ສາລະວັນ ວາງຄາດໝາຍສອບເສັງຈົບຊັ້ນມໍ 4 ແລະ ມໍ 7 ໃຫ້ບັນລຸ 99%

ທ່ານ ສີລິສັກ ຖະໜອມຮັກ ຫົວໜ້າພະແນກສຶກສາທິການ ແລະກິລາແຂວງສາລະວັນ ໄດ້ເປີດເຜີຍຕໍ່ສື່ມວນຊົນແຂວງ ໃນວັນທີ 5 ມີຖຸນານີ້ວ່າ: ຂະບວນການສອບເສັງຈົບຊັ້ນ ມໍ4 ແລະ ຊັ້ນ ມໍ7 ປີນີ້ ແຂວງສາລະວັນ ໄດ້ວາງຄາດໝາດສູ້ຊົນໃນດ້ານຕ່າງໆໃຫ້ບັນລຸໄດ້ 99% ເຊັ່ນ: ດ້ານການສອບເສັງໃຫ້ມີຄວາມເປັນລະບຽບຮຽບດ້ານອະນຸກຳມະການສອບເສັງ, ກຳມະການຍາມຫ້ອງສອບເສັງ, ກຳມະການກວດຫົວບົດໃຫ້ຄະແນນ ແລະມີຄວາມພ້ອມແລ້ວ 100% ປັດຈຸບັນນີ້ບັນດານ້ອງນັກຮຽນໃນແຕ່ລະຊັ້ນ, ແຕ່ລະໂຮງຮຽນ, ຄູອາຈານໄດ້ເອົາໃສ່ນຳພານັກຮຽນຄົ້ນຄວ້າທວນຄືນບົດຮຽນຢ່າງເປັນຂະບວນຟົດຟື້ນ ແລະກວ້າງຂວາງ ແລະເປັນປີທີ່ມີນັກຮຽນຊັ້ນ ມ4 ແລະ ມ7 ເພີ່ມຂຶ້ນກວ່າປີທີ່ຜ່ານມາ.
ສຳລັບຊັ້ນມັດທະຍົມປີທີ 4 ແມ່ນຈະໄດ້ສອບເສັງໃນຄັ້ງວັນທີ 13-15 ມີຖຸນາ 2017 ມີນັກຮຽນສອບເສັງທັງໝົດ 4.037 ຄົນ, ຍິງ 1.945 ຄົນ, ມາຈາກໂຮງຮຽນ 78 ແຫ່ງ, ມີ 14 ສູນສອບເສັງ, ມີ 186 ຫ້ອງສອບເສັງ, ມີ 6 ວິຊາຄື: ວິຊາຄະນິດສາດ, ພາສາລາວ+ວັນນະຄະດີ, ສຶກສາພົນລະເມືອງ, ວິທະຍາສາດທຳມະຊາດ, ວິທະຍາສາດສັງຄົມ ແລະ ວິຊາພາສາອັງກິດ. ສ່ວນຊັ້ນ ມ7 ປີນີ້ແມ່ນຈະໄດ້ສອບເສັງໃນວັນທີ 20-21 ມີຖຸນາ 2017 ນີ້, ມີນັກຮຽນສອບເສັງທັງໝົດ 2.044 ຄົນ, ຍິງ 977 ຄົນ, ມາຈາກໂຮງຮຽນ 25 ແຫ່ງ, ມີ 10 ສູນສອບເສັງ, ມີ 95 ຫ້ອງ, ມີ 4 ວິຊາສອບເສັງຄື: ວິຊາຄະນິດສາດ, ພາສາລາວ+ວັນນະຄະດີ, ຟິຊິກສາດ ແລະວິຊາປະຫວັດສາດ

ພາບ ແລະ ຂ່າວ: ໜັງສືພິມສາລະວັນ