ສາລະວັນ ແຂ່ງຂັນປະກວດປຸງແຕ່ງອາຫານພື້ນເມືອງລາວ

ສະຫະພັນແມ່ຍິງເມືອງສາລະວັນ ສ້າງຂະບວນການຂ່ຳນັບຮັບຕ້ອນວັນແມ່ຍິງສາກົນ ແລະເພື່ອເປັນການສະເຫຼີມສະຫຼອງ ຄົບຮອບ 107 ປີ(8 ມີນາ 1910 – 8 ມີນາ 2017) ຕິດພັນກັບການສ້າງຂະບວນຈັດງານແຂ່ງຂັນປະກວດອາຫານພື້ນເມືອງ ເພື່ອເປັນການສົ່ງເສີມ, ອະນຸລັກຮັກສາອາຫານພື້ນບ້ານໃຫ້ມີຄວາມນິຍົມຊົມຊອບ ແລະເປັນທີ່ຮູ້ຈັກຂອງຄົນໃນສັງຄົມທັງພາຍໃນ ແລະຕ່າງປະເທດ, ທີ່ມີມູນເຊື້ອມາຍາວນານໃນການສ້າງສີໄມ້ລາຍມືດ້ານການປຸງແຕ່ງອາຫານແບບລາວໆ ທີ່ຄົນສ່ວນໃຫຍ່ມັກຊິມມັກກິນເປັນປະຈຳ ແລະໃຫ້ຄົງຢູ່ຄູ່ກັບຄົນລາວຕະຫຼອດໄປ.
ງານປະກວດອາຫານຄັ້ງນີ້ມີ 12 ຄະນະຄື: ກຸ່ມແມ່ຍິງເສດຖະກິດ, ກຸ່ມພັກພະນັກງານ, ກຸ່ມຈັດຕັ້ງມະຫາຊົນ, ກຸ່ມປົກປ້ອງກົດໝາຍ, ກຸ່ມໂຮງຮຽນອ້ອມຂ້າງເທດສະບານ, ກຸ່ມນັກທຸລະກິດ, ກຸ່ມບ້ານນາເຫຼັກ, ກຸ່ມບ້ານຫຼັກສອງ, ບ້ານໂພນແກ້ວ, ບ້ານນາກົກໂພ, ບ້ານວັດກາງ ແລະກຸ່ມແມ່ຍິງເມືອງສະໝ້ວຍ. ເຊີ່ງໃນແຕ່ລະກຸ່ມແມ່ນໄດ້ປຸງແຕ່ງອາຫານແຕ່ລະປະເພດຄື: ເຂົ້າປຸ້ນນ້ຳປົ່ນ, ກ້ອຍໄກ່-ຕົ້ມໄກ່, ລວກຜັກ-ແຈ່ວ, ແກະສະຫຼັກໝາກໄມ້, ຕຳໝາກຮຸ່ງ ແລະ ທອດປາ ອາຫານແຕ່ລະປະເພດນີ້ລ້ວນແລ້ວແຕ່ຖືກປຸງແຕ່ງຕາມມາດຖານເງື່ອນໄຂຂອງຄະນະກຳມະການເປັນຕົ້ນ: ຕ້ອງນຸ່ງຖືສຸພາບຮຽບຮ້ອຍເປັນລະບຽບໃນຊຸດແຕ່ງກິນ, ພາຊະນະບັນຈຸໃນການຕົບແຕ່ງສະອາດຈົບງາມ, ລົດຊາດແຊບນົວດີ, ການຕົບແຕ່ງໜ້າຕາອາຫານໃຫ້ມີສີສັນງາມດີ ແລະການແກະສະຫຼັກໝາກໄມ້ໃຫ້ລະອຽດ ແລະສວຍງາມ ມາດຖານເຫຼົ່ານີ້ຜູ້ເຂົ້າຮ່ວມຕ້ອງໄດ້ປະຕິບັດຕາມເງື່ອນໄຂໃຫ້ໄດ້ຮັບຜົນດີທີ່ສຸດ ເຊີ່ງຂະບວນການດັ່ງກ່າວໄດ້ສ້າງຄວາມມ່ວນຊື່ນ ແລະຄືກຄື້ນ ທ່າມກາງສຽງຊົມສຽງເຊີຍຂອງແຕ່ລະທິມ ແລະແຂກທີ່ເຂົ້າຊິມລົດຊາດອາຫານ ນັບວ່າສ້າງຄວາມປະທັບໃຫ້ກັບແມ່ຄົວໃນງານແຫ່ງນີ້ກໍ່ວ່າໄດ້ ແລະຜູ້ເຂົ້າຮ່ວມກໍ່ໄດ້ສຸມຈິດໃຈ, ສະຕິເຫື່ອແຮງເຂົ້າໃສ່ໃນປຸງແຕ່ງອາຫານໃຫ້ສຸດຄວາມສາມາດ ແລະຄວາມສາມັກຄີພາຍໃນຄະນະ ເພື່ອດືງດູດຈິດໃຈຄະນະກຳມະການ ແລະຜູ້ເຂົ້າຮ່ວມໃຫ້ໄດ້ .

ພາບ ແລະ ຂ່າວ: ໜັງສືພິມສາລະວັນ