸ່ນ ແນວພັນ, ສ້ອມຊົນລະປະທານ, ຈັກສູບນໍ້າ, ຊຸກຍູ້ຊາວກະສິກອນເຮັດການຜະລິດຕົວຈິງໃຫ້ເປັນຂະບວນການຟົດພື້ນ, ຄຸ້ມຄອງລາຄາສິນຄ້າ, ເຂົ້າ ແລະ ສິນຄ້າໝົດອາຍຸໃຫ້ເຂັ້ມງວດ, ຫັນເອົາພະນັກງານລົງກໍ່ສ້າງຮາກຖານການເມືອງຊ່ອຍເມືອງເຮັດໜ້າທີ່ວິຊາສະເພາະ ແລະ ແກ້ໄຂຄວາມທຸກຍາກໃຫ້ຫຼຸດພົ້ນເທື່ອລະກ້າວ ພ້ອມດັ່ງນັ້ນກໍໃຫ້ເອົາໃສ່ການຄຸ້ມຄອງບໍລິຫານລັດຕິດພັນກັບກົດໝາຍ, ນິຕິກໍາລຸ່ມກົດໝາຍທີ່ສະພາຮັບຮອງ, ຄໍາສັ່ງເລກທີ 12 /ນຍໃຫ້ອອກຜົນ ແລະ ມີຜົນສັກສິດ ກະກຽມດໍາເນີນກອງປະຊຸມ ຊຸກຍູ້ສົ່ງເສີມທຸລະກິດຂະໜາດນ້ອຍ – ຂະໜາດກາງ.