ຫ້ອງວ່າການປົກຄອງແຂວງສາລະວັນ ຈັດພິທີຮັບເອົາສະມາຊິກພັກ ປະຊາຊົນ ປະຕິວັດລາວ

ໂດ​ຍປະຕິບັດ​ຕາມ ມະຕິ​ຕົກລົງ​ຂອງ​ຄະນະ​ຈັດ​ຕັ້ງ​ແຂວງ​ສາລະ​ວັນ ສະບັບ​ເລກທີ 121/ຄຈຂ.ສວ, ລົງວັນ​ທີ 24 ກໍລະ ກົດ 2015 ວ່າ​ດ້ວຍ: ການ​ອະນຸ​ມັດ​ເລື່ອນ​ສະມາຊິກ​ພັກ​ສຳຮອງ​ຂຶ້ນ​ເປັນ​ສະມາຊິກ​ພັກ​ສົມບູນ; ມະຕິຕົກລົງ ສະບັບ​​ເລກທີ 94 ​ແລ 95 ວ່າ​ດ້ວຍ: ການ​ອະນຸມັດ​ຮັບ​ເອົາ​ມະຫາຊົນ​ກ້າວໜ້າ​ເຂົ້າ​ເປັນ​ສະມາຊິກ​ພັກ​ສຳຮອງ. ເວລາ 13:30 ​ໂມງ ຂອງ​ວັນ​ທີ 6 ສິງຫາ 2015 ຢູ່​ຫ້ອງ​ປະຊຸມ​ຊັ້ນ III ຫ້ອງ​ວ່າການ​ປົກຄອງ​ແຂວງ​ສາລະ​ວັນ ​ໄດ້​ຈັດ​ພິທີ​ເລື່ອນ​ສະມາຊິກ​ພັກ​ສຳຮອງ​ຂຶ້ນ​ເປັນ​ສະມາຊິກ​ພັກ​ສົມບູນ ​ແລະ ຮັບ​ເອົາ​ມະຫາ​ຊົນ​ກ້າວໜ້າ​ເຂົ້າ​ເປັນ​ສະມາຊິກ​ພັກ​ສຳ ຮອງ. ​ໃຫ້ກຽດ​ເຂົ້າ​ຮ່ວມ ​ແລະ ​ເປັນ​ປະທານ​ໃນ​ພິທີ​ຄັ້ງ​ນີ້ ​ໂດຍ ສະຫາຍ ດຣ ສະ​ໄໝ ​ໂພທິ​ສານ ກຳມະການ​ພັກ​ແຂວງ, ຫົວໜ້າຫ້ອງ​ວ່າການ​ປົກຄອງ​ແຂວງ​ສາລະ​ວັນ; ມີ​ຜູ້​ເຂົ້າ​ຮ່ວມ ທີ່​ມາ​ຈາກ​ຄະນະ​ຈັດ​ຕັ້ງ​ແຂວງ,​ ຄະນະ​ກຳມະການ​ກວດກາ​ແຂວງ, ຄະນະ​ໂຄສະນາ​ອົບຮົມ​ແຂວງ, ຄະນະໜ່ວຍພັກ​ທີ່​ສັງກັດ​ຢູ່​ຮາກ​ຖານ​ພັກຫ້ອງ​ວ່າ ການ​ປົກຄອງ​ແຂວງ; ມີ​ອົງການ​ຈັດ​ຕັ້ງ​ແມ່ຍິງ-ຊາວໜຸ່ມ-ກຳມະບານ, ສະມາຊິກ​ພັກ​ສົມບູນ-ສຳຮອງ ໜ່ວຍພັກ​ຄົ້ນ​ຄວ້າ-ສັງ​ລວມວຽກພັກ ​ເຂົ້າຮ່ວມ​ຈຳນວນ 25 ສະຫາຍ ຍິງ 11 ສະຫາຍ.

ພິທີ​ຄັ້ງ​ນີ້​ໄດ້​ເລື່ອນ​ສະມາຊິກ​ພັກ​ສຳຮອງ​ຂຶ້ນ​ເປັນ​ສະມາຊິກ​ພັກ​ສົມບູນ ມີ 1 ສະຫາຍ ຄື: ສະຫາຍ ສຸລິ​ສັກ ​ໄຊ​ປະ​ເສີດ ​ແລະ ຮັບ​ເອົາ​ມະຫາຊົນ​ກ້າວໜ້າ​ເຂົ້າ​ເປັນ​ສະມາຊິກ​ພັກ​ສຳຮອງ ຈຳນວນ 2 ສະຫາຍ ຄື: ສະຫາຍ ນາງ ຫຼິດ ​ແກ້ວ​ລັງສີ ​ແລະ ສະຫາຍ ນາງ ສີ​ໃສ ອິນທະ​ພັກດີ (ທັງ 3 ສະຫາຍ ​ແມ່ນ​ສັງກັດ​ຢູ່​ໃນໜ່ວຍພັກ​ຄົ້ນຄວ້າ-ສັງ​ລວມວຽກພັກ, ຫ້ອງ​ວ່າການ​ປົກຄອງ​ແຂວງ​ສາລະ​ວັນ).

ຕອນ​ທ້າຍ​ພິທີ ສະຫາຍ ປະທານ​ ກໍ່​ໄດ້​ໃຫ້ກຽດ​ໂອ້​ລົມຕໍ່​ກອງ​ປະຊຸມ ​ເຊິ່ງ ສະຫາຍ ​ໄດ້ເນັ້ນໜັກ​ບາງ​ບັນ​ຫາ ຕໍ່​ສະມາຊິກ​ພັກໃໝ່ ທັງ​ສົມບູນ ​ແລະ ສຳຮອງ ​ໃຫ້ສຶບຕໍ່​ເອົາ​ໃຈ​ໃສ່​ຕື່ມ ຄື:

ຕ້ອງ​ມີ​ສະຕິ​ລະວັງ​ຕົວ​ສູງ, ຕ້ານ​ກົນອຸບາຍ​ຫັນປ່ຽນ​ໂດຍ​ສັນຕິ​ຂອງ​ສັດຕູ (​ເຂົ້າ​ຮ່ວມການ​ສຶກສາ​ອົບຮົມ​ວຽກງານ​ການ​ເມືອງ-​ແນວ​ຄິດຢ່າງ​ເປັນ​ປົກກະຕິ ​ແລະຕໍ່​ເນື່ອງ).
– ​ເອົາ​ໃຈ​ໃສ່​ປັບປຸງ​ແບບ​ແຜນ​ວິທີ​ເຮັດ​ວຽກຂອງ​ສະມາຊິກ​ພັກ ​ເປັນ​ຕົ້ນ​ແມ່ນຄວາມ​ເປັນ​ແບບຢ່າງ​ຕໍ່​ມະຫາຊົນ.
– ຍົກ​ສູງ​ຄວາມ​ຮູ້-ຄວາມ​ສາມາດ​ຂອງ​ຕົນ​ເອງ ​ເຂົ້າ​ໃນ​ການ​ປະຕິບັດໜ້າທີ່​ວຽກງານດ້ວຍ​ຄວາມ​ຮັບຜິດຊອບ​ສູງ.
– ສຶບຕໍ່​ຮ່ຳຮຽນ​ເອົາ​ຄຸນສົມບັດ​ສິນ​ທຳ​ປະຕິວັດຂອງ​ທ່ານ​ຜູ້ນຳ​ແຕ່ລະ​ໄລຍະ​ ແຕ່​ຂັ້ນ​ສູງ​ກາງ​ລົງ​ຮອດ​ທ້ອງ​ຖິ່ນ ​-ຮາກຖານ.
– ​ເອົາ​ໃຈ​ໃສ່ມີ​ສ່ວນ​ຮ່ວມ​ໃນ​ການ​ສ້າງໜ່ວຍພັກ​ແຂງ-ຮູ້​ນຳພາ​ຮອບດ້ານ ​​ເພື່ອໃຫ້​ໜ່ວຍພັກ​ສາມາດ​ເປັນໜ່ວຍພັກ​ແຂງຢ່າງ​ຕໍ່​ເນື່ອງ. ພິທີ​ໄດ້​ດຳ​ເນີນ​ມາ​ຮອດ ​ເວລາ 15:30 ​ໂມງ ຂອງ​ວັນ​ດຽວກັນ ກໍ່​ໄດ້​ປິດ​ລົງ​ຢ່າງ​ເປັນ​ທາງ​ການ.