ແຂວງສາລະວັນຕ້ອນຮັບການມາຢ້ຽມຢາມ ແລະ ເຮັດວຽກຂອງ ທ່ານ ນາງ ປານີ ຢາທໍ່ຕູ້ ກົມການເມືອງສູນກາງພັກ, ປະທານສະພາແຫ່ງຊາດ.
ໃນລະຫວ່າງວັນທີ 11 – 13 ກໍລະກົດ 2018 ທີ່ຜ່ານມານີ້, , ແຂວງສາລະວັນໄດ້ຕ້ອນຮັບ ທ່ານ ນາງ ປານີ ຢາທໍ່ຕູ້ ກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ແຂວງ ສາລະວັນ ໃຫ້ກຽດຕ້ອນຮັບໂດຍທ່ານ ສີສຸວັນ ວົງຈອມສີ ກຳ ມະການສູນກາງພັກ, ເລຂາພັກ – ເຈົ້າແຂວງໆສາລະວັນ ພ້ອມດ້ວຍຄະນະ.
ຈຸດປະສົງຂອງການລົງເຄື່ອນໄຫວຢ້ຽມຢາມແຂວງສາລະວັນຄັ້ງນີ້ ແມ່ນເພື່ອພົບປະໂອ້ລົມ ກັບຄະນະພັກ, ຄະນະປົກຄອງແຂວງ, ພະນັກງານຫຼັກແຫຼ່ງ ອ້ອມຂ້າງແຂວງ ແລະ ເຮັດວຽກຮ່ວມກັບສະພາປະຊາຊົນແຂວງ ເພື່ອຊຸກຍູ້ການດຳເນີນກອງປະຊຸມສະໄໝສາມັນເທື່ອທີ 5, 6 ຂອງແຂວງ, ຮັບຟັງການລາຍງານແຜນພັດທະນາເສດຖະກິດ – ສັງຄົມ ແລະ ແຜນງົບປະມານ 6 ເດືອນຕົ້ນປີ 2018 ເຊິ່ງໃນການພົບປະ ທ່ານ ເລຂາພັກ – ເຈົ້າແຂວງໆສາລະວັນ ກໍໄດ້ລາຍງານ ໂດຍຕີລາຄາວ່າ: ແຂວງສາລະວັນມີຄວາມສະຫງົບໂດຍພື້ນຖານ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ການຈັດເກັບລາຍຮັບເຂົ້າງົບປະມານບັນລຸ 45,15% ຂອງແຜນການປີ, ການກໍ່ສ້າງຮາກຖານການເມືອງ ແລະ ພັດທະນາຊົນນະບົດ ກໍໄດ້ຕິດພັນ ກັບການແກ້ໄຂຄວາມທຸກຍາກ ຢ່າງແທ້ຈິງ . ຈາກນັ້ນ, ທ່ານ ນາງ ປານີ ຢາທໍ່ ກໍໄດ້ໃຫ້ກຽດໂອ້ລົມ ເຊິ່ງທ່ານ ກໍໄດ້ຕີລາຄາສູງຕໍ່ການນຳພາຂອງຄະນະພັກ, ອົງການປົກຄອງແຂວງໃນການຈັດຕັ້ງປະຕິບັດແຜນພັດທະນາ, ແຜນງົບປະມານໃນ 6 ເດືອນຕົ້ນປີ ຈົນສາມາດຍາດໄດ້ຜົນສຳເລັດໃນເບື້ອງຕົ້ນ ເຖິງວ່າບໍໍ່ໄດ້ 100% ແຕ່ກໍຈະເປັນພື້ນຖານໃຫ້ແກ່ການສືບຕໍ່ຜັນຂະຫຍາຍໃນ 6 ເດືອນທ້າຍປີໃຫ້ສຳເລັດຕາມແຜນ ແລະ ເນັ້ນໜັກໃຫ້ເອົາໃຈໃນ 3 ບັນຫາດັ່ງນີ້:
- ຕ້ອງກວດກາຄືນບັນດາຄາດໝາຍທີ່ສະພາຮັບຮອງ ໂດຍສະເພະປະຕິບັດໄດ້ແລ້ວເທົ່າໃດ? ແລະ ຍັງຫຼາຍປານໃດທີ່ຈະຕ້ອງສືບຕໍ່ປະຕິບັດ, ເພື່ອເບິ່ງວ່າແຜນທີ່ວາງຂຶ້ນມານັ້ນແທດຕົວຈິງຫຼືບໍ່? ແລະ ຕ້ອງປະຕິບັດນັບແຕ່ຂັ້ນບ້ານຂຶ້ນມາ. ການລາຍງານ ກໍຕ້ອງໄດ້ລາຍງານໄປຕາມມະຕິ, ບໍ່ໃຫ້ລາຍງານແບບລວມໆ.
- ຕ້ອງໄດ້ມີມາດຕະການ, ມີນະໂຍບາຍຢ່າງຊັດເຈນ ເພື່ອສູ້ຊົນປະຕິບັດແຜນ 6 ເດືອນທ້າຍປີ2018 ໃຫ້ສຳເລັດ.
- ຕ້ອງເພີ່ມທະວີກົນໄກການປະສານລະຫວ່າງ 3 ອົງການອຳນາດລັດ ຢູ່ຂັ້ນທ້ອງຖິ່ນ ໃຫ້ມີຄວາມກົມກຽວ, ເປັນເອກະພາບໃນການຈັດຕັງປະຕິບັດມະຕິ IX, ມະຕິ VIII ແລະ ມະຕິຂອງສະພາປະຊາຊົນແຂວງໃຫ້ບັນລຸຕາມຄາດໝາຍ.
ນອກຈາກພົບປະໂອ້ລົມພະນັກງານຂັ້ນແຂວງແລ້ວ, ທ່ານ ນາງ ປານີ ຢາທໍ່ຕູ້ຍັງໄດ້ພົບປະໂອ້ລົມຄະນະພັກ, ຄະນະປົກຄອງ, ພະນັກງານຫຼັກແຫຼ່ງ ຂອງເມືອງສາລະວັນ; ລົງເຄື່ອນໄຫວຢ້ຽມຊົມດ່ານສາກົນລະໄລ ເມືອງສະໝ້ວຍ ແລະ ຢ້ຽມຊົມຖໍ້າພວງ ເມືອງລະຄອນເພັງຕື່ມອີກ.
