ເມືອງສາລະວັນ ສຳເລັດກອງປະຊຸມໃຫຍ່ ຂອງອົງຄະນະພັກເມືອງຄັ້ງທີ VIII

ລະຫວ່າງ​ວັນ​ທີ 28-29 ມັງກອນ 2015 ຜ່ານ​ມາ​ນີ້ ​ເມືອງສະລະ​ວັນ ​ໄດ້ດຳ​ເນີນ​​ກອງ​ປະ​ຊຸມ​ໃຫຍ່ ​ຜູ້​ແທນອົງຄະ​ນະ​ພັກ​ເມືອງ​ຂອງ​ຕົນ​ຂື້ນຢ່າງ​ເປັນ​ທາງ​ການ ​ພາຍ​ໃຕ້​ການ​ເປັນ​ປະທານ​ຂອງ ສະຫາຍ ບຸນທຽມ ພົມມະ​ສະຖິດ ກຳມະການ​ປະຈຳ​ພັກ​ແຂວງ, ປະທານ​ຄະນະ​ກຳມະການ​ກວດກາ​ແຂວງ, ປະທານ​ຄະນະ​ສະມາ​ຊິກ​ສະພາ​ແຫ່ງ​ຊາດ​ເຂດ​ເລືອກ​ຕັ້ງ​ທີ 14 ​ແຂວງ​ສາລະ​ວັນ; ສະຫາຍ ພູ​ທົງ​ ຄຳ​ມະນີ​ວົງ ກຳມະການ​ພັກ​ແຂວງ, ວ່າການ​ເລຂາ​ພັກ​ເມືອງ-​ເຈົ້າ​ເມືອງ​​ສາລະ​ວັນ; ​ບັນດາສະຫາຍ​ຄະນະ​ປະຈຳ​ພັກ​ເມືອ​ງ, ຜູ້​ແທນ​ສົມບູນ 123 ສະຫາຍ, ຍິງ 7 ສະຫາຍ ​ແລະ ​ແຂກ​ທີ່​ຖືກ​ເຊີນ​ທັງ​ຂັ້ນ​ເມືອງ, ຂັ້ນ​ແຂວງ​ ແລະຈາກເມືອງຂອງແຂວງໃກ້ຄຽງ ພ້ອມ​ດ້ວຍ​ພະນັກງານ​ບໍານານປະຕິວັດ​ອາວຸ​ໂສເຂົ້າ​ຮ່ວມ​ເປັນ​ຈຳນວນຫຼວງຫຼາຍ. ສະຫາຍ ພູ​ທົງ ຄຳ​ມະນີ​ວົງ ​ໄດ້​ຂຶ້ນ​ຜ່ານ​ບົດ​ລາຍ​ງານ​ການ​ເມືອງ ຂອງ​ຄະ​ນະ​ບໍລິຫານ​ງານ​ພັກ​ເມືອງໃນ​ໄລຍະ 5 ປີຜ່ານ​ມາ. ​ເຊິ່ງ​ອົງຄະ​ນະ​ພັກ​ເມືອງ​​ສາລະ​ວັນ ກໍ່ໄດ້​ຜັນ​ຂະຫຍາຍ ​ແລະ​ ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ VII ​ໄດ້​ຮັບ​ຜົນສຳ​ເລັດຫຼາຍດ້ານ ​ເປັນ​ຕົ້ນ​: ແມ່ນ​​ຄະນະ​ພັກ ​ແລະ​ອຳນາດ​ການ​ປົກຄອງ​​ແຕ່ລະ​ຂັ້ນ​ໄດ້​ເອົາ​ໃຈ​ໃສ່​ສຶກສາ​ອົບຮົມ​ການ​ເມືອງ​ແນວ​ຄິດ​ໃຫ້​ແຕ່​ລະ​ຊັ້ນ​ຄົນ​ມີ​ຄວາມ​ຮັບ​ຮູ້ ​ແລະ ​ເຂົ້າ​ໃຈ​ຕໍ່​ແນວທາງ​ປ້ອງ​ກັນຊາ​ດ – ປ້ອງ​ກັນ​ຄວາມ​ສະຫງົບ​ທົ່ວ​ປວງ​ຊົນ​ຮອບດ້ານ ເຊິ່ງ​ເຮັດ​ໃຫ້​ທົ່ວ​ເມືອງ​ມີ​ຄວາມ​ສະຫງົບ, ປອດ​ໄພ ​ແລະເປັນ​ລະບຽບຮຽບຮ້ອຍ​ດີ; ສຸມ​ໃສ່​ການ​ພັດທະນາ​ເສດຖະກິດ​ຂອງ​ເມືອງ​ໃນຫຼາຍ​ໂຄງການ​ທີ່​ເປັນ​ບູລິ​ມະ​ສິດ, ​ເອົາ​ໃຈ​ໃສ່ຊຸ​ກຍູ້ສົ່ງ​ເສີມ​ເສດຖະກິດ​ຄອບຄົວ ຈາກ​ການ​ຜະລິດ​ນ້ອຍ​ກະ​ແຈກ​ກະຈາຍ​ໃຫ້​ກາຍ​ເປັນ​ເສດຖະກິດ​ສິນຄ້າ​ຕາມ​ກົນ​ໄກ​ເສດຖະກິດ​ຕະຫຼາດທີ່​ມີ​ການ​ນຳພາ​ຂອງ​ພັກ-ຄຸ້ມ​ຄອງ​ຂອງ​ລັດ ​ເຊິ່ງເຮັດໃຫ້​ເສດຖະກິດ​ຂະ​ຫຍາ​ຍຕົວ​ຕໍ່​ເນຶ່ອງ-ໝັ້ນທ່ຽງ ໃນລະດັບ 10,2% ຕໍ່​ປີ, ລວມຍອດ​ຜະລິດ​ຕະພັນ​ບັນລຸ​ໄດ້ 888,9 ຕື້​ກີບ, ລາຍ​ຮັບ​ສະ​ເລ່ຍຈາກ 7.101.282 ກີບ ​ເທົ່າ​ກັບ 825 ​ໂດ​ລາ ປີ 2010 ​ເພີ່ມ​ຂຶ້ນ​ມາ​ເປັນ 8.800.573 ກີບ ​ເທົ່າ​ກັບ 1.100 ​ໂດ​ລາ​ຕໍ່​ຄົນ​ຕໍ່​ປີ. ເຊິ່ງສາມາດແກ້​ໄຂ​ຄວາມທຸກ​ຍາກ​ຂອງ​ປະຊາຊົນ ເຮັດໃຫ້ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນບັນດາເຜົ່າ ໄດ້ຮັບການປັບປຸງດີຂຶ້ນເປັນກ້າວໆ; ວຽກງານ​ວັດທະນະທຳ​-ສັງຄົມ ກໍ່ໄດ້ສຶບຕໍ່ພັດທະນາໄປຄວບຄູ່ກັບການພັດທະນາເສດຖະກິດ ໂດຍ​ໄດ້​ເອົາ​ໃຈ​ໃສ່​ພັດທະນາ​ຊັບ ພະຍາກອນ​ມະນຸດ ດ້ວຍ​ການ​ຂະຫຍາຍ​ຕາໜ່າງການ​ສຶກສາ​ ນັບແຕ່ອະນຸບານຈົນຮອດມັດທະຍົມປາຍລົງສູ່ຊົນນະບົດ​ເຂດ​ຫ່າງ​ໄກ​ສອກຫຼີກຢ່າງທົ່ວເຖິງ, ສາມາດ​​ແກ້​ໄຂ​ສະພາບ​​ຂາດ​ຄູສອນ,​ ຫ້ອງ​ຮຽນ ​ແລະ​ ອຸປະ​ກອນ​ການຮຽນ​ ​ແລະໄດ້ຍົກ​ສູງ​ຄຸນ​ນະພາ​ບການ​ຮຽນ-ການສອນ​ດີ​ຂຶ້ນ​ເປັນ​ລະດັບສາມາດ​ປະກາດ​ເມືອງ​ສາລະ​ວັນ​ ​ເປັນ​ເມືອງ​ຈົບ​ປະຖົມ​ບຳລຸງ​ໃນ​ປີ 2012; ​ໄດ້​ຂະຫຍາຍ​ຕາໜ່າງສາທາລະນະ​ສຸກ​ລົງ​ສູ່​ຊົນນະບົດ 100% ຂອງ​ຈຳ ນວນ​ກຸ່ມ​ບ້ານ ເຮັດໃຫ້ຄຸນນະພາບການບໍລິການ-ການປ້ອງກັນ-ການຄວບຄຸມ ແລະ ການປິ່ນປົວພະຍາດໄດ້ຢ່າງວ່ອງໄວທັນກັບສະພາບການ. ອັດຕາການຊົມໃຊ້ນ້ຳສະອາດກວມ 94%, ອັດຕາ​ການ​ຕາຍ​ຂອງ​ແມ່ ​ແລະ​ເດັກຫຼຸດລົງ, ອາຍຸ​ຍືນ​ສະ​ເລ່ຍ​ເພີ່ມ​ຂຶ້ນ​ເປັນ 65 ປີ ​ແລະ​ກໍ່​ໄດ້​ເອົາ​ໃຈ​ໃສ່ຍົກສູງຄຸນນະພາບ ແລະ ກໍ່ສ້າງພັກໃຫ້ມີຄວາມໜັກແໜ້ນເຂັ້ມແຂງທາງດ້ານການ ເມືອງ-ແນວຄິດ ແລະ ການຈັດຕັ້ງ, ປັບປຸງແບບແຜນວິທີນຳພາ ແລະ ວິທີເຮັດວຽກຂອງຄະນະພັກ ໃຫ້ສອດຄ່ອງກັບແນວທາງ ແລະ ຫຼັກການຂອງພັກ. ການກໍ່ສ້າງ ແລະ ຂະຫຍາຍພັກ ແມ່ນຕິດພັນກັບຂະບວນການມະຫາຊົນ ເພື່ອຮັບປະກັນທາງດ້ານປະລິມານ ແລະ ຄຸນນະພາບ. ນອກຈາກນີ້ ກໍ່ຍັງໄດ້ເອົາໃຈໃສ່ຄຸ້ມຄອງ ແລະ ກໍ່ສ້າງພະນັກງານສະມາຊິກພັກທາງດ້ານທິດ ສະດີ, ພຶດຕິກຳ ໄປຄຽງຄູ່ກັບການປະຕິບັດໜ້າທີ່ວິຊາສະເພາະ ດ້ວຍການຈັດ​ສົ່ງ​ພະນັກງານ​ໄປ​ຍົກ​ລະດັບ​​ຢູ່ພາຍ​ໃນ ​ແລະ​ ຕ່າງປະ​ເທດຢ່າງ​ເປັນ​ລະບົບ ​ແລະ​ ຕໍ່​ເນື່ອງ ​ເຊິ່ງທົ່ວ​ເມືອງ​ມີ​ພະນັກ ງານ​ທັງໝົດ 1.105 ຄົນ, ຍິງ​ 536 ຄົນ; ​​ໃນ​ນັ້ນ​ປະລິນຍາ​ໂທ 5 ຄົນ, ປະລິນຍາ​ຕີ 94 ຄົນ, ຊັ້ນ​ສູງ 363 ຄົນ, ຊັ້ນ​ກາງ 541 ຄົນ, ຊັ້ນ​ຕົ້ນ 103 ຄົນ.

ກອງ​ປະຊຸມ​ໄດ້​ປ່ອນ​ບັດ​ເລືອກ​ຕັ້ງ​ເອົາຄະນະບໍລິຫານງານ​ພັກ​ເມືອງ​ຊຸດ​ໃໝ່ ​ເຊິ່ງມີ​ຜູ້​ເຂົ້າ​ສະໝັກ​ເລືອກ​ຕັ້ງ​ທັງໝົດ 28 ສະຫາຍ, ຍິງ 3 ສະຫາຍ; ຜ່ານ​ການ​ປ່ອນ​ບັດ​ເລືອກ​ຕັ້ງສາ​ມາດ​ເລືອກ​ຄະນະ​ບໍລິຫານ​ງານ​ພັກ​ເມືອງ​ຊຸດ​ໃໝ່​ໄດ້ 25 ສະ ຫາຍ, ຍິງ 3 ສະຫາຍ; ​ເຊິ່ງ​ແມ່ນ​ສະຫາຍ ພູ​ທົງ ຄຳ​ມະນີ​ວົງ ​ເປັນ​ເລຂາ​ຄະນະ​ບໍລິຫານ​ງານ​ພັກ​ເມືອງຄັ້ງ​ທີ VIII, ສະຫາຍ ບຸນ​ມາກ ພອນ​ທິບ​ສະຫວັດ ຮອງ​ເລຂາ-ປະທານ​ກວດກາ​ເມືອງ, ສະຫາຍ ວັນນະ​ລັກ ຫຼ້າຫຼ່ຽມທະວີ​ໄຊ ຮອງ​ເລຂາ​ພັກ​ເມືອງ, ຄະນະ​ປະຈຳ​ພັກ​ເມືອງ 4 ສະຫາຍ ​ແລະ​ກຳມະການ​ພັກ​ເມືອງ 18 ສະຫາຍ. ຈາກ​ນັ້ນ, ​ກອງ​ປະຊຸມ​ກໍ່​ຍັງ​ໄດ້​ປ່ອນ​ບັດ​ເລືອກ​ຕັ້ງ​ເອົາ ຜູ້​ແທນ​ສົມບູນ ຈຳນວນ 21 ສະຫາຍ, ຍິງ 4 ສະຫາຍ ​ແລະ​ສຳຮອງ 6 ສະຫາຍ, ຍິງ 0 ສະຫາຍ ເພື່ອ​ເຂົ້າ​ຮ່ວມ​ກອງ​ປະຊຸມ​ໃຫຍ່​ຂອງ​ອົງຄະ​ນະ​ພັກ​ແຂວງ ສາລະ​ວັນ​ຄັ້ງ​ທີ VIII ນຳ​ອີກ.

ຕອນ​ທ້າຍ, ກອງ​ປະຊຸມ​ຍັງ​ໄດ້​ຮັບ​ຟັງ​ຄຳ​ເຫັນ​ໂອ້​ລົມຈາກ ສະຫາຍ ບຸນທຽມ ພົມມະ​ສະຖິດ ກຳມະການ​ປະຈຳ​ພັກ​ແຂວງ, ປະທານ​ຄະນະ​ກຳມະການ​ກວດກາ​ແຂວງ, ປະທານ​ຄະນະ​ສະມາ​ຊິກ​ສະພາ​ແຫ່ງ​ຊາດ ​ເຂດ​ເລືອກ​ຕັ້ງ​ທີ 14 ​ແຂວງ​ສາລະ​ວັນ ທີ່​ຕາງໜ້າຄະນະ​ປະຈຳພັກ​ແຂວງ​ເຂົ້າ​ຮ່ວມ​ກອງ​ປະຊຸມ​ຄັ້ງ​ນີ້. ​ເຊິ່ງສະຫາຍ ກໍ່​ໄດ້​​ຕີ​ລາຄາ​ສູງ​​ແລະ​ຊົມ​ເຊີຍ​ຜົນສຳ​ເລັດ​ທີ່​ອົງຄະ​ນະ​ບໍລິຫານ​ງານ​ພັກ​ເມືອງ​ຊຸດ​ເກົ່າ (ຊຸດ​ທີ VII) ຍາດ​ມາ​ໄດ້. ນອກຈາກ​ນັ້ນ, ສະຫາຍ​ກໍ່​ຊີ້​ທິດ​ເຍືອງ​ທາງ​ໃຫ້​ຄະ​ນະ​ບໍລິຫານ​ງານ​ພັກເມືອງຊຸດ​ໃໝ່ (ຊຸດ​ທີ VIII) ​ເພື່ອ​ນຳ​ໄປ​ຈັດ​ຕັ້ງ​ປະຕິບັດ​ ​ແລະ ເຜີຍ​ແຜ່​ມະຕິ​ຂອງ​ກອງ​ປະຊຸມ​ໃຫຍ່ຄັ້ງ​ນີ້​ ໃຫ້​ເປັນ​ແຜນ​ງານ-​ໂຄງການ​ລະອຽດ, ​ໃຫ້​ມີ​ຜົນສຳ​ເລັດ​ຕາມ​ລະດັບ​ຄາດໝາຍທີ່​ວາງ​ໄວ້.

ສຳລັບ​ຂັ້ນເມືອງໆສາລະ​ວັນ​ ເປັນ​ເມືອງ​ສຸດ​ທ້າຍ​ຂອງ​ແຂວງ​ ທີ່​ໄດ້​ສຳ​ເລັດ​ການ​ດຳ​ເນີນ​ກອງ​ປະຊຸມ​ໃຫຍ່​ຜູ້​ແທນ​ຂັ້ນ​ຂອງ​ຕົນ, ຄາດ​ວ່າ​ກອງ​ປະຊຸມ​ໃຫຍ່​ຂອງອົງການ​ຈັດ​ຕັ້ງ​ມະຫາຊົນ​ຈະ​ໄດ້​ດຳ​ເນີນ​ຂຶ້ນ​ໃນ​ຕົ້ນ​ເດືອນ ກຸມພາ 2015 ນີ້./