ເຈົ້າແຂວງໆ ສາລະວັນ ຕ້ອນຮັບ ການມາຢ້ຽມຢາມຂອງ ທ່ານ ບຸນຣົງ ພົງສະຖຽນ ຫົວໜ້າກົງສູນໃຫຍ່ໄທ, ຣາຊະອານາຈັກໄທ ປະຈຳແຂວງ ສະຫວັນນະເຂດ

ຕອນບ່າຍຂອງ ວັນທີ 26 ສິງຫາ 2015 ເວລາ 13: 45 ໂມງ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆ ສາລະວັນ ໄດ້ໃຫ້ກຽດຕ້ອນຮັບ ທ່ານ ບຸນຣົງ ພົງສະຖຽນ ຫົວໜ້າກົງສູນໃຫຍ່ໄທ, ຣາຊະອານາຈັກໄທ ປະຈຳແຂວງ ສະຫວັນນະເຂດ ພ້ອມດ້ວຍຄະນະ ຢູ່ທີ່ຫ້ອງພິເສດຂອງຫ້ອງວ່າການປົກຄອງແຂວງສາລະວັນ ແລະ ມີແຂກເຂົ້າຮ່ວມຈຳ​ນວນ 8 ທ່ານ, ຍິງ 2 ທ່ານ. ການພົບປະ ແລະ ຢ້ຽມຢາມຖາມຂ່າວຂອງ ທ່ານ ບຸນຣົງ ພົງສະຖຽນ ຫົວໜ້າກົງສູນໃຫຍ່ໄທ, ຣາຊະອານາຈັກໄທ ປະຈຳແຂວງ ສະຫວັນນະເຂດ ພ້ອມດ້ວຍຄະນະ ໃນຄັ້ງນີ້ ມີຈຸດປະສົງ ເພື່ອມາອໍາລາໜ້າທີ່ຕໍາແໜ່ງກ່ອນເຂົ້າຮັບບໍານານ ແລະ ທັງຂໍສະແດງຂອບໃຈຕໍ່ຄະນະການນຳຂັ້ນແຂວງ ສາລະວັນທີ່ໃຫ້ຄວາມຮ່ວມມືການດຳເນີນພາລະກິດໃນການດຳລົງຕຳແໜ່ງຂອງກົງສູນໃຫຍ່ໄທ ສົ່ງຜົນຄວາມສຳພັນອັນດີ ລະຫວ່າງ ຣາຊະອານາຈັກໄທ ແລະ ສາທາລະນະລັດ ປະຊາທິປະໄຕ ປະຊາຊົນລາວ ໃຫ້ໃກ້ສິດ ແລະ ແໜ້ນແຟ້ນຂຶ້ນ; ໂດຍສະເພາະ ສະແດງຄວາມດີອົກດີໃຈມາຍັງ ທ່ານ ເລຂາພັກແຂວງ, ເຈົ້າແຂວງໆ ສາລະວັນ, ນອກຈາກນັ້ນ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆ ສາລະວັນ ກໍຍັງໄດ້ລາຍງານບາງສະພາບ ແລະ ຍັງໄດ້ປຶກສາຫາລືກ່ຽວກັບແຜນພັດທະນາເສດຖະກິດ – ສັງຄົມ ລະຫວ່າງ 2 ປະເທດ ( ລາວ – ໄທ ) ກໍຄື ແຂວງສາລະວັນ ແຫ່ງ ສປປ ລາວ ກັບ ຈັງຫວັດອຸບົນລາດຊະທານີ ຣາຊະອານາຈັກໄທ ເປັນຕົ້ນແມ່ນ ການສ້າງຂົວຂ້າມແມ່ນ້ຳຂອງ, ການພັດທະນາທາງດ້ານການສຶກສາພະສົງ, ວັດທະນະທຳຮີດຄອງປະເພນີ, ຊອກຫາແຫຼ່ງທຶນທີ່ຈະມາລົງທຶນໃນແຂວງ ສາລະວັນ ເຊັ່ນວ່າ: ການສ້າງຕຶກອາຄານໂຮງແຮມ, ການຜະລິດປູກຝັງ – ລ້ຽງສັດ ແລະ ອື່ນໆ ພາຍຫຼັງທີ່ໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນຢ່າງອົບອຸ່ນ ແລະ ເບີກບານມ່ວນຊື່ນແລ້ວ.
ຕອນທ້າຍ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆ ສາລະວັນ ແລະ ທ່ານ ບຸນຣົງ ພົງສະຖຽນ ຫົວໜ້າກົງສູນໃຫຍ່ໄທ, ຣາຊະອານາຈັກໄທ ປະຈຳແຂວງ ສະຫວັນນະເຂດ ທັງສອງທ່ານ ກໍໄດ້ມອບຂອງຂັວນ ເພື່ອເປັນທີ່ລະລຶກເຊິ່ງກັນ ແລະ ກັນ ແລະ ກໍຍັງຂໍສະແດງຄວາມດີອົກດີໃຈມາຍັງ ທ່ານ ບຸນຣົງ ພົງສະຖຽນ ຫົວໜ້າກົງສູນໃຫຍ່ໄທ, ຣາຊະອານາຈັກໄທປະ ຈຳແຂວງ ສະຫວັນນະເຂດ ພ້ອມດ້ວຍຄະນະ, ມາຮອດເວລາ 14: 25 ການພົບປະກໍໄດ້ຊິ້ນສຸດລົງ.