ສາລະວັນ ສຳເລັດກອງປະຊຸມຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ 7 ສະໄໜທີ VIII.

​ໃນ​ລະຫວ່າງ​ວັນ​ທີ 8 – 9 ມັງກອນ 2018 ຜ່ານ​ມານີ້, ຢູ່​ທີ່​ສະ​​ໂມ​ສອນ​ໃຫ່ຍຂອງ​ແຂວງ​ສາລະ​ວັນ, ​ໄດ້​ເປີດກອງປະຊຸມຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ 7 ສະໄໜທີ VIII ຂອງອົງຄະນະພັກແຂວງ ສາລະວັນຂຶ້ນ, ໂດຍພາຍໄຕ້ການເປັນປະທານ ຂອງສະຫາຍ ສີສຸວັນ ວົງຈອມສີ ກໍາມະການສູນກາງພັກ, ເລຂາພັກ – ເຈົ້າແຂວງໆ ສາລະວັນ ເຊິ່ງມີບັນດາຄະນະປະຈໍາພັກແຂວງ, ກໍາມະການພັກແຂວງ, ​ເລຂາ​ພັກເມືອງ -​ ເຈົ້າ ເມືອງ, ເລຂາໜ່ວຍ​ພັກ – ຫົວໜ້າພະແນກ, ຮອງພະແນກການ – ອົງການທຽບເທົາອ້ອມຂ້າງແຂວງ, ລັດວິສາ ຫະກິດ ເຂົ້າຮ່ວມທັງໜົດ 61 ສະຫາຍ, ຍິງ 3 ສະຫາຍ.

        ກອງປະຊຸມຄັ້ງນີ້​ໄດ້ຕີລາຄາຄືນການນຳພາ​ວຽກ​ງານຮອບດ້ານ​ຂອງ​ຄະນະ​ບໍລິຫານ​ງານ​ພັກ​ແຂວງ​ສາລະ​ວັນ ​ໃນໄລຍະ 1ປີ(2017)ຜ່ານມາ  ​​ແລະ ວາງທິດທາງ ໃນປີ 2018, ພ້ອມນັ້ນ ຍັງໄດ້ຮັບຟັງການລາຍງານແຜນພັດ ທະນາເສດຖະກິດ -​ ສັງຄົມ; ບົດລາຍງານວຽກງານການເງິນ ແລະ ບົດລາຍງານວຽກງານກວດກາ. ເຊິ່ງ​ໂດຍ​ລວມ ເຫັນ​ວ່າ:  ທົ່ວ​ສັງ​ຄົມ​ມີ​ຄວາມ​ເປັນລະ​ບຽບ​ຮຽບ​ຮ້ອຍ, ເສ​ດ​ຖະ​ກິດ​ມະ​ຫາ​ພາກ​ຍັງ​ສືບ​ຕໍ່​ຂະ​ຫຍາຍ​ຕົວ​ຕາມ​ທິດ​ທາງ​ທີ່​ວາງ​ໄວ້, ການ​ຈັດ​ເກັບ​ລາຍ​ຮັບ​ເຂົ້າ​ງົບ​ປະ​ມານ ແລະ ການ​ເບີກ​ຈ່າຍ​ເງິນ​ເດືອນ​ໄດ້​ຕາມ​ຄາດ​ໝາຍ.