ແຂວງສາລະວັນສຳເລັດກອງປະຊຸມໃຫ່ຍຄັ້ງທີ VIII ຂອງອົງຄະນະພັກແຂວງ

ກອງປະຊຸມໃຫ່ຍຂອງອົງຄະນະພັກແຂວງສາລະວັນ ຄັ້ງທີ VIII ໄດ້​ໄຂ​ຂຶ້ນ​ຢ່າງ​ເປັນ​ທາງ​ການ ​ແລະ ດຳເນີນແຕ່ວັນທີ 8 – 10 ກໍລະກົດ ປີ 2015 ທີ່ສະໂມສອນ​ໃຫຍ່​ຂອງ​ແຂວງ. ກອງ​ປະຊຸມ​ຄັ້ງ​ນີ້ ໃຫ້ກຽດ​​ເຂົ້າ​ຮ່ວມ ​ແລະ ເປັນ​ປະທານ​ຂອງ ສະຫາຍ ອາຊາ​ງ ລາວ​ລີ ກຳມະການ​ກົມ​ການ​ເມືອງ​ສູນ​ກາງ​ພັກ, ຮອງ​ນາຍົກລັດຖະ ມົນຕີ ​ແຫ່ງ ສປປລາວ, ສະຫາຍ ຄຳ​ບຸ່ນ ດ້ວງ​ປັນຍາ ກຳມະການ​ສູນ​ກາງ​ພັກ, ​ເລຂາ​ຄະນະ​ບໍລິຫານ​ງານ​ພັກ​ແຂວງ – ​ເຈົ້າ​ແຂວງ​ໆສາລະ​ວັນ. ກອງປະຊຸມໃຫ່ຍມີຜູ້ແທນ​ເຂົ້າ​ຮ່ວມ ຈຳນວນ 300 ສະ ຫາຍ, ຍິງ 26 ສະຫາຍ. ໃນນັ້ນ, ຜູ້ແທນສົມບູນມີ 269 ສະຫາຍ ຍິງ 23 ມາ ຈາກຂະແໜງການ, ກົມກອງອ້ອມຂ້າງແຂວງ ແລະ 8 ເມືອງ ທີ່ເປັນຕົວແທນ​ໃຫ້​ແກ່ສະມາຊິກພັກ 9.574 ສະຫາຍ ໃນທົ່ວແຂວງ; ມີ​ແຂກ​ທີ່​ຖືກ​ເຊີນ​ ຈຳ​ນວນ 31 ສະຫາຍ ຍິງ 3 ສະຫາຍ ທີ່​ມາ​ຈາກ​ຄະນະ​ຈັດ​ຕັ້ງ​ສູນ​ກາງ​ພັກ, ຄະນະ​ກວດກາ​ສູນ​ກາງ​ພັກ, ຄະນະ​ນຳ​ຈາກ 4 ​ແຂວງ​ໃກ້​ຄຽງ ຄື: ສະຫວັນ​ນະ​ເຂດ, ຈຳປາ​ສັກ, ​ເຊ​ກອງ, ອັດ​ຕະປື ​​ແລະ ກອງ​ພົນ​ທີ 5 ​ແຂວງ​ຈຳປາ​ສັກ ພ້ອມ​ດ້ວຍ​ພະນັກງານ​ບຳນານ​ປະຕິວັດ​ອາວຸ​ໂສ.

ກອງປະຊຸມໃຫ່ຍໄດ້ຄົ້ນຄວ້າພິຈາລະນາບັນຫາຢ່າງລະອຽດ ແລະ ປະກອບຄຳເຫັນຢ່າງເລິກເຊິ່ງໃສ່ຮ່າງລາຍ​ງານການ ເມືອງຂອງຄະນະບໍລິຫານ ງານພັກແຂວງສະໄໝທີ VIII ເຊິ່ງສະເໜີໂດຍ ສະຫາຍ ຄໍາບຸ່ນ ດ້ວງປັນຍາ ກຳມະການສູນກາງພັກ, ເລຂາພັກແຂວງ – ເຈົ້າແຂວງໆສາລະ ວັນ ແລະໄດ້ເປັນເອກະພາບຢ່າງສົມບູນຮັບຮອງເອົາເນື້ອໃນລາຍງານການເມືອງດັ່ງກ່າວ. ເຊິ່ງໄດ້ຕີລາຄາສະພາບຄວາມເປັນຈິງທັງໄດ້ຢັ້ງຢືນໃຫ້ ເຫັນຜົນງານ, ໄຊຊະນະແຫ່ງການຈັດຕັ້ງປະຕິ ບັດມະຕິກອງປະຊຸມໃຫ່ຍຄັ້ງທີ VII ຂອງອົງຄະນະພັກແຂວງ, ບົດຮຽນທີ່ຖອດຖອນໄດ້ຈາກ ພຶດຕິກຳຕົວຈິງ, ຈຳແນກຈຸດດີ, ຈຸດອ່ອນ ແລະ ຂໍ້ຄົງຄ້າງເພື່ອພ້ອມກັນແກ້ໄຂໃນຕໍ່ໜ້າ.

ເພື່ອສຶບຕໍ່ຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ ແລະຕອບສະໜອງຄວາມຮຽກຮ້ອງຕ້ອງການຂອງປະຊາ ຊົນບັນດາເຜົ່າ. ກອງປະຊຸມໃຫ່ຍໄດ້ມີຄວາມເປັນເອກະພາບ ຮັບຮອງເອົາຄາດໝາຍສູ້ຊົນນໍາພາແຂວງສາລະວັນກ້າວຂຶ້ນແຕ່ນີ້ຮອດປີ 2025, 2030 ແລະ ແຕ່ປີ 2016-2020.

ກອງປະຊຸມໃຫ່ຍໄດ້ຮັບຟັງລາຍງານກ່ຽວກັບການສຳຫຼວດການເຄື່ອນໄຫວນຳພາ ຂອງຄະນະບໍລິຫານງານພັກແຂວງຊຸດທີ VII ແລະໄດ້ຕີລາຄາສູງຕໍ່ຄວາມບຸກບືນບາກບັ່ນໃນການປະຕິບັດໜ້າທີ່ໃຫ້ໄດ້ຮັບຜົນສຳເລັດດ້ວຍດີ ເປັນຕົ້ນແມ່ນ: ຮັກສາໄດ້ຄວາມສາມັກຄີເປັນ ເອກະພາບພາຍໃນຄະນະບໍລິຫານງານພັກແຂວງຢ່າງແໜ້ນແຟ້ນ, ເປັນແກ່ນສານໃຫ້ແກ່ຄວາມສາມັກຄີເປັນເອກະພາບໃນທົ່ວພັກ, ທົ່ວກຳ ລັງປະກອບອາວຸດ ແລະທົ່ວປວງຊົນພາຍໃນແຂວງຢ່າງໜັກແໜ້ນ, ເສີມຂະຫຍາຍໄດ້ບົດຮຽນ ແລະຫົວຄິດປະດິດສ້າງ, ກ້າຄິດ, ກ້າເຮັດ, ກ້າຮັບຜິດຊອບ ໃນການຈັດຕັ້ງປະຕິບັດມະຕິກອງປະຊຸມໃຫ່ຍ ຄັ້ງທີ VII ຂອງອົງຄະນະພັກແຂວງ. ພ້ອມກັນນັ້ນ; ບັນດາຜູ້ແທນກອງປະຊຸມ ໃຫ່ຍກໍໄດ້ປະກອບຄໍາເຫັນຢ່າງກົງໄປກົງມາ, ເພື່ອເປັນການຢັ້ງຢືນເຖິງໝາກຜົນດ້ານດີໃນການນໍາພາປະຕິບັດມະຕິກອງປະຊຸມໃຫ່ຍ ຄັ້ງທີ VII, ຜູ່ແທນໄດ້ປະກອບຄຳເຫັນຢ່າງສ້າງສັນແລະມີຄວາມຮັບຜິດຊອບຕໍ່ກັບບັນຫາທີ່ຍັງຄົງຄ້າງ ແລະຄວາມຂາດຕົກບົກຜ່ອງຂອງໝູ່ຄະນະ ກໍຄືສ່ວນບຸກຄົນໃນຜ່ານມາ ຂອງຄະນະບໍລິຫານງານພັກແຂວງ.

ພ້ອມ​ກັນ​ນີ້, ກອງປະຊຸມໃຫ່ຍໄດ້ເສີມຂະຫຍາຍສິດປະຊາທິປະໄຕຢ່າງເລິກເຊິ່ງປອ່ນບັດປິດລັບເພື່ອເລືອກຕັ້ງເອົາຄະ​ນະບໍລິຫານງານພັກແຂວງ ຊຸດທີ VIII ເຊິ່ງປະກອບດ້ວຍ 33 ສະຫາຍ, ຍິງ 3 ສະຫາຍ, ຜົນຂອງການປ່ອນບັດເລືອກຕັ້ງຄະນະບໍລິຫານງານພັກແຂວງຊຸດໃໝ່, ໄດ້ ສ່ອງແສງເຖິງລັກສະນະສຶບທອດຕໍ່ເນື່ອງ, ມີຕົວແທນຂອງເພດເຜົ່າ ຢ່າງສົມສ່ວນ; ບັນດາສະຫາຍທີ່ໄດ້ຮັບການເລືອກຕັ້ງນີ້ລ້ວນແຕ່ແມ່ນ ຜູ້ມີມາດຖານຄົບຖ້ວນ, ນັ້ນແມ່ນກຽດສະຫງ່າ ແລະແມ່ນຄວາມຮັບຜິດຊອບການເມືອງທີ່ພັກ ແລະ ປະຊາຊົນມອບໝາຍໃຫ້ ເພື່ອມານຳພາ ຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງນີ້ໃຫ້ປະກົດຜົນເປັນຈິງ.

ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກແຂວງ ຊຸດທີ VIII ໄດ້ປ່ອນບັດເລືອກເອົາຄະນະປະຈຳພັກແຂວງ ຈຳນວນ 11 ສະ ຫາຍ ເຊິ່ງມີລາຍຊື່ດັ່ງນີ້:

1. ສະຫາຍ ສີສຸວັນ ວົງຈອມສີ.

2. ສະຫາຍ ບົວທອງ ຄຸນຍອດປັນຍາ.

3. ສະຫາຍ ບຸນທຽມ ພົມມະສະຖີດ.

4. ສະຫາຍ ບຸນທຽມ ແກ້ວໄຊຍະວົງ.

5. ສະຫາຍ ຄໍາຈັນ ແຈ່ມສະໝອນ.

6. ສະຫາຍ ສີເຮັງ ຫອມສົມບັດ.

7.​ ສະຫາຍ ນາງ ບຸນທະວີ ດວງລາສີ.

8. ສະຫາຍ ພູທົງ ຄໍາມະນີວົງ.

9. ສະຫາຍ ວິຊຽນ ນະວິກຸນ.

10.ສະຫາຍ ພັອ ພູວຽງ ຫຼ່ຽມມະວົງສາ.

11. ສະຫາຍ ທຶງ ຈອມມະນີ.

ກອງປະຊຸມໄດ້ເປັນເອກະພາບຢ່າງສົມບູນເລືອກຕັ້ງເອົາ ສະຫາຍ ສີສຸວັນ ວົງຈອມສີ ເປັນເລຂາຄະນະບໍລິຫານງານພັກແຂວງ, ເລືອກຕັ້ງເອົາ ສະ ຫາຍ ບົວທອງ ຄຸນຍອດປັນຍາ, ສະຫາຍ ບຸນທຽມ ພົມມະສະຖີດ ແລະ ສະຫາຍ ບຸນທຽມ ແກ້ວໄຊຍະວົງ ເປັນຮອງເລຂາຄະນະບໍລິຫານງານພັກ ແຂວງ; ເລືອກຕັ້ງເອົາ ສະຫາຍ ຄຳຈັນ ແຈ່ມສະໝອນ ເປັນປະທານກວດກາພັກ, ສະຫາຍ ສົມສັກ ທົງຄຳຫານ, ສະຫາຍ ກໍລະກັນ ທຸມມະນີ ວົງ, ສະຫາຍ ເລີດສະໝີ ຈັນສີຍະວົງ ເປັນຮອງປະທານກວດກາພັກແຂວງ. ກອງປະຊຸມຍັງເລືອກເອົາຜູ້ແທນສົມບູນ ຈໍານວນ 22 ສະຫາຍ, ຍິງ 3 ສະຫາຍ ແລະ ຜູ້ແທນສຳຮອງ ຈຳນວນ 3 ສະຫາຍ, ທີ່ເປັນຕົວແທນຂອງສະມາຊິກພັກ, ອົງຄະນະພັກຂັ້ນຕ່າງໆ ເພື່ອໄປຮ່ວມກອງປະ ຊຸມໃຫ່ຍຄັ້ງທີ X ຂອງພັກ.

ຕອນທ້າຍກອງປະຊຸມໃຫຍ່ເປັນກຽດຢ່າງສູງຮັບຟັງການໂອ້ລົມຂອງ ສະຫາຍ ອາຊາງ ລາວລີ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນ ງານ ແລະ ໄຊຊະນະທີ່ອົງຄະນະພັກແຂວງຊຸດທີ VII ຍາດ​ມາ​ໄດ້. ພ້ອມ​ກັນ​ນັ້ນ, ສະຫາຍ ກໍ່​ຍັງ​ໄດ້​ມີ​ຄວາມ​ເປັນ​ຫ່ວງ​ເປັນ​ໄຍ ​ແລະ ຮຽກຮ້ອງ​ໃຫ້​ຄະນະ​ບໍລິຫານ​ງານ​ພັກ​ແຂວງ​ຊຸດ​ໃໝ່ (ຊຸດ​ທີ VIII) ​ໃຫ້​ພ້ອມ​ກັນ​ເອົາ​ໃຈ​ໃສ່​ນຳ​ເອົາ​ເນື້ອ​ໃນ​ຈິດ​ໃຈ​ຂອງ​ມະຕິ​ກອງ​ປະຊຸມ​ໃຫຍ່​ຄັ້ງ​ນີ້​ໄປ​ຜັນ​ຂະຫຍາຍ​ເປັນ​ແຜນ​ງານ, ​ໂຄງການ​ລະອຽດ, ຊີ້​ນຳໆພາ​ການຈັດ​ຕັ້ງ​ປະຕິ ບັດ​ໃຫ້​ບັນລຸ​ຕາມ​ຈຸດປະສົງ​ເປົ້າໝາຍ.