ເມືອງເລົ່າງາມໄຂບັ້ນດຳເນີນຊີວິດການເມືອງປົວແປງພັກ

ບັ້ນດຳເນີນຊີວິດການເມືອງປົວແປງພັກຂອງອົງຄະນະພັກເມືອງເລົ່າງາມ ແຂວງສາລະວັນ ໄດ້ໄຂຂຶ້ນໃນວັນທີ 27 ມີຖຸນານີ້ ຢູ່ສະໂມສອນໃຫຍ່ເມືອງ, ໂດຍໃຫ້ກຽດເປັນປະທານຂອງ ສະຫາຍ ນາງ ສູນທອນ ແກ້ວບົວລະພາ ກຳມະການພັກແຂວງ ເລຂາພັກ ເຈົ້າເມືອງໆເລົ່າງາມ, ໃຫ້ກຽດເຂົ້າຮ່ວມຂອງ ສະຫາຍ ພູທົງ ຄຳມະນີວົງ ຄະນະປະຈຳພັກແຂວງ ຮອງເຈົ້າແຂວງໆສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ມີບັນດາຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫ້ອງການອ້ອມຂ້າງເມືອງເຂົ້າຮ່ວມ.
ບັ້ນດຳເນີນຊີວິດການເມືອງປັບປຸງປົວແປງພາຍໃນອົງຄະນະພັກເມືອງເລົ່າງາມຄັ້ງນີ້ຜູ້ເຂົ້າຮ່ວມໄດ້ເຊື່ອມຊືມເອກະສານຕ່າງໆທີ່ສຳຄັນຂອງພັກເປັນຕົ້ນ: ເອກະສານເດັດດ່ຽວໃນການປັບປຸງປົວແປງພັກໃຫ້ປອດໃສ, ເຂັ້ມແຂງ, ໜັກແໜ້ນ, ຄຳສັ່ງແນະນຳເພີ່ມເຕີມຂອງຄະນະເລຂາທິການສູນກາງພັກ, ເອກະສານຄຸນທາດການເມືອງ, ຄຸນສົມບັດສິນທຳປະຕິວັດ, ເອກະສານປັບປຸງແບບແຜນວິທີເຮັດວຽກ ຍົກສູງຄວາມສາມາດການນຳພາຂອງຄະນະພັກ ແລະເພີ່ມຄວາມສັກສິດຂອງການບໍລິຫານລັດ, ເອກະສານຂໍ້ກຳນົດວ່າດ້ວຍຄວາມຮັບຜິດຊອບຂອງພະນັກງານນຳພາ-ຄຸ້ມຄອງ ຕໍ່ການປະຕິບັດໜ້າທີ່ ການເມືອງ, ເອກະສານມາດຖານ ຂອງສະມາຊິກພັກ ແລະ ຂໍ້ກຳນົດວ່າດ້ວຍ ຂໍ້ຫ້າມສຳລັບ ສະມະຊິກພັກ. ບົດສັງເກດຕີລາການນຳພາຮອບດ້ານຂອງອົງຄະນະພັກເມືອງ, ໃນດ້ານຄຸນທາດການເມືອງ, ຄຸນສົມບັດສິນທຳປະຕິວັດຂອງຄະນະພັກ, ແບບແຜນວິທີເຮັດວຽກ, ແບບແຜນການນຳພາລວມ ແລະນຳໃຈຮັບໃຊ້ປະຊາຊົນ, ການເສຍສະຫຼະເພື່ອສ່ວນລວມຂອງສະມາຊິກ-ພະນັກງານຫຼັກແຫຼ່ງຂອງເມືອງ, ເຊື່ອມຊືມເອກະສານການຕ້ານການສໍ້ລາດບັງຫຼວງ ແລະເອກະສານສວຍໃຊ້ໜ້າທີ່ຕຳແໜ່ງເພື່ອຜົນປະໂຫຍດສ່ວນຕົວ. ສຳລັບທົ່ວເມືອງເລົ່າງາມມີໜ່ວຍພັກທັງໝົດ 117 ໜ່ວຍ, ມີສະມາຊິກພັກທັງໝົດ 1.700 ກວ່າສະຫາຍ, ຍິງ 330 ສະຫາຍ. ຊື່ງບັ້ນດຳເນີນຊີວິດການເມືອງປົວແປງພັກເມືອງເລົ່າງາມແມ່ນຈະໄດ້ຈະດໍາເນີນໄປຮອດວັນ 5 ກໍລະກົດ ຈື່ງຈະສໍາເລັດ.

ຂ່າວ: ພອນໄຊ ແກ້ວມະນີ