ອົງຄະນະພັກເມືອງເລົ່າງາມສຳເລັດກອງປະຊຸມເຄິ່ງສະໄໝທີ XI.

ໃນ​ລະຫວ່າງ​ວັນ​ທີ 13 – 15 ມີນາ 2018 ທີ່່ຜ່ານມາ. ທີ່ຫ້ອງ​ປະຊຸມຂອງຫ້ອງວ່າການ​ເມືອງ​ເລົ່າງາມ, ອົງຄະນະພັກເມືອງ​ເລົ່າງາມ ໄດ້​ເປີດ​ກອງ​ປະຊຸມ ​ເຄີ່ງ​ສະ​​ໄໝທີ XI ຂອງຕົນ​ຂຶ້ນ ​ ​​​ໂດຍ​ພາຍ​ໄຕ້​ການ​ເປັນ​ປະທານ ຂອງ ທ່ານ ນາງ ສູນທອນ ແກ້ວບົວລະພາ ກໍາມະການ​ພັກ​ແຂວງ, ເລຂາ​ຄະນະ​ບໍລິຫານ​ງານ​ພັກ​ເມືອງ – ​ເຈົ້າ​ເມືອງໆ​ເລົ່າງາມ

​ໃນນາມຄະນະພັກຂັ້ນເທິງໃຫ້ກຽດ​ເຂົ້າ​ຮ່ວມໂດຍ ​ທ່ານ ພູທົງ ຄໍາມະນີວົງ ຄະນະ​ປະຈຳ​ພັກ​ແຂວງ, ຮອງ​ເຈົ້າ​ແຂວງໆ​ສາລະ​ວັນ ຜຸ່ຊີ້ນຳເມືອງເລົ່າງາມ, ມີຄະນະ​ບໍລິຫານງານ​ພັກ​ເມືອງ, ຫົວໜ້າ​ຫ້ອງການ, ​ເລຂາ​ພັກ​ຮາກ​ຖານ, ເລຂາໜ່ວຍພັກບ້ານ ​ແລະ ​ແຂກ​ຖືກ​ເຊີນ​ເຂົ້າ​ຮ່ວມ​ຢ່າງຫຼວງຫລາຍ.

ກອງ​ປະຊຸມ​​ໄດ້ຮັບຟັງການລາຍງານ​ສະພາບ​ການຈັດ​ຕັ້ງ​ປະຕິບັດ​ມະຕິກອງ​ປະຊຸມ​ໃຫຍ່​ຄັ້ງ​ທີ XI ​ຂອງ​ອົງຄະ​ນະ​ພັກ​ເມືອງ​ເລົ່າງາມໃນໄລຍະ 3 ປີຜ່ານມາ​ ທີ່ສະເໜີໂດຍ: ທ່ານ ຄໍາຜ່ານ ມາດອິນສຸກ ຮອງເລຂາພັກເມືອງ – ຮອງເຈົ້າເມືອງໆ ເລົ່າງາມ ທັງເປັນປະທານກວດກາ ເຊິ່ງໄດ້ຕີລາຄາວ່າ: ​ໃນ​ທົ່ວ​ເມືອງ​ຍັງ​ມີ​ຄວາມ​ສະຫງົບ​ໂດຍ​ພື້ນຖານ, ສັງຄົມມີຄວາມ​ເປັນ​ລະບຽບ​ຮຽບຮ້ອຍ​ດີ​,​ ເສດຖະກິດຍັງ​ສືບ​ຕໍ່​ຂະຫຍາຍຕົວ​ຢ່າງ​ຕໍ່​ເນື່ອງ ​ແລະ ໝັ້ນທ່ຽງ, ການຈັດຕັ້ງປະຕິບັດວຽກແຜນງານ, ໂຄງການຕ່າງໆ ກໍມີທ່າອ່ຽງດີຂຶ້ນ, ເຮັດໃຫ້ລວມຍອດຜະລິດຕະພັນພາຍໃນເພີ້ມຂື້ນ, ການເກັບລາຍ​ຮັບ​ເຂົ້າ​ງົບປະມານ​ປະຕິບັດໄດ້ລື້ນຄາດໜາຍທີ່ວາງໄວ້. ນອກນັ້ນ, ກອງປະຊຸມຍັງໄດ້ຮັບຟັງການຜ່ານບົດສໍາຫຼວດການນຳພາລວມຂອງອົງຄະນະພັກເມືອງ, ພ້ອມທັງໄດ້ດຳເນີນການສຳຫຼວດກວດກາຄືນໃນຄະນະບໍລິຫານງານພັກເມືອງ ໂດຍຖືເອົາກໍລະນີໃນບັ້ນປັບປຸງປົວແປງທີ່ຜ່ານມາ ເພື່ອທົບທວນຄືນ ແລະ ແກ້ໄຂໃຫ້ໝົດໄປ.

ໃນ​ຕອນ​ທ້າຍກອງ​ປະຊຸມ​ ທ່ານ ພູທົງ ຄໍາມະນີວົງ ​ຄະນະ​ປະຈຳ​ພັກ​ແຂວງ ຮອງ​ເຈົ້າ​ແຂວງໆ​ສາລະ​ວັນ ໃນ​ນາມ​ຜູ່ຊີ້ນໍາເມືອງ ແລະ ຊື້ນໍາ​ກອງ​ປະຊຸມ ໄດ້ໃຫ້ກຽດໂອ້ລົມ ເຊິ່ງທ່ານກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານ ແລະ ຜົນສໍາເລັດທີ່ຍາດມາໄດ້, ເນັ້ນໃຫ້ຄະນະພັກຕ້ອງເຂັ້ມແຂງ ແລະ ເປັນເອກະພາບກັນພາຍໃນໃຫ້ເປັນປືກແຜນ, ນໍາພາເປັນໜູ່ຄະນະ ບົນຈິດໃຈບຸກທະລຸທັງ 4 ດ້ານ. ກ້າຄິດ, ກ້າເຮັດ, ກ້າຮັບຜິດຊອບ ດ້ວຍເຫດຜົນ, ດ້ວຍຄໍາອະທິບາຍ.