ຫ້ອງວ່າການແຂວງສາລະວັນເປີດກອງປະຊຸມສະຫຼຸບວຽກງານ ຫ້ອງວ່າການປະຈໍາປີ 2017 ແລະ ວາງທິດທາງແຜນການປີ 2018.

ໃນ​ຕອນເຊົ້າ​ ຂອງ​ວັນ​ທີ 16 ກຸມພາ 2018 ທີ່​ຜ່ານ​ມາ, ທີ່​ຫ້ອງ​ປະຊຸມຊັ້ນສອງຂອງ​ສະ​ໂມ​ສອນ​ໃຫ່ຍແຂວງ​ສາລະ​ວັນ, ໄດ້ເປີດກອງປະຊຸມສະຫຼຸບວຽກງານຫ້ອງ​ວ່າການ​​ແຂວງປະຈໍາປີ 2017 ແລະ ທິດທາງແຜນການປີ 2018 ຂື້້ນ, ​ໂດຍການເປັນປະທານ ຂອງ ທ່ານ ບົວທອງ ຄຸນ​ຍອດ​ປັນຍາ  ຮອງ​ເລຂາ​ພັກ​ແຂວງ, ຮອງ​ເຈົ້າ​ແຂວງ ຜູ້​ຊີ້​ນຳ​ວຽກ​ງານ​ຫ້ອງ​ວ່າການ​​ແຂວງ,  ​ແລະ ນຳພາ​ດຳ​ເນີນ​ກອງ​ປະຊມ​ໂດຍ: ທ່ານ ປອ ສະໄໝ ໂພທິສານ  ກໍາມະການພັກແຂວງ ເລຂາຄະນະຮາກຖານ​ ຫົວໜ້າຫ້ອງ​ວ່າການ​​ແຂວງ​ສາລະ​ວັນ​ ​ ມີຫົວໜ້າພະແນກ – ຮອງພະແນກ – ຫົວໜ້າຫ້ອງການຂອງ​ພະ​ແນ​ກການ – ອົງການ​ທຽບ​ເທົ່າ​ອ້ອມ​ຂ້າງ​ແຂວງ, ຫົວໜ້າ​ຫ້ອງ​ວ່າການ​​ເມືອງ 8 ຕົວ​ເມືອງ ​ແລະ ພະນັກງານ – ລັດຖະກອນພາຍໃນຫ້ອງວ່າການແຂວງ ເຂົ້າຮ່ວມທັງໝົດ 95 ທ່ານ, ຍິງ 24 ທ່ານ.

ກອງ​ປະຊຸມ​ຄັ້ງນີ້ ​ໄດ້ສະຫຼຸບ​ຄືນ​ການຈັດຕັ້ງປະຕິບັດ​ວຽກ​ງານ​ຫ້ອງ​ວ່າການ​ແຂວງໃນ​ໄລຍະ 1 ປີ ( 2017) ຜ່ານມາ ​ເຊິ່ງ​ໄດ້​ຕີ​ລາຄາ​ວ່າ: ​ໂດຍ​ລວມການຈັດ​ຕັ້ງປະຕິ​ບັດ 3 ພາລະ​ບົດບາດ​ຄື: ​ເປັນ​ເສນາ​ທິການ, ພົວພັນ​ປະສານ​ງານ ​ແລະ ບໍລິຫານ​ຮັບ​ໃຊ້​, ຮັບປະກັນດ້ານວັດຖຸ, ພາຫະນະໃຫ້ແກ່ການເຄື່ອນໄຫວເຮັດວຽກຂອງການນໍາໃຫ້​ມີ​ຜົນສຳ​ເລັດ​ຕາມ​ຄາດໝາຍ ​ແລະ ກອງ​ປະຊຸມ​ກໍໄດ້​ມີ​ການ​ແລ​ກປ່ຽນ​ຄຳ​ເຫັນ​ເຊິ່ງສະຫຼຸບ​ໄດ້​ວ່າ: ຜ່ານ​ມາ​ການ​ບໍລິຫານ​ຮັບ​ໃຊ້​ເຮັດ​ໄດ້​ດີ ​ແຕ່​ການ​ເປັນ​ເສນາ​ທິການ​ໃນ​ດ້ານ​ການ​ຂີດ​ຂຽນ, ການພົວພັນ​ປະສານ​ງານ, ການຈໍລະຈອນເອກະສານ ​ຍັງ​ເຮັດ​ບໍ່​ທັນ​ໄດ້​ດີ​ເທົ່າ​ທີ່​ຄວນ. ຈາກ​ນັ້ນ, ກອງ​ປະຊຸມ​ຍັງ​ໄດ້ຮັບ​ຟັງ​ການ​​​ເຜີ​ຍ​ແຜ່ເຊື່ອມ​ຊຶມມະຕິ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ພັກ​​ແຂວງ​ເປີດ​ກວ້າງ​ຄັ້ງທີ 7 ສະ​ໄ​​ໝທີ VIII ​​ໂດຍ ທ່ານ ປອ ສະ​ໄໝ ​ໂພ​ທິສານ  ກຳມະການ​ພັກ​ແຂວງ, ​ເລຂາ​ຄະນະ​ພັກ​ຮາກ​ຖານ, ຫົວໜ້າ​ຫ້ອງ​ວ່າການ​​ແຂວງ.

​ໃນ​ຕອນ​ທ້າ​ຍ, ກອງ​ປະຊຸມ​ໄດ້ຟັງການໂອ້ລົມຈາກ ທ່ານ ບົວທອງ ຄຸດຍອດປັນຍາ ຮອງເລຂາພັກແຂວງ, ຮອງເຈົ້າແຂວງ ສາລະວັນ ຜູ່ຊີ້ນໍາວຽກງານຫ້ອງການປົກຄອງແຂວງ​ເຊິ່ງພື້ນຖານ​ທ່ານ​ກໍໄດ້​ສະ​ແດງ​ຄວາມຍ້ອງຍໍຊົມ​ເຊີຍ​ຕໍ່​ຄວາມ​ບຸກບືນຫ້າວຫັນ ແລະ ຜົນງານຕະຫຼອດໃນໄລຍະ 1 ປີ ຂອງຫ້ອງວ່າການແຂວງທີ່ຍາດມາໄດ້ ​ແຕ່​ເພື່ອ​ເປັນ​ທິດ​ທາງ​ໃນ​ຕໍ່ໜ້າ ທ່ານ​ກໍ​ໄດ້​ເນັ້ນໜັກ​ໃຫ້​ເອົາ​ໃຈ​ໃສ່​ເພີ່ມ​ທະວີ ​ໃນ​ການ​ສຶກສາ​ອົບຮົມ​ວຽກ​ງານ​ການ​ເມືອງ​ແນວ​ຄິດ, ສ້າງຄວາມສາມັກຄີ​ເປັນ​ເອກະ​ພາບ​ພາຍ​ໃນ​ໃຫ້​ໜັກ​ແໜ້ນ​ເຂັ້ມ​ແຂງ, ເດັດດ່ຽວຕໍ່ສູ້ຕ້ານທັດສະນະແນວຄິດຈົງຈຽມ, ການເຫັນອົກເຫັນໃຈ, ຕ້ານແນວຄິດພັກພວກກຸ່ມກ້ອນ, ສວຍໃຊ້ໂອກາດ – ໜ້າ​ທີ່​ຕຳ​ແໜ່​ງ, ແບ່ງແຍກພາຍ​ໃນ, ຕ້ອງຖືເອົາການຕໍານິຕິຊົມກໍ່ສ້າງຊ່ວຍເຫຼືອເຊິງກັນ ແລະ ກັນ ເພື່ອສ້າງຄວາມກ້າວໜ້າ ແລະ ສ້າງຄວາມເຂັ້ມແຂງໃຫ້ແກ່ພະນັກງານ​ຜູ່​ທີ່​ເຮັດ​ວຽກ​ງານ​ຫ້ອງ​ວ່າການ ຝຶກ​ຝົນ​ຫຼໍ່​ຫຼອມ​ຕົນ​ເອງ​ໃຫ້​ກາຍ​ເປັນ​ຜູ່​ຊ່ວຍ​ວຽກ​ທີ່​ດີ. ສ້າງ​ໃຫ້​ຫ້ອງ​ວ່າການ​ກາຍເປັນເສນາທີ່ດີ, ມີປະສິດທິພາບແລະ ທັນສະໃໝ  ເປັນໃຈກາງປະສານງານ ແລະ ການບໍລິການຮັບໃຊ້ການນໍາແຕ່ລະຂັ້ນໃນການຄົ້ນຄວ້າ, ເກັບກໍາຂໍ້ມູນ – ຂ່າວສານ, ມີ​ຄວາມ​ເປັນ​ເອກະ​ພາບ ​ແລະ ອອກ​ແຮງ​ແຂ່ງຂັນ​ກັນ​ເຮັດ​ສຳ​ເລັດ​ໜ້າ​ທີ່​ຕາມ​ການ​ມອບ​ໝາຍ.