ສະຫຼຸບການຈັດຕັ້ງປະຕິບັດການຮ່ວມມື 2 ປີ (2016-2018) ລະຫ່ວາງ ແຂວງ ກຽນຢາງ (ຫວຽດນາມ) ກັບ ແຂວງ ສາລະວັນ (ລາວ).

ໂດຍ​ສືບ​ຕໍ່​ປະຕິບັດ​ຕາມ​ບົດ​ບັນທຶກຊ່ວຍຈໍາການຮ່ວມມືລະຫ່ວາງສອງແຂວງ ສາລະວັນ(ລາວ)ແລະແຂວງກຽນຢາງ(ຫວຽດນາມ ) ໃນວັນທີ 10 ຕຸລາ 2018ທີ່​ຜ່ານ​ມານີ້,​ແຂວງ​ສາລະ​ວັນ​ໄດ້​ຮັບ​ກຽດ​ເປັນ​ເຈົ້າພາບຈັດ​ກອງ​ປະຊຸມ​ ສະຫຼຸບ​ການຈັດຕັ້ງປະຕິບັດ​ການ​ຮ່ວມ​ມື 2 ປີ, ​ເຊິ່ງກອງ​ປະຊຸມ​ໄດ້​ຈັດ​ຂຶ້ນ​ທີ່ຫ້ອງປະຊຸມ VIP ຊັ້ນ 2 ສະໂມສອນ​ໃຫຍ່ຂອງແຂວງສາລະ​ວັນ, ຄະນະຜູ່ແທນອົງການປົກຄອງແຂວງ ສາລະວັນນໍາໂດຍ ທ່ານ ສີສຸວັນ ວົງຈອມສີ ກຳມະການສູນກາງພັກ, ເລຂາພັກ – ເຈົ້າແຂວງໆສາລະວັນ ເປັນຫົວໜ້າຄະນະ( ຝ່າຍລາວ ) ແລະ ທ່ານ ນ ດັ້ງ ຕວ໋ຽນ ແອມ ຮອງເລຂາພັກແຂວງ, ຜູ່ປະຈໍາການຄະນະບໍລິຫານພັກແຂວງ, ປະທານປະຊາຊົນແຂວງ, ເປັນຫົວໜ້າຄະນະ( ຝ່າຍຫວຽດນາມ ).

ກອງປະຊຸມໃນຄັ້ງນີ້, ທັງສອງຝ່າຍໄດ້ທົບທວນຄືນການຈັດຕັ້ງຜັນຂະຫຍາຍເນື້ອໃນຈິດໃຈບົດບັນທຶກຊ່ວຍຈໍາທີ່​ໄດ້​ເຊັນ​ກັນ ​ໃນຄັ້ງທີວັນທີ 17 ສິງຫາ 2018 ຢູ່​ແຂວງ​ກຽນຢາງ ​ແລະ ປືກສາຫາລືກັນ ກ່ຽວກັບທິດທາງການຮ່ວມມືໃນ 2 ປີຕໍ່ໜ້າ. ​ເຊິ່ງທັງສອງຝ່າຍ ໄດ້ຕີລາຄາສູງ ຕໍ່ນໍ້າໃຈສູ້ຊົນຂອງຄະນະນໍາອົງການ, ພະແນກການ, ຂະແໜງການຂອງສອງແຂວງ ໃນການຈັດຕັ້ງປະຕິບັດບົດບັນທຶກຮ່ວມມື, ແຈ້ງໃຫ້ກັນຊາບໂດຍຫຍໍ້ກ່ຽວກັບສະພາບການພັັດທະນາເສດຖະກິດ – ສັງຄົມຂອງແຕ່ລະແຂວງ, ຕີລາຄາຄືນຜົນສໍາເລັດ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດບົດບັນທຶກການຮ່ວມມື ຕະຫຼອດໄລຍະ 2 ປີ.

ໃນຕອນທ້າຍກອງ​ປະຊຸມ​ໄດ້ເຊັນບົດບັນທຶກລົງນາມຮ່ວມກັນທັງສອງແຂວງ ​ໃນ​ນັ້ນ: ​ໄດ້​ລົງ​ນາມ​ຮ່ວມ​ກັນ ລະຫ່ວາງການນໍາພະແນກກະສິກໍາ ແລະ ປ່າໄມ້ແຂວງສາລະວັນ ແລະ ພະແນກກະສິກໍາ ແລະພັດທະນາຊົນນະບົດແຂວງ ກຽນຢາງ ​ແລະ ລະຫວ່າງຕາງໜ້າອົງການປົກຄອງແຂວງສາລະວັນໂດຍ ທ່ານ ພູທົງ ຄໍາມະນີວົງ ຮອງເຈົ້າແຂວງ ແລະ ທ່ານ ນາງ ເລ ຖິມິງ ຝູ້ງ ຕາງໜ້າການນໍາແຂວງກຽນຢາງ  ​ໂດຍ​ມີ ຄະນະ​ຜູ້​ແທນ​ທັງ​ສອງ​ຝ່າຍ​ເຂົ້າຮ່ວມ​ເປັນ​ສັກຂີ​ພິຍານ.