ຫ້ອງວ່າການປົກຄອງເມືອງຕະໂອ້ຍ ເປີດກອງປະຊຸມສະຫຼຸບວຽກງານການເຄື່ອນໄຫວປະຈຳປີ 2017 ແລະ ວາງທິດທາງປີ 2018

​ໃນ​ຕອນ​ເຊົ້າ, ຂອງ​​ວັນ​ທີ 30 /01 /2018 ທີ່​ຜ່ານ​ມາ ​​​ ​ຫ້ອງ​ວ່າການ​ປົກຄອງ​ເມືອງ​ຕະ​ໂອ້​ຍ​ໄດ້​ເປີດ​ກອງ​ປະຊຸມ​ສະຫຼຸບ​ວຽກ​ງານ​ການ​ເຄື່ອນ​ໄຫວ​ຂອງ​ຕົນ​ປະຈຳ​ປີ 2017 ​​ເພື່ອ​ວາງ​ທິດ​ທາງ​​ໃນ​ປີ 2018.

​​ໂດຍພາຍ​ໃຕ້​ການເປັນ​ປະທານຮ່ວມ​ຂອງ​ ທ່ານ ບຸນ​ໂຮມ ໂກ​ມສຸ​ນີ ກຳ​ມະ​ການ​ພັກ​ແຂວງ, ​ເລຂາ​ພັກ​ເມືອງ – ​ເຈົ້າ​ເມືອງໆ​ຕະ​ໂອ້​ຍ ​ແລະ ທ່ານ​ ວຽງ​ໄຊ ມະຫາ​ທິລາດ ຮັກສາ​ການ​ຫົວໜ້າຫ້ອງ​ວ່າການ​ປົກຄອງ​ເມືອງ​ຕະ​ໂອ້​ຍ, ມີ​ຫົວໜ້າ​ຫ້ອງການ​ອ້ອມ​ຂ້າງ​ເມືອງ. ປະທານ​ກຸ່ມ​ບ້ານ 5 ກຸ່ມ​ບ້ານ ​ແລະ ພະນັກງານ – ລັດຖະກອນ​ໃນ​ຫ້ອງການ​ເຂົ້າ​ຮ່ວມທັງ​ໝົດ 48 ທ່ານ, ຍິງ 13 ທ່ານ.

          ກອງ​ປະຊຸມ​ໄດ້ຮັບ​ຟັງ​ການ​ລາຍ​ງານ​ການຈັດຕັ້ງປະຕິບັດ​ວຽກ​ງານ​ຫ້ອງ​ວ່າການ​ປົກຄອງ​ເມືອງ​ຕະ​ໂອ້​ຍ ​ໃນ​ໄລຍະ 1 ປີຜ່ານ ( ປີ2017) ​ແລະ ທິດ​ທາງ​ແຜນການ​ປີ 2018 ທີ່​ສະ​ເໜີ​ໂດຍ ທ່ານ ສົມພານ ພົມມະ​ວົງ​ສ້າ​ຍ  ຮອງ​ຫົວໜ້າ​ຫ້ອງ​ວ່າການ​ປົກຄອງ​ເມືອງ​ຕະ​ໂອ້​ຍ. ​​ເຊິ່ງ​ໄດ້​ຕີ​ລາຄາ​ວ່າ: ການ​ປະຕິບັດ​ພາລະ​ບົດບາດ​ການ​ເປັນ​ເສນາ​ທິການ, ​ເປັນ​ຜູ່​ປະສານ​ງານ ​ແລະ ບໍລິຫານ​ຮັບ​ໃຊ້​ການ​ນຳ​ຂອງ​ຫ້ອງວ່າການ​ປົກຄອງ​ເມືອງ​ຕະ​ໂອ້​ຍ​ ​ແມ່ນ​ມີ​ຜົນສຳ​ເລັດ​ເປັນ​ສ່ວນ​ໃຫ່ຍ, ​ເຖິງ​ວ່າ​ຈະ​ມີ​ບາງ​ດ້ານ​ທີ່​ຍັງ​ເປັນ​ຂໍ້ຄົງຄ້າງ​​ໃນ​ການ​ພົວພັນ​ປະສານ​ງານ ​ແຕ່​ຫ້ອງ​ວ່າການ​ປົກຄອງ​ເມືອງ​ຕະ​ໂອ້​ຍ ກໍ​ໄດ້​ວາງ​ທິດ​ທາງ​ໃນ​ຕໍ່ໜ້າ​ເພື່ອ​ສ້າງ​ໃຫ້​ຫ້ອງ​ວ່າການ​ປົກຄ​ອງ​ເມືອງ​ຕະ​ໂອ້​ຍກາຍ​ເປັນ “ ​ເສນາທິການ​ທີ່​ດີ, ມີ​ຄວາມ​ວ່ອງ​ໄວ​ຖືກຕ້​ອງ ​ແລະ ທັນ​ການ”. ​ໃນ​ໂອກາດນີ້, ຫ້ອງ​ວ່າການ​ປົກຄອງ​ເມືອງ​ຕະ​ໂອ້​ຍ ຍັງ​ໄດ້​ມອບ​ໃບ​ຍ້ອງຍໍ​ຂັ້ນ​ເມືອງ ​ແລະ ຫ້ອງ​ວ່າການ​ປົກຄ​ອງ​ເມືອງ​ໃຫ້​ແກ່​ພະນັກງານ – ລັດຖະກອນ​ທີ່​ມີ​ຜົນງານ​ດີ​​ເດັ່ນ​ໃນ​ການ​ເຄື່ອນ​ໄຫວ​ຕະຫຼອດ​ໄລຍະ 1ປີຜ່ານມາ. ​ໃນ​ຕ້ອນ​ທ້າຍ​ກອງ​ປະຊຸມກໍ​ໄດ້​ຮັບ​ຟັງ​ການ​ໂອ້​ລົມ​ຂອງ​ທ່ານ ບຸນ​ໂຮມ ​ໂກມສຸ​ນີ   ກຳມະການ​ພັກ​ແຂວງ​, ​ເລຂາ​ພັກ – ​​ເຈົ້າ​ເມືອງ​ໆ ຕະ​ໂອ້​ຍ, ​ເຊິ່ງທ່ານ​ໄດ້ມີ​ທິດ​ຊີ້​ນຳ ​ແລະ ​ເນັ້ນ​ໃຫ້​ຫ້ອງ​ວ່າການ​ປົກ  ຄ​ອງ​ເມືອງ​ຕະ​ໂອ້​ຍ​ເອົາ​ໃຈ​ໃສ່​ຕໍ່​ການ​ສຶກສາ​ອົບຮົມການ​ເມືອງ – ​ແນວ​ຄິດ​ໃຫ້​ແກ່​ພະນັກງານຫຼັກ​ແຫຼ່​ງ, ລັດຖະກອນ​ໃນ​ສັງກັດ​ໃຫ້​ເລິກ​ເຊິ່ງໜັກ​ແໜ້ນ, ​ເພີ່ມ​ທະວີ​ການ​ເປັນ​ເສ​ນາ​ທິການ​ໃຫ້​ແກ່​ການ​ນຳ​​​ໃນ​ການ​ກວດກາ​, ຄົ້ນຄວ້າ​ເອກະສານ, ນໍາສະເໜີຂັ້ນເທິງພິຈາລະນາ ປະຕິບັດ​ນະ​ໂຍບາຍ​ໃຫ້​ທົ່ວ​ເຖິງ ​ແລະ ​ເປັນ​ທຳ, ຫ້ອງ​ວ່າການຕ້ອງກຳ​ໃຫ້​ໄດ້​ສະພາບ​ການ​ໃນ​ທຸກ​ຂົງ​ເຂດ, ກຳ​ແໜ້ນພາລະ​ບົດບາດ​, ສິດ ​ແລະ ໜ້າ​ທີ່ຂອງ​ຕົນ, ຖື​ສຳຄັນວຽກ​ງານ​ການລົງ​​ຮາກ​ຖານ​, ດຳ​ເນີນ​ການ​ສ່ອງ​ແສງປະຈຳ​ເດືອນ​ໃຫ້​ເປັນ​ປົກກະຕິ.