ແຂວງສາລະວັນສຳເລັດການປາຖະກະຖາປະຫວັດຄວາມເປັນມາຂອງວັນແມ່ຍິງສາກົນ ( 8 ມີນາ ) ຄົບຮອບ 108 ປີ ຕິດພັນກັບການເປີດຕະຫຼາດຫັດຖະກຳ ແລະ ຜືດຜັກສະອາດ.

ໃນ​ຕອນ​ເຊົ້າຂອງວັນທີ 7 ມີນາ 2018 ທີ່​ຜ່ານ​ມາ​ນີ້, ທີ່​ສູນ​ພັດທະນາ​ວິຊາ​ຊີບ​ສະຫະພັນ​ແມ່ຍິງ​ແຂວງ​ສາລະ​ວັນ, ​ໄດ້​ຈັດ​ພິທີ​ປາຖະກະຖາ​ປະ​ຫັວດຄວາມ​ເປັນ​ມາ​ຂອງວັນແມ່ຍິງສາກົນ(8 ມີນາ 1910 – 8 ມີນາ 2018) ຄົບຮອບ 108 ປີ ຕິດ​ພັນ​ກັບ​ການ​ເປີດ​ຕະຫຼາດ​ຫັດຖະກຳ ​ແລະ ພື​ກຜັກສະອາດ, ​​ໂດຍ​ໃຫ້​ກຽດ​ເປັນ​ປະທານ​ຮ່ວມ​ຂອງ​ທ່ານ ວິຊຽນ ນະ​ວິ​ກຸນ ກຳມະການ​ປະຈຳ​ພັກ​ແຂວງ​, ຮອງ​ເຈົ້າ​ແຂວງໆ ສາລະ​ວັນ ​ແລະ ທ່ານ ນາງ ບຸນ​ທະວີ ດວງ​ລາສີ ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງ​ລາວ, ກຳມະການປະຈຳພັກແຂວງ, ປະທານ​ສະຫະພັນ​ແມ່ຍິງ​ແຂວງ, ມີ​ບັນດາ​ທ່າ​ນ​ກຳມະການ​ປະຈຳ​ພັກ​ແຂວງ, ຮອງ​ເຈົ້າ​ແຂວງ, ກຳມະການພັກແຂວງ, ຫົວໜ້າພະແນກການ, ຮອງພະແນກການ – ອົງການທຽບເທົ່າອ້ອມຂ້າງແຂວງ, ຄອບຄົວການນຳຂັ້ນແຂວງ ​ແລະ ຄະນະບໍລິຫານງານສະຫະພັນແມ່ຍິງແຂວງ ຕະຫຼອດ​ຮອດ​ສະມາຊິກສະຫະພັນແມ່ຍິງອ້ອມຂ້າງແຂວງ ເຂົ້າຮ່ວມຢ່າງ​ຫຼວງ​ຫຼາຍ. ​ໃນ​ໂອກາດ​ນີ້ ທ່ານ ນາງ ບຸນ​ທະວີ ດວງ​ລາສີ ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງ​ລາວ, ກຳມະການປະຈຳພັກແຂວງ, ປະທານ​ສະຫະພັນ​ແມ່ຍິງ​ແຂວງ. ກໍໄດ້ເລົ່າຄືນປະຫວັດຄວາມເປັນມາຂອງການສ້າງຕັ້ງວັນແມ່ຍິງສາກົນທີ 8 ມິນາ 1910 ເຖີງປັດຈຸບັນ ເຊິ່ງທ່ານໄດ້ຍົກ​ໃຫ້ເຫັນການຕໍ່ສູ້ປົດປ່ອຍຕົນເອງຂອງ​ກຳມະກອນ​ເພດ​ຍິງ ​ເພື່ອ​ໃຫ້​ຫຼຸດ​ພົ້ນອອກຈາກການກົດຂີ່ຂູດຮີດຂອງພວກນາຍທຶນ, ທວງເອົາສິດຜົນປະໂຫຍດອັນເປັນທຳ ​ແລະ ສິດສະ​ເໜີ​ພາບ​ລະຫວ່າງ​ຍິງ – ຊາຍ ​ໃນ​ການອອກແຮງງານຂອງ​ກຳມະການ​ກອນ​​ໃນທົ່ວໂລກ, ພາຍ​ໃຕ້ຄຳຂວັນ:“ ຜູ້ໜື່ງເຮັດວຽກມື້ລະ 8 ຊົ່ວໂມງ, ແມ່ຍິງ ແລະ ຜູ້ຊາຍ ເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງກັນສຸກຂະພາບຂອງແມ່ຍິງ ແລະ ເດັກນ້ອຍ, ຕ້ານສົງຄາມຮຸກຮານ, ປົກປັກຮັກສາສັນຕິພາບຂອງໂລກ’’.

ຈາກນັ້ນ, ທ່ານວິຊຽນ ນະວິກຸນ ກຳມະການປະຈຳພັກແຂວງ, ຮອງເຈົ້າແຂວງໆ ສາລະວັນ ກໍໄດ້ກ່າວເປີດຕະຫຼາດຫັດຖະກຳ ແລະ ພືດຜັກສະອາດ ຢ່າງ​ເປັນ​ທາງ​ການ, ​ເຊິ່ງແມ່ນກິດຈະກຳໜື່ງຂອງໂຄງການພັດທະນາຊຸມຊົນແບບມີສ່ວນຮ່ວມ ແລະ ຍືນຍົງ ທີ່ໄດ້ຮັບທຶນສະໜັບສະໜູນ ຈາກລັດຖະບານປະເທດເກົາຫຼີ ໂດຍຜ່ານອົງການສະຫະປະຊາຊາດເພື່ອການພັດທະນາ ແລະ  ສູນສະຫະ ພັນແມ່ຍິງລາວ ສຳ​ລັບ​ແຂວງ​ສາລະ​ວັນ ​ແມ່ນໄດ້ຈັດຕັ້ງປະຕິບັດຢູ່ໃນ 10 ບ້ານ ຂອງ 3 ຕົວເມືອງຄື: ເລົ່າງາມ, ຕະໂອ້ຍ ແລະ ວາປີ, ຕະຫຼາ​ດດັ່ງກ່າວ​ແມ່ນ​ຈະ​ໄດ້​ເປີດ​ໃນ​ທຸກ​ໆ ວັນ​ພຸດ​ຂອງ​ອາທິດ, ​ເລີ່​ມ​ແຕ່​ເວລາ 5:30​ໂມງ​ເຊົ້າ​ເປັນຕົ້ນ​ໄປ.