ເມືອງເລົ່າງາມ ແຂວງສາລະວັນ ສຳເລັດກອງປະຊຸມໃຫຍ່ ຂອງອົງຄະນະພັກເມືອງຄັ້ງທີ XI

ລະຫວ່າງ​ວັນ​ທີ 30-31 ທັນວາ 2014 ຜ່ານ​ມາ​ນີ້ ​ເມືອງ​​ເລົ່າ​ງາມ ​ໄດ້ດຳ​ເນີນ​​ກອງ​ປະ​ຊຸມ​ໃຫຍ່ຂອງ​ຜູ້​ແທນອົງຄະ​ນະ​ພັກ​ເມືອງ​ຂອງ​ຕົນ​ຂື້ນຢ່າງ​ເປັນ​ທາງ​ການ ​ພາຍ​ໃຕ້​ການ​ເປັນ​ປະທານ​ຂອງ ສະຫາຍ ສີ​ສຸວັນ ວົງ​ຈອມ​ສີ ກຳມະການ​ປະຈຳ​ພັກ​ແຂວງ-ຮອງ​ເຈົ້າ​ແຂວງໆສາລະ​ວັນ, ສະຫາຍ ນາງ ສູນ​ທອນ ​ແກ້ວ​ບົວລະພາ ກຳມະການ​ພັກ​ແຂວງ, ​ເລຂາ​ພັກ​ເມືອງ-​ເຈົ້າ​ເມືອງ​ເລົ່າງາມ; ​ບັນດາສະຫາຍ​ ຄະນະ​ປະຈຳ​ພັກ​ເມືອ​ງ, ຜູ້​ແທນ​ສົມບູນ 160 ສະຫາຍ, ຍິງ 15 ສະຫາຍ ​ແລະ ​ແຂກ​ທີ່​ຖືກ​ເຊີນ​ທັງ​ຂັ້ນ​ເມືອງ, ຂັ້ນ​ແຂວງ​ ແລະ ຈາກເມືອງຂອງແຂວງໃກ້ຄຽງ ພ້ອມ​ດ້ວຍ​ພະນັກງານ​ບໍານານປະຕິວັດ​ອາວຸ​ໂສເຂົ້າ​ຮ່ວມ​ເປັນ​ຈຳນວນຫຼວງຫຼາຍ.ສະຫາຍ ນາງ ສູນ​ທອນ ​ແກ້ວ​ບົວລະພາ ​ໄດ້​ຂຶ້ນ​ຜ່ານ​ບົດ​ລາຍ​ງານ​ການ​ເມືອງຂອງ​ຄະ​ນະ​ບໍລິຫານ​ງານ​ພັກ​ເມືອງໃນ 5 ປີຜ່ານ​ມາ. ​ເຊິ່ງ​ອົງຄະ​ນະ​ພັກ​ເມືອງ​​ເລົ່າ​ງາມກໍ່ໄດ້​ ຜັນ​ຂະຫຍາຍ ​ແລະ​ ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ຄັ້ງ​ທີ X ​ໄດ້​ຮັບ​ຜົນສຳ​ເລັດຫຼາຍດ້ານ ​ເປັນ​ຕົ້ນ​: ແມ່ນ​​ໄດ້​ເພີ່ມ​ທະວີ​ບົດບາດ​ການ​ນຳພາ​ຂອງ​ພັກ​ຕໍ່ວຽກງານ​ປ້ອງ ​ກັນຊາ​ດ-ປ້ອງ​ກັນ​ຄວາມ​ສະຫງົບຢ່າງ​ຕັ້ງໜ້າເຊິ່ງ​ເຮັດ​ໃຫ້​ທົ່ວ​ເມືອງ​ມີ​ຄວາມ​ສະຫງົບ – ​ເປັນ​ລະບຽບຮຽບຮ້ອຍ​ດີ; ​ຖື​ເອົາ​ການ​ພັດທະນາ​ເສດຖະກິດ​ເປັນ​ໃຈກາງ ​ໂດຍ​ສຸມ​ໃສ່​ ການ​ຜະລິດ​ເປັນ​ສິນຄ້າ,​​ ເຮັດໃຫ້​ເສດຖະກິດ​ຂະ​ຫຍາ​ຍ ຕົວ​ຕໍ່​ເນຶ່ອງ-ໝັ້ນທ່ຽງໃນລະດັບ12,5% ຕໍ່​ປີ, ລາຍ​ຮັບ​ສະ​ເລ່ຍ 1.200 ​ໂດ​ລາ​ສະຫະລັດ/​ຄົນ​/ປີ ເຊິ່ງສາມາດແກ້​ ໄຂ​ຄວາມທຸກ​ຍາກ​ຂອງ​ປະຊາຊົນ ເຮັດໃຫ້ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາ ຊົນບັນດາເຜົ່າ ໄດ້ຮັບການປັບປຸງດີຂຶ້ນເປັນກ້າວໆ; ວຽກງານ​ວັດທະນະ ທຳ​-ສັງຄົມ ກໍ່ໄດ້ສຶບຕໍ່ພັດທະນາໄປຄວບຄູ່ກັບການພັດທະນາເສດຖະກິດ ໂດຍ​ໄດ້​ເອົາ​ໃຈ​ໃສ່​ພັດທະນາ​ຊັບພະຍາກອນ​ມະນຸດ ດ້ວຍ​ການ​ຂະຫຍາຍ​ຕາໜ່າງການ​ສຶກສາ​ ນັບແຕ່ ອະນຸບານຈົນຮອດມັດທະຍົມປາຍລົງສູ່ຊົນນະບົດ​ເຂດ​ຫ່າງ​ໄກ​ສອກ ຫຼີກຢ່າງທົ່ວເຖິງ, ສາມາດ​​ແກ້​ໄຂ​ສະພາບ​​ຂາດ​ຄູສອນ,​ ຫ້ອງ​ຮຽນ ​ແລະ​ອຸປະ​ກອນ​ການຮຽນ​ ​ແລະໄດ້ຍົກ​ ສູງ​ຄຸນ​ນະພາ​ບການ​ຮຽນ-ການສອນ​ດີ​ຂຶ້ນ​ເປັນ​ລະດັບ; ​ໄດ້​ຂະຫຍາຍ​ຕາໜ່າງສາທາລະນະ​ສຸກ​ ລົງ​ສູ່​ຊົນນະ ບົດ 100% ຂອງ​ຈຳນວນ​ກຸ່ມ​ບ້ານ ເຮັດໃຫ້ຄຸນນະພາບການບໍ ລິການ-ການປ້ອງ ກັນ-ການຄວບ ຄຸມ ແລະ ການປິ່ນປົວພະຍາດໄດ້ຢ່າງວ່ອງໄວທັນກັບສະພາບການ. ອັດຕາການຊົມໃຊ້ນ້ຳສະອາດກວມ 95%, ອັດຕາ​ການ​ຕາຍ​ຂອງ ​ແມ່ ​ແລະ​ເດັກຫຼຸດລົງ ເຫຼືອພຽງ 2,43/1.000 ຄົນ, ອາຍຸ​ຍືນ​ສະ​ເລ່ຍ​ເພີ່ມ​ຂຶ້ນ​ເປັນ 68 ປີ ​ແລະ​ກໍ່​ໄດ້​ເອົາ​ໃຈ​ໃສ່ຍົກສູງຄຸນນະພາບ ແລະ ກໍ່ສ້າງພັກໃຫ້ມີຄວາມໜັກ ແໜ້ນ ເຂັ້ມແຂງທາງດ້ານການເມືອງ-ແນວຄິດ ແລະ ການຈັດຕັ້ງ, ປັບປຸງແບບແຜນວິທີນຳພາ ແລະ ວິທີເຮັດວຽກຂອງຄະນະພັກ ໃຫ້ສອດຄ່ອງກັບແນວທາງ ແລະ ຫຼັກ ການຂອງພັກ. ການກໍ່ສ້າງ ແລະ ຂະຫຍາຍພັກແມ່ນຕິດພັນກັບຂະບວນການມະຫາຊົນ ເພື່ອຮັບປະກັນທາງດ້ານປະລິມານ ແລະ ຄຸນນະພາບ. ນອກຈາກນີ້ກໍ່ຍັງໄດ້ເອົາ ໃຈໃສ່ຄຸ້ມຄອງ ແລະກໍ່ສ້າງພະນັກງານສະມາຊິກພັກທາງດ້ານທິດສະດີ, ພຶດຕິກຳໄປຄຽງຄູ່ກັບການປະຕິບັດໜ້າທີ່ວິຊາສະເພາະດ້ວຍ ການຈັດ​ສົ່ງ​ພະນັກງານ​ໄປ​ຍົກ​ລະດັບ​​ຢູ່ ພາຍ​ໃນ ​ແລະ​ ຕ່າງປະ​ເທດຢ່າງ​ເປັນ​ລະບົບ ​ແລະ​ ຕໍ່​ເນື່ອງ.

ກອງ​ປະຊຸມ​ໄດ້​ປ່ອນ​ບັດ​ເລືອກ​ຕັ້ງ​ເອົາຄະນະບໍລິຫານງານ​ພັກ​ເມືອງ​ຊຸດ​ໃໝ່ ​ເຊິ່ງມີ​ຜູ້​ເຂົ້າ​ສະໝັກ​ເລືອກ​ຕັ້ງ​ທັງໝົດ 29 ສະຫາຍ, ຍິງ 7 ສະຫາຍ; ຜ່ານ​ການ​ປ່ອນ​ບັດ​ ເລືອກ​ຕັ້ງສາ​ມາດ​ເລືອກ​ຄະນະ​ບໍລິຫານ​ງານ​ພັກ​ເມືອງ​ຊຸດ​ໃໝ່​ໄດ້ 25 ສະຫາຍ, ຍິງ 5 ສະຫາຍ; ​ເຊິ່ງ​ແມ່ນ​ສະຫາຍນາງສູນທອນແກ້ວບົວລະພາ​ເປັນ​ເລາ​ຂາ​ຄະນະ​ບໍລິ ຫານ​ງານ​ພັກ​ເມືອງຄັ້ງ​ທີ XI, ສະຫາຍຄຳ​ຜ່ານມາດ​ອິນ​ສຸກຮອງ​ເລຂາ-ປະທານ​ກວດກາ​ເມືອງ, ສະຫາຍ ນາງ ຄຳຜຸຍ ໄຊຍະແສງ ຮອງ​ເລຂາ​ພັກ​ເມືອງ, ຄະນະ​ປະ ຈຳ​ພັກ​ເມືອງ 4 ສະຫາຍ ​ແລະ​ກຳມະການ​ພັກ​ເມືອງ 18 ສະຫາຍ. ຈາກ​ນັ້ນ, ​ກອງ​ປະຊຸມ​ກໍ່​ຍັງ​ໄດ້​ປ່ອນ​ບັດ​ເລືອກ​ຕັ້ງ​ເອົາຜູ້​ແທນ​ສົມບູນຈຳນວນ 20 ສະຫາຍ, ຍິງ 2 ສະຫາຍ ​ແລະ​ສຳຮອງ 8 ສະຫາຍ, ຍິງ 2 ສະຫາຍ ເພື່ອ​ເຂົ້າ​ຮ່ວມ​ກອງ​ປະຊຸມ​ໃຫຍ່​ຂອງ​ອົງຄະ​ນະ​ພັກ​ແຂວງສາລະ​ວັນ​ຄັ້ງ​ທີ VIII ນຳ​ອີກ.

ຕອນ​ທ້າຍ, ກອງ​ປະຊຸມ​ຍັງ​ໄດ້​ຮັບ​ຟັງ​ຄຳ​ເຫັນ​ໂອ້​ລົມຈາກ ສະຫາຍ ສີ​ສຸວັນ ວົງ​ຈອມ​ສີ ກຳມະການ​ປະຈຳ​ພັກ​ແຂວງ-ຮອງ​ເຈົ້າ​ແຂວງ ທີ່​ຕາງໜ້າຄະນະ​ປະຈຳພັກ​ແຂວງ​ເຂົ້າ​ ຮ່ວມ​ກອງ​ປະຊຸມ​ຄັ້ງ​ນີ້. ​ເຊິ່ງສະຫາຍກໍ່​ໄດ້​ຕີ​ລາຄາ​ສູງ​ເຖິງ​ການຈັດ​ຕັ້ງ​ປະຕິບັດໜ້າທີ່​ວຽກງານ​ ຂອງ​ອົງຄະ​ນະ​ບໍລິຫານ​ງານ​ພັກ​ເມືອງ​ຊຸດ​ເກົ່າ (ຊຸດ​ທີ X) ​ແລະ​ຊີ້​ທິດ​ເຍືອງ​ ທາງ​ໃຫ້​ຄະ​ນະ​ບໍລິຫານ​ງານ​ພັກເມືອງຊຸດ​ໃໝ່ (ຊຸດ​ທີ XI) ​ເພື່ອ​ນຳ​ໄປ​ຈັດ​ຕັ້ງ​ປະຕິບັດ​ ​ແລະເຜີຍ​ແຜ່​ມະຕິ​ຂອງ​ກອງ​ປະຊຸມ​ໃຫຍ່ຄັ້ງ​ນີ້​ໃຫ້​ເປັນ​ແຜນ​ງານ-​ໂຄງການ​ລະອຽດ, ​ໃຫ້​ມີ​ຜົນສຳ​ເລັດ​ຕາມ​ລະດັບ​ຄາດໝາຍທີ່​ວາງ​ໄວ້.

ເມືອງເລົ່າງາມ ​ເປັນ​ເມືອງ​ທີ 7 ​ຂອງ​ແຂວງ​ສາລະ​ວັນທີ່​ໄດ້​ສຳ​ເລັດ​ການ​ດຳ​ເນີນ​ກອງ​ປະຊຸມ​ໃຫຍ່​ຜູ້​ແທນ​ອົງຄະ​ນະ​ພັກ​ເມືອງ, ຄາດ​ວ່າ​ກອງ​ປະຊຸມ​ໃຫຍ່​ຂອງເມືອງ​ສາລະ​ວັນ ​ເຊິ່ງ​ເປັນ​ເມືອງ​ເທດສະບານແລະເປັນເມືອງ ສຸດ​ທ້າຍ​ຂອງ​ແຂວງຈະ​​ໃຫ້​ສຳ​ເລັດ​ພາຍ​ໃນ​ເດືອນມັງກອນ 2015 ນີ້./