ອະດີດປະທານພັກ, ປະທານປະເທດ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສາລະວັນ.

ໃນວັນທີ 2ມີນາ 2018 ທີ່​ຜ່ານ​ມາ​ນີ້, ທ່ານ ຄຳໄຕ ສີພັນດອນ ອະດີດປະທານພັກ, ປະທານປະເທດໄດ້ເດີນທາງມາຢ້ຽມຢາມ ແຂວງສາລະວັັນ. ​ເຊິ່ງໃຫ້​ກຽດ​ຕ້ອນຮັບໂດຍ ທ່ານ ສີສຸວັນ ວົງຈອມສີ ກໍາມະການສູນກາງພັກ, ເລຂາພັກ – ເຈົ້າແຂວງ ສາລະວັນ ພ້ອມດ້ວຍຄະນະພັກ.

​ໃນ​ເວລາ 08:00 ​ໂມງ, ທ່ານ ຄຳ​ໄຕ ສີ​ພັນດອນ ອະ​ດີດ​ປະທານ​ພັກ, ປະທານ​ປະ​ເທດກໍ​ໄດ້ພົບ​ປະໂອ້ລົມກັບ​ຄະນະ​ພັກ, ຄະນະ​ປົກຄອງ, ພະ​ນັກ​ງານ​ຫຼັກ​ແຫຼ່ງ, ​ເລຂາ​ພັກ – ​ເຈົ້າ​ເມືອງ ພ້ອມ​ຄະນະ​ພັກ​ເມືອງ 8 ຕົວ​ເມືອງ ​ແລະ 2 ກຳລັງຢູ່ທີ່ສະໂມສອນໃຫຍ່ຂອງແຂວງສາລະວັນ.​ໄດ້ຮັບ​ຟັງການລາຍງານສະພາບ​ການຈັດຕັ້ງປະຕິບັດວຽກ​ງານ​ປ້ອງ​ກັນຊາ​ດ – ປ້ອງ​ກັນ​ຄວາມ​ສະຫງົບ, ການ​ພັດທະນາ​ເສດຖະກິດ -​ ສັງຄົມ ​ແລະ ວຽກ​ງານການ​ກໍ່ສ້າງ​ພັກ – ພະນັກງານ ຂອງແຂວງຈາກ​ທ່ານ ​ເລຂາ​ພັກ – ​ເຈົ້າ​ແຂວງ. ຈາກ​ນັ້ນ, ທ່ານ ຄໍາໄຕ ສີພັນດອນ  ອະດີດ​ປະທານ​ພັກ, ປະທານ​ປະ​ເທດກໍໄດ້ໃຫ້ກຽດໂອ້ລົມ ​ເຊິ່ງທ່ານໄດ້ຫວນ​ຄືນ​ໃນ​ພາ​ກິດ​ປະຕິວັດ ຕໍ່ສູ້​ກູ້​ຊາດ​ເພື່ອ​ຍົກ​ໃຫ້​ເຫັນ​ຄຸນງາມຄວາມດີ ​ແລະ ​ຄວາມ​ເປັນ​ແບບຢ່າງ​ການ​ນຳພາ​ຂອງ​ພັກ, ຍົກ​ໃຫ້​ເຫັນ​ພາລະ​ກຳ​ປະຫວັດສາດ ທີ່​ພວກ​ເຮົາ​ຈະ​ຕ້ອງ​ໄດ້​ສືບ​ຕໍ່​ໃນ​ການ​ນຳພາ​ປະ​ເທດຊາດ​ກ້າວ​ຂຶ້ນ​ສູ່​ສັງຄົມ​ນິຍົມ, ​ເອົາ​ໃຈ​ໃສ່​​ໃນການ​ຈັດຕັ້ງປະຕິບັດ 9 ປະຖົມປັດໃຈ ແລະ 18 ​ເປົ້າໝາຍ​ສະຫັດ​ສະ​ວັດ​, ​ເໜັ້ນໜັກ​ໃຫ້​ຄະນະ​ພັກ, ຄະນະ​ປົກຄອງ​ແຂວງເອົາໃຈໃສ່ສືບຕໍ່ປັບປຸງການຄຸ້ມຄອງນຳພາໜ່ວຍພັກ, ອົງການຈັດຕັ້ງຕ່າງໆໃນແຕ່ລະຂັ້ນໃຫ້ດີຂຶ້ນ ແລະ ສ້າງຄວາມເຂັ້ມແຂງໜັກແໜ້ນຢູ່ຂັ້ນຮາກຖານພໍ່ແມ່ປະຊາຊົນຢ່າງຈິງຈັງແນໃສ່ສ້າງສັງຄົມນິຍົມນັບແຕ່ຂັ້ນຮາກຖານຕິດພັນກັບວຽກງານ 3 ສ້າງ, ຊຸກຍູ້ປະຊາຊົນໃນການປູກຝັງ – ລ້ຽງສັດ ແລະ ການຜະລິດສິນຄ້າຕ່າງໆ ເລີ່ມແຕ່ຂັ້ນຮາກຖານຂຶ້ນມາ. ເອົາໃຈໃສ່ສ້າງກົນໄກໃຫ້ສອດຄ່ອງໃນການຄຸ້ມຄອງລັດ, ການປະຕິບັດລະບຽບກົດໝາຍ, ສະກັັດກັ້ນປະກົດການຫຍໍ້ທໍ້ບັນຫາຢາເສບຕິດ ແລະ ຕ້ານການສໍ້ລາດບັງຫຼວງ ໃຫ້ໝົດໄປຢ່າງສີ້ນເຊີງ, ຊຸກຍູ້ການພັດທະນາພື້ນຖານໂຄງລ່າງ ​ເອື້ອອຳນວຍໃຫ້ປະຊາຊົນສ້າງເສດຖະກິດ ຜະລິດໃຫ້ຫຼາຍກາຍເປັນສິນຄ້າ ​ໄປຄຽງຄູ່ກັບ​ການ​ສ້າງຄວາມສາມັກຄີປອງດອງຂອງປະຊາຊົນບັນດາເຜົ່າໃຫ້ໜັກແໜ້ນ ແລະ ສ້າງຊັບພະຍາກອນມະນຸດໃຫ້ມີຄວາມຮູ້, ຄວາມສາມາດ ມີຄຸນນະພາບ ແລະ ປະຕິບັດວຽກງານປ້ອງກັນຊາດ – ປ້ອງກັນຄວາມສະຫງົບໃຫ້ໜັກແໜ້ນເຂັ້ມແຂງ. ​ໃນໂອກາດ​ເຄື່ອນ​ໄຫວ​ຢ້ຽມຢາມ​ຄັ້ງນີ້ ທ່ານຍັງໄດ້ເດີນທາງໄປຢ້ຽມຊົມແຫຼ່ງທ່ອງທ່ຽວ ພູຜາສຸກ ​ແລະ ​ເຂດ​ຈຸດສຸມ​ພັດທະນາ​ຂອງ​ແຂວງ​ຈຳນວນ​ໜຶ່ງ.