ຮອງເຈົ້າແຂວງສາລະວັນ ຕ້ອນຮັບ ລັດຖະມົນຕີຊ່ວຍວ່າການ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ

ເວລາ 8:3​0 ​ໂມງ ຂອງ​ວັນ​ທີ 16 ມີນາ 2015 ນີ້ ຢູ່​ທີ່​ຫ້ອງ​ຮັບຮອງ (207) ຫ້ອງ​ວ່າການ​ປົກຄອງ​ແຂວງ​ ສາລະ​ວັນ ທ່ານ ສີ​ເຮັງ ຫອມ​ສົມບັດ ກຳມະການ​ປະຈຳ​ພັກ​ແຂວງ, ຮອງ​ເຈົ້າ​ແຂວງໆສາລະ​ວັນ (ຜູ້​ຊີ້​ນຳ​ວຽກງານ​ຂົງ​ເຂດ​ເສດຖະກິດ) ພ້ອມ​ດ້ວຍ​ຫົວໜ້າພະ​ແນ​ກ, ຮອງ​ພະ​ແນ​ກ ທີ່​ກ່ຽວຂ້ອງ​ຂອງ​ແຂວງ ​ໃຫ້ກຽດຕ້ອນຮັບການ​ລົງ​ມາ​ເຄື່ອນ​ໄຫວ ​ແລະ​ ​ເຮັດ​ວຽກຂອງ ທ່ານ ຈັນ​ສອນ ​ແສນ​ບຸດຕະລາດ ລັດຖະມົນຕີ​ຊ່ວຍ​ວ່າການ ກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ພ້ອມ​ດ້ວຍ​ຄະນະ. ການ​ເຂົ້າ​ພົບ​ຄະນະ​ນຳ​ຂອງ​ແຂວງ​ສາລະ​ວັນ​ ຂອງທ່ານ ລັດຖະມົນຕີ​ຊ່ວຍ​ວ່າການ ກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ​ໃນ​ຄັ້ງ​ນີ້ ​ແມ່ນ​ເພື່ອ​ແຈ້ງ​ຈຸດປະສົງ ​ແລະ ​ເປົ້າໝາຍ ຂອງ​ການ​ລົງ​ມາ​ເຮັດ​ວຽກຢູ່​ແຂວງ​ສາລະ​ວັນ ​ແລະຮ່ວມ​ປຶກສາ​ຫາລື​ກ່ຽວກັບ​ການ​ສຳ​ປະທານ​ຊອກ​ຄົ້ນ, ສຳຫຼວດຖ່ານ​ຫີນຂອງ​ ບໍລິສັດ ຊີ​ເພັກ​ໂມ​ເນຍລາວ ຈຳກັດ ​ແລະ ບໍລິສັດ ຈຸ​ງຢາ​ອິຊິ ຊີມັງ​ລາວ ຈຳກັດ ຢູ່​ເຂດ​ບ້ານ​ກະ​ຕາວ ​ເມືອງ​ຕຸ້ມ​ລານ ​ແລະ​ ເຂດ​ບ້ານ​ສອຍ​ທົ່ງ ​ເມືອງ​ຕະ​ໂອ້​ຍ.