ເຈົ້າແຂວງໆ ສາລະວັນ ຕ້ອນຮັບ ການມາພົບປະ ແລະ ຢ້ຽມຢາມຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງ ອຸດສາຫະກຳ ແລະ ການຄ້າ

ເວລາ 15: 30 ໂມງ ຂອງວັນທີ 8 ກັນຍາ 2015 ທີ່ຜ່ານມານີ້ ຢູ່ທີ່ຫ້ອງ 207 ຫ້ອງຮັບແຂກຂອງຫ້ອງວ່າການປົກຄອງແຂວງ ທ່ານ ສີສຸວັນ ວົງຈອມສີ, ເລຂາພັກແຂວງ, ເຈົ້າແຂວງໆ ສາລະວັນ ໄດ້ໃຫ້ກຽດຕ້ອນຮັບ ທ່ານ ນາງ ເຂັມມະນີ ພົນເສນາ ລັດຖະມົນຕີ ວ່າການກະຊວງ ອຸດສາຫະກຳ ແລະ ການຄ້າ ພ້ອມດ້ວຍຄະນະທິມງານ ທີ່ໄດ້ລົງມາເຄື່ອນໄຫວ ແລະະ ເຮັດວຽກຢູ່ແຂວງ ສາລະວັນ, ເຂົ້າຮ່ວມໂດຍ ຫົວໜ້າ ພະແນກອຸດສາຫະກຳ ແລະ ການຄ້າແຂວງສາລະວັນ. ການພົບປະ ແລະ ຢ້ຽມຢາມຂອງຄະນະທິມງານ ທ່ານ ນາງ ເຂັມມະນີ ພົນເສນາ ລັດຖະມົນຕີ ວ່າການກະຊວງ ອຸດສາຫະກຳ ແລະ ການຄ້າ ໃນຄັ້ງນີ້ ໄດ້ມີຈຸດປະສົງ ຢ້ຽມຢາມຖາມຂ່າວການນຳຂັ້ນແຂວງ ແລະ ຍັງໄດ້ແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ເປັນຕົ້ນ ແມ່ນການປັບປຸງໂຮງງານປຸ່ງແຕ່ງໄມ້ຂະໜາດນ້ອຍ – ໃຫຍ່, ການສົ່ງອອກຂອງສິນຄ້າພາຍໃນ ແລະ ຕ່າງປະເທດ, ການປະຕິບັດສັນຍາສິນຄ້າລະຫວ່າງຊາຍແດນ ແລະ ລົງຊຸກຍູ້ຫຼຸດຜ່ອນຄວາມທຸກຍາກຂອງປະຊາຊົນ.

ຕອນທ້າຍ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆ ສາລະວັນ ກໍໄດ້ສະແດງຄວາມຂອບອົກຂອບໃຈຕໍ່ ທ່ານ ນາງ ເຂັມມະນີ ພົນເສນາ ລັດຖະມົນຕີ ວ່າການກະຊວງ ອຸດສາຫະກຳ ແລະ ການຄ້າ ພ້ອມຄະນະທິມງານ ແລະ ຊົມເຊີຍໃນການລົງມາເຄື່ອນໄຫວ ແລະ ເຮັດວຽກຢູ່ແຂວງ ສາລະວັນ.