ສາລະວັນເຜິຍແຜ່ ແລະ ຜັນຂະຫຍາຍຜົນກອງປະຊຸມສຸດຍອດເຂດສາມຫຼ່ຽມພັດທະນາ ກໍາປູເຈຍ-ລາວ-ຫວຽດນາມ(CLV DTA) ຄັ້ງທີ 10 ແລະ ກະກຽມແຜນວຽກສໍາຄັນສໍາລັບປີ 2019-2020.

ໃນວັນທີ 27 ກຸມພາຜ່ານມານີ້, ກະຊວງການຕ່າງປະເທດຮ່ວມກັບອຳນາດການປົກຄອງແຂວງສາລະວັນ, ໄດ້ຈັດເຜີຍແຜ່ຜົນກອງປະຊຸມສຸດຍອດ ເຂດສາມຫຼ່ຽມພັດທະນາກຳປູເຈຍ-ລາວ- ຫວຽດນາມ (CLV) ຄັ້ງທີ 10 ແລະ ກະກຽມແຜນວຽກທີ່ສໍາຄັນສໍາລັບສົກປີ  2019 – 2020, ພາຍໃຕ້ການເປັນປະທານຮ່ວມຂອງ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ແລະ ທ່ານ ພູທົງ ຄຳມະນີວົງ, ຮອງເຈົ້າແຂວງ ສາລະວັນ, ໂດຍມີຜູ້ເຂົ້າຮ່ວມຈາກບັນດາຂະແໜງການທີ່ກ່ຽວຂ້ອງຂອງ 4 ແຂວງພາກໃຕ້ຄື: ແຂວງສາລະວັນ, ແຂວງຈໍາປາສັກ, ແຂວງ ເຊກອງ ແລະ ແຂວງອັດຕະປື ຈໍານວນ 100 ກວ່າທ່ານ.

ຈຸດປະສົງ ຂອງກອງປະຊຸມຄັ້ງນີ້ ແມ່ນເພື່ອເຜີຍແຜ່, ປຶກສາຫາລື ແລະ ແລກປ່ຽນຄວາມຄິດຄວາມເຫັນກ່ຽວກັບການຜັນຂະຫຍາຍຜົນ ຂອງກອງປະຊຸມສຸດຍອດ ດັ່ງກ່າວໂດຍສະເພາະບັນດາເອກະສານທີ່ຖືກຮັບຮອງ ເອົາແລ້ວ ເປັນຕົ້ນ: ຖະແຫຼງການຮ່ວມຂອງກອງປະຊຸມສຸດຍອດ ກຳປູເຈຍ-ລາວ- ຫວຽດນາມ CLV ຄັ້ງທີ 10 ແລະ ແຜນປະຕິບັດງານວ່າດ້ວຍການເຊື່ອມຈອດເສດຖະກິດ CLV ເຖິງປີ 2030 ລວມທັງສັນຍາວ່າ ດ້ວຍການ ສົ່ງເສີມ ແລະ ອໍານວຍຄວາມສະດວກທາງດ້ານການຄ້າຢູ່ເຂດສາມຫຼ່ຽມພັດທະນາກໍາປູເຈຍ-ລາວ-ຫວຽດນາມ(CLV DTA)  ທີ່ໄດ້ຮັບການລົງນາມລະຫວ່າງລັດຖະບານຂອງ 3 ປະເທດ ໃນໂອກາດຂອງກອງປະຊຸມສຸດຍອດ CLV  ຄັ້ງທີ 9 ໃນເດືອນພະຈິກ 2016 ທີ່ ສຽມລຽບທັງນີ້ກໍ່ເພື່ອຊຸກຍູ້ການພັດທະນາເສດຖະກິດ-ສັງຄົມຂອງ ສປປ ລາວ ເຮົາກໍຄືບັນດາແຂວງຢູ່ໃນເຂດສາມຫຼ່ຽມພັດທະນາ ລວມທັງຊຸກຍູ້ການເຊື່ອມໂຍງເສດຖະກິດກັບພາກພື້ນ ແລະ ສາກົນຂຶ້ນເທື່ອລະກ້າວ.

ນອກຈາກນີ້, ຍັງໄດ້ປຶກສາຫາລື ແລະ ແລກປ່ຽນຄວາມຄິດເຫັນກ່ຽວກັບການກະກຽມ ຄວາມພ້ອມໃນດ້ານຕ່າງໆ ຂອງ ສປປ ລາວ ເຮົາທີ່ຈະເປັນເຈົ້າພາບຈັດກອງປະຊຸມສຸດຍອດເຂດສາມຫຼ່ຽມພັດທະນາ ກໍາປູເຈຍ-ລາວ- ຫວຽດນາມ ຄັ້ງທີ 11 ໃນປີ 2020 ແລະ ແຜນວຽກ ທີ່ສໍາຄັນຕ່າງໆ ແຕ່ປີ 2019- 2020. ພ້ອມດຽວກັນນີ້, ບັນດາຜູ້ເຂົ້າຮ່ວມໄດ້ຮັບຟັງການລາຍງານຄວາມຄືບໜ້າຂອງການຈັດຕັ້ງປະຕິບັດວຽກງານໃນກົນໄກການຮ່ວມມື CLV ຈາກ 4 ແຂວງພາກໃຕ້ ໃນໄລຍະຜ່ານມາລວມມີຜົນໄດ້ຮັບ, ຂໍ້ຄົງຄ້າງ, ຂໍ້ສະເໜີ ແລະ ທິດທາງແກ້ໄຂວຽກງານໃນຕໍ່ໜ້າ.