ສະຫາຍ ປະລິນຍາເອກ ຄໍໍາພັນ ພົມມະທັດ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກ, ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງ ສາລະວັນ.

ເພື່ອ​ເຮັດ​ໃຫ້ການ​ຜັນ​ຂະຫຍາຍ​ມະຕິ​, ຄຳ​ສັ່ງ​ຂອງ​ສູນ​ກາງ ກໍ​ຄື​ຂອງ​ແຂວງ​ເຂົ້າສູ່​ລວງ​ເລິກ ​ແລະ ​ແທດ​ເຖິງ​ຮາກ​ຖານ​ຕົວ​ຈິງຫຼາຍ​ຂຶ້ນ, ໃນຕອນເຊົ້າ ວັນທີ 26 ພຶດສະພາ 2019 ທີ່ຫ້ອງປະຊຸມພິເສດສະໂມສອນຂອງແຂວງ ສະຫາຍ ປອ ຄໍາພັນ ພົມມະທັດ ກຳມະການ​ກົມການເມືອງສູນ​ກາງ​ພັກ, ຄະນະເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກ, ພ້ອມ​ດ້ວຍ​ຄະນະ, ​ໄດ້​ລົງ​ເຄື່ອນ​ໄຫວ​ຢ້ຽມຢາມ ​ແລະ ​​ເຮັດວຽກຢູ່ແຂວງສາລະວັນ. ​ເຊິ່ງ​ໃຫ້​ກຽດ​ຕ້ອນຮັບຈາກຄະນະນໍາຂອງແຂວງຢ່າງອົບອຸ່ນ.

​ໃນ​ໂອກາດ​ເຄື່ອນ​ໄຫວ​ຢ້ຽມຢາມ​ຄັ້ງນີ້, ສະຫາຍ ປະລິນຍາເອກ ຄໍາພັນ ພົມມະທັດ ກຳມະການ​ກົມການເມືອງສູນ​ກາງ​ພັກ, ຄະນະເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກ, ກໍ​ໄດ້ ຮັບ​ຟັງການລາຍງານ ການກະກຽມເນື້ອໃນກອງປະຊຸມໃຫຍ່ຂອງອົງຄະນະພັກແຂວງ, ອົງຄະນະພັກເມືອງ, ຂັ້ນພະແນກການ ແລະ ຮາກຖານພັກທຸກໜ່ວຍ, ການຈັດຕັ້ງປະຕິບັດ, ແຜນພັດທະນາເສດຖະກິດ – ສັງຄົມ ຂອງປະຊາຊົນບັນດາເຜົ່າກໍຄືແຂວງສາລະວັນ ​ທີ່​ສະ​ເໜີ​ໂດຍ: ສະຫາຍ ສີເຮັງ ຫອມສົມບັດ ຄະນະປະຈໍາ​ພັກແຂວງ ຫົວໜ້າຄະນະໂຄສະນາອົບຮົມແຂວງ ໄດ້ລາຍງານການກະກຽມເນື້ອໃນກອງປະຊຸມໃຫຍ່ອົງຄະນະພັກໃນແຕ່ລະຂັ້ນ.

ຕອນ​ທ້າຍ ສະຫາຍ ປະລິນຍາເອກ ຄໍາພັນ ພົມມະທັດ ກຳມະການ​ກົມການເມືອງສູນ​ກາງ​ພັກ, ຄະນະເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກ, ກໍໄດ້ໃຫ້ກຽດໂອ້ລົມ ​ໂດຍ​ເນັ້ນໜັກ ​ໃຫ້​​ເອົາ​ໃຈ​ໃສ່​ວຽກ​ງານ​ການ​ສຶກສາ​ອົບຮົມ​ແນວ​ຄິດ,  ​ເອົາ​ໃຈ​ໃສ່ປຸກລະດົມສ້າງເງື່ອນໄຂໃຫ້ລູກຫຼານໄດ້ເຂົ້າເຖິງການສືກສາ, ຕິດ​ພັນ​ກັບ​ການຜັນຂະຫຍາຍແນວທາງນະໂຍບາຍຂອງພັກ, ສ້າງວຽກເຮັດງານທໍາໃຫ້ແກ່ປະຊາຊົນໃນຂົງເຂດບໍລິການ ແລະ ການຜະລິດ ເປັນຕົ້ນ ການຜະລິດກະສິກຳ ແລະ ຫັດຖະກຳ ເປັນການສົ່ງອອກກັບທີ່ ແລະ ກະຈາຍລາຍໄດ້ໄປສູ່ທ້ອງຖິ່ນ ກໍຄືເຂດຊົນນະບົດຫ່າງໄກສອກຫຼີກ, ຖືເອົາການພັດທະນາ ແລະ ແນວທາງປ້ອງກັນຊາດ – ປ້ອງກັນຄວາມສະຫງົບ, ການ​ພັດທະນາເສດຖະກິດ ​ແລະ  ວັດທະນະທຳ – ສັງຄົມ; ​ເຂັ້ມງວດສະກັັດກັ້ນບັນດາປະກົດການຫຍໍ້ທໍ້ຕ່າງໆ ເພື່ອກະກຽມໃຫ້ແກ່ກອງປະຊຸມໃຫຍ່ຂອງອົງຄະນະພັກແຂວງໃນຄັ້ງຕໍ່ໄປ.