ແຂວງສາລະວັນດຳເນີນກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 10 ສະໄໝທີ VII

ກອງປະຊຸມ​ຄົບ​ຄະນະ​ບໍລິຫານ​ງານ​ພັກ​ແຂວງຄັ້ງ​ທີ 10 ສະ​​ໄໝ​ທີ VII​ ໄດ້​ດຳ​ເນີນ​ຂຶ້ນ​​ແຕ່​ວັນ​ທີ 23-24/12/ 2014​ໂດຍພາຍ​​ໃຕ້ການ​ເປັນ​ປະທານ​ຂອງ ສະຫາຍ ຄຳ​ບຸ່ນ​ ດ້ວງ ປັນຍາ ກໍາມະການ​ສູນ​ກາງ​ພັກ, ​ເລຂາ​ພັກ​ແຂວງ-​ເຈົ້າ​ແຂວງໆ​ສາລະ​ວັນ.​ ເຊິ່ງມີບັນດາສະຫາຍຄະນະປະຈໍາພັກແຂວງ, ກໍາມະການພັກແຂວງ, ເລຂາພັກ-ເຈົ້າເມືອງ, ສະມາຊິກສະພາແຫ່ງຊາດເຂດ 14, ຫົວ ໜ້າພະແນກການ, ອົງການທຽບເທົ່າອ້ອມຂ້າງແຂວງ​, ບໍລິສັດ-ລັດວິສາຫະກິດເຂົ້າຮ່ວມທັງໝົດ 54 ສະຫາຍ, ຍິງ 3 ສະຫາຍ.ກອງ​ປະຊຸມ​​​ໄດ້ປຶກສາ​ຫາລື​ກັນຫຼາຍບັນຫາ ​ແລະ ມີຄວາມເປັນເອກະພາບກັນວ່າ: ການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກທົ່ວແຂວງ ມີຫຼາຍດ້ານໄດ້ມີຄວາມເອົາໃຈໃສ່ຈັດຕັ້ງປະຕິບັດຜັນຂະຫຍາຍຢ່າງມີຜົນສຳເລັດ. ອັນ ສຳຄັນແມ່ນໄດ້ເຮັດໃຫ້ການດຳເນີນກອງປະຊຸມໃຫຍ່ແຕ່ລະໜ່ວຍພັກ ແລະ ອົງຄະນະພັກສຳເລັດກວມຫຼາຍກວ່າເຄິ່ງ ໜຶ່ງຂອງອົງຄະນະພັກເມືອງທົ່ວແຂວງ, ການເລືອກຕັ້ງອົງຄະນະພັກແຕ່ລະໜ່ວຍກໍ່ຮັບປະກັນໄດ້ຄວາມສາມັກຄີ, ລັກສະນະສືບທອດ, ເພດ, ເຜົ່າ, ຄວາມໜຸ່ມແໜ້ນ ເພື່ອຊີ້ນຳໆພາແຕ່ລະຂົງເຂດວຽກງານ. ທັງເລືອກໄດ້ບຸກຄະລາກອນ ເພື່ອກະກຽມເຂົ້າໃນໂຄງປະກອບອົງຄະນະພັກຊຸດໃໝ່ຢູ່ໃນແຕ່ໜ່ວຍ, ແຕ່ອົງຄະນະພັກເມືອງ ແລະ ຂັ້ນແຂວງທີ່ຈະດຳເນີນຂຶ້ນໃນຕໍ່ໜ້າ. ພ້ອມນັ້ນ; ຍັງໄດ້ເຮັດໃຫ້ອັດຕາສ່ວນການຫັນເປັນໜຸ່ມເພີ່ມຂຶ້ນຢ່າງຕໍ່ເນື່ອງ, ວຽກງານກໍ່ສ້າງຮາກຖານການເມືອງ – ພັດທະນາຊົນນະບົດ ແລະ ວຽກງານສາມສ້າງ ກໍ່ເຫັນວ່າໄດ້ມີຜົນສຳເລັດເປັນຢ່າງດີ ເຮັດໃຫ້ 4 ເນື້ອໃນ 4 ຄາດໝາຍ ໄດ້ຮັບການຈັດຕັ້ງດີຂຶ້ນກວ່າເກົ່າ ເປັນຕົ້ນ: ວຽກງານການເມືອງ – ນຳພາແນວຄິດ ໄດ້ຈັດຕັ້ງເຜີຍແຜ່ເຊື່ອມຊຶມເອກະສານສຳຄັນຕ່າງໆຂອງພັກ – ລັດ ແລະ ກົດໝາຍ ໃຫ້ປະຊາຊົນບັນດາເຜົ່າເຂດຊົນນະ ບົດຫ່າງໄກສອກຫຼີ້ກກວມ 95%. ຜ່ານການປະຕິບັດເຮັດໃຫ້ສະຕິການເມືອງ ແລະ ສະຕິປ້ອງກັນຊາດ – ປ້ອງກັນຄວາມສະຫງົບຢູ່ຮາກຖານບ້ານມີຄວາມໜັກແໜ້ນກວ່າເກົ່າ. ດ້ານເສດຖະກິດ ແລະ ແກ້ໄຂຄວາມທຸກຍາກ ກໍ່ໄດ້ມີການແກ້ໄຂເຮັດໃຫ້ເສດຖະກິດຂະຫຍາຍຕົວດີ, ຄອບຄົວ ແລະ ບ້ານທຸກຍາກໄດ້ຫຼຸດລົງ. ການປ້ອງກັນຊາດ – ປ້ອງກັນຄວາມສະຫງົບ ​ໂດຍ​ພຶ້ນຖານ​ແມ່ນ​ມີ​ຄວາມ​ສະຫງົບ ທົ່ວ​ສັງຄົມ​ເປັນ​ລະບຽບຮຽບຮ້ອຍ. ດ້ານວັດທະນະທຳ – ສັງຄົມ ໄດ້ມີການພັດທະນາບັນລຸຕາມຄາດໝາຍທີ່ວາງໄວ້ລະບົບການເມືອງ ປະຊາທິປະໄຕ ປະຊາຊົນ ຂັ້ນຮາກຖານໄດ້ຮັບການປັບປຸງໃຫ້​ເຂັ້ມແຂງກວ່າເກົ່າ.
ຈາກ​ນັ້ນ, ກອງ​ປະຊຸມ​ຍັງ​ຮຽກຮ້ອງ​ໃຫ້​ບັນດາ​ສະຫາຍຄະນະ​ປະຈຳ​ພັກ​ແຂວງ, ກຳມະການ​ພັກ​ແຂວງ, ເລຂາພັກ​ເມືອງ, ສະມາຊິກສະພາແຫ່ງຊາດປະຈໍາເຂດ 14, ຫົວໜ້າ​ພະ​ແນ​ກ, ໜ່ວຍພັກຮາກຖານ, ອົງການ​ທຽບ​ເທົ່າ​ອ້ອມ​ຂ້າງ​ແຂວງ. ຈົ່ງ​ພ້ອມ​ກັນ​ຈັດ​ຕັ້ງ​ຊີ້​ນຳໆພາ, ​​ນຳ​ເອົາ​ເນື້ອ​ໃນ​ຈິດ​ໃຈ​ມະຕິ​​ຂອງ​ກອງ​ປະຊຸມຄັ້ງ​ນີ້ ​ໄປຈັດຕັ້ງ​ເຊື່ອມ​ຊຶມ ​ແລະ​​ຜັນ​ຂະຫຍາຍ​ໃຫ້​ເກີດ​ຜົນ​ຕາມ​ຂອບເຂດ​ສິດ – ໜ້າ​ທີ່​ຂອງ​ຕົນໃຫ້ເກີດຜົນສຳເລັດ​ເປັນ​ຢ່າງ​ດີ.