ຫ້ອງວ່າການສຳນັກງານນາຍົກລັດຖະມົນຕີ ເປີດຊຸດອົບຮົມຫົວຂໍ້ “ການສ້າງຂີດຄວາມສາມາດ ແລະ ຄວາມຊຳນານໃນການພັດທະນາ, ຄຸ້ມຄອງ ແລະ ໂຄສະນາຂໍ້ມູນຂ່າວສານກ່ຽວກັບການຄຸ້ມຄອງປ່າສະຫງວນ ແລະ ສັດນ້ຳ – ສັດປ່າ” ທີ່ ເມືອງປາກຊັນ ແຂວງ ບໍລຄຳໄຊ.

​​ໃນ​ລະຫວ່າງ​ວັນ​ທີ 18 – 22 ມີຖຸນາ 2018 ທີ່ຜ່ານມານີ້ ທີ່ຫ້ອງປະຊຸມສູນ ໄອຊີທີ ຂອງພະແນກສຶກສາທິການ ແລະ ກິລາ  ເມືອງ ປາກຊັນ ແຂວງ ບໍລິຄຳໄຊ ໄດ້ເປີດຊຸດອົບຮົມ ຫົວ​ຂໍ້ “ ການສ້າງຄວາມສາມາດ ແລະ ຄວາມຊຳນານໃນການພັດທະນາ, ຄຸ້ມຄອງ ແລະ ໂຄສະນາຂໍ້ມູນຂ່າວສານກ່ຽວກັບການຄຸ້ມຄອງປ່າສະຫງວນ ແລະ ສັດນ້ຳ – ສັດປ່າ” ໂດຍໃຫ້ກຽດເຂົ້າຮ່ວມເປັນປະທານເປີດພິທີ ຂອງ ທ່ານ ປອ ນາງ ວຽງສະຫວັນ ດວງສະຫວັນ ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ມີບັນ​ດາທ່ານຫົວໜ້າກົມ, ຮອງຫົວໜ້າກົມ ຈາກຫ້ອງວ່າການສຳນັກງານນາຍົກລັດຖະມົນຕີ, ພະນັກງານຈາກສູນກາງ ແລະ ທ້ອງຖິ່ນ ​ເຂົ້າຮ່ວມທັງໝົດ 50 ກວ່າທ່ານ.

ໂດຍໄດ້ຮັບທຶນສະໜັບ​ສະ​ໜູນຈາກທະນາຄານໂລກ ການຝຶກອົບຮົມໄດ້ກຳນົດເອົາ 8 ເນື້ອໃນຫຼັກ ເພື່ອໃຫ້ນັກສຳມະນາກອນ ໄດ້ຝືກທັກສະການຂຽນບົດ, ຂຽນຂ່າວ, ການສຳພາດ, ການພັດທະນາເທັກໂນໂລຊີດ້ານຂ່າວຜ່ານໜ້າເວບໄຊ, ສື່ສີ່ງພີມ ແລະ ສື່ວິທະຍຸ – ໂທລະພາບ, ນອກນັ້ນ ນັກສໍາມະນາກອນ ຍັງໄດ້ລົງສໍາພາດ ແລະ ເກັບກຳຂໍ້ມູນຕົວຈິງຢູ່ພື້ນທີ່ຕົວແບບທີ່ໄດ້ກຳນົດໄວ້ ທັງນີ້ ກໍເພື່ອເປັນການເພີ່ມຂີດຄວາມສາມາດໃນການເກັບກຳຂໍ້ມູນ, ການສັງລວມເນື້ອໃນ ແລະ ການສະໜອງຂໍ້ມູນຂ່າວສານກ່ຽວກັບການຄຸ້ມຄອງປ່າສະຫງວນ ແລະ ສັດນ້ຳ – ສັດປ່າ ໃຫ້ການນໍາ ແລະ ລັດຖະບານ ທັງເປັນພື້ນຖານໃນການສະໜອງຂໍ້ມູນໃຫ້ສື່ຕ່າງໆ ເພື່ອໃຫ້ໄດ້ຂໍ້ມູນຂ່າວສານທີ່ຊັດເຈນ, ວ່ອງໄວ ແລະ ທັນການ.