ແຂວງສາລະວັນຕ້ອນຮັບການມາຢ້ຽມຢາມ ແລະ ເຮັດວຽກຂອງ ທ່ານ ສຈ.ປອ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກ, ຫົວໜ້າຄະນະໂຄສະນາ -ອົບຮົມສູນກາງພັກ

ໃນຕອນເຊົ້າ ເວລາ 8:00 ວັນທີ 22 ກຸມພາ 2018 ທີ່​ຜ່ານ​ມາ ​ແຂວງ​ສາລະ​ວັນ​ໄດ້​ຕ້ອນຮັບ ທ່ານ ສຈ.ປອ ກິແກ້ວ ໄຂຄຳພິທູນ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍຄະນະ ທີ່ເດີນທາງມາ ຢ້ຽມຢາມ ແລະ ເຮັດວຽກຢູ່ແຂວງ ສາລະວັນ ​ໃຫ້​ກຽດ​ຕ້ອນ​ຮັບ​​ໂດຍ​ທ່ານ ສີ​ສຸວັນ ວົງ​ຈອມ​ສີ ກຳມະການ​ສູນ​ກາ​ງພັກ, ​ເລຂາ​ພັກ – ​ເຈົ້າ​ແຂວງ​ໆສາລະ​ວັນ ພ້ອມ​ດ້ວຍ​ຄະນະ.

          ໃນ​ໂອກາດ​ເຄື່ອນ​ໄຫວ​ຢ້ຽມຢາມ​ແຂວງ​ສາລະ​ວັນຄັ້ງນີ້  ທ່ານ ສຈ.ປອ ກິແກ້ວ ໄຂຄຳພິທູນ ໄດ້ພົບປະກັບຄະນະພັກ, ຄະນະ​ປົກ​ຄອ​ງ​ແຂວງ, ​ເລຂາ​ພັກ 8 ຕົວ​ເມືອງ ​ແລະ ພະນັກງານຫຼັກແຫຼ່ງ ​ອ້ອມ​ຂ້າງ​ແຂວງ ຢູ່ທີ່​​ຫ້ອງ​ປະຊຸມສະ​ໂມ​ສອນ​ໃຫ່ຍຂອງ​ແຂວງ​ສາລະ​ວັນ, ໄດ້ຮັບຟັງການລາຍງານສະພາບການພັດທະນາວຽກງານຮອບດ້ານ​​ໂດຍ​ຫຍໍ້ຂອງ​ແຂວງໃນໄລຍະຜ່ານມາ ຈາກທ່ານ ​ເລຂາ​ພັກ – ​ເຈົ້າແຂວງໆສາລະ​ວັນ, ​ເຊິ່ງ​ໄດ້​ຕີ​ລາຄາ​ວ່າ: ​ແຂວງສາລະ​ວັນມີ​ຄວາມ​ສະຫງົບ​ໂດຍ​ພື້ນຖານ, ​ເສດຖະກິດ​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ, ພື້ນຖານ​ໂຄງ​ລ່າງ​ມີ​ການ​ປັບປຸງ ​ແລະ ກໍ່ສ້າງ​ຂຶ້ນ​ໃໝ່. ຈາກນັ້ນ ທ່ານ ສຈ.ປອ ກິແກ້ວ ໄຂຄຳພິທູນ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ກໍໄດ້ໃຫ້ກຽດໂອ້ລົມ ​ໂດຍຍົກໃຫ້ເຫັນບົດບາດການນຳພາຂອງພັກທີ່ນັບມື້ສູງເດັ່ນຂື້ນໃນເວທີສາກົນ, ຍົກໃຫ້ເຫັນ ບົດບາດ ຄວາມສຳຄັນ ຂອງວຽກງານການເມືອງ – ແນວຄິດ, ບັນຫາສິ່ງທ້າທາຍ ແລະ ໜໍ່ແໜງຂອງປະກົດການຫຍໍ້ທໍ້ຂອງສັງຄົມໃນປັດຈຸບັນ ແລະ ອະນາຄົດ, ບັນຫາ​ການ​ເຊື່ອມໂຍງ ເສດຖະກິດຕະຫຼາດ ກັບສາກົນ, ຕໍ່​ກັບ​ບັນຫາ​ດັ່ງກ່າວ ທ່ານໄດ້ຮຽກຮ້ອງ ມາຍັງຄະນະພັກທີ່ນຳພາໃນແຕ່ລະຂົງເຂດ, ສະມາຊິກພັກ ແຕ່ລະສະຫາຍ ຕ້ອງຍົກສູງ ບົດບາດການນຳພາ ແລະ ເຊີດຊູຄວາມເປັນເຈົ້າການ ຖືເອົາວຽກງານ ການເມືອງແນວຄິດ ເປັນບັນຫາສຳຄັນ, ຕິດພັນກັບທຸກໜ້າທີ່ວຽກງານ ແລະ ພຶດຕິກຳຕົວຈິງ, ກໍາແໜ້ນ ຫາງສຽງສັງຄົມ, ຄົ້ນຄວ້າ​ແກ້​ໄຂ ​ແລະ ຖອດຖອນບົດຮຽນໃນການຈັດຕັ້ງປະຕິບັດ ປັບປຸງໃຫ້ສອດຄ່ອງໃນແຕ່ລະໄລຍະ. ຮັບປະກັນ​ໃຫ້ການປະຕິບັດໜ້າທີ່ວຽກງານ​ຂອງ​ພະນັກງານ -​ສະມາຊິກ​ພັກ ຖືກຕ້ອງ ຕາມແນວທາງ ​ແລະ ມີ​ຜົນສຳ​ເລັດ​ຕາມ​ລະດັບ​ຄາດໝາຍ.