ສະຫະພັນແມ່ຍິງຮາກຖານຫ້ອງວ່າການແຂວງສາລະວັນ ສະຫຼຸບຂະບວນການແຂ່ງຂັນ 3 ດີ ຄັ້ງທີ II ປະຈຳປີ 2018 ແລະ ສືບຕໍ່ຂະບວນການແຂ່ງຂັນ 3 ດີ ປີ 2019.

ໃນຕອນບ່າຍ ຂອງວັນທີ 7 ກັນຍາ 2018 ທີ່​ຜ່ານ​ມາ​ນີ້, ທີ່ຫ້ອງປະຊຸມຊັ້ນ III ຂອງຫ້ອງວ່າການແຂວງ ສະຫະພັນ​ແມ່ຍິງ​ຮາກ​ຖານ​ຫ້ອງ​ວ່າການ​ແຂວງ​ໄດ້​​ເປີດ​ກອງ​ປະຊຸມ​ສະຫຼຸບ​ຂະ​ບວນການ​ແຂ່ງຂັນ 3 ດີ​​ ເປັນຄັ້ງທີ II ​ແລະ ສືບ​ຕໍ່​ຂະ​ບວນການ​ແຂ່ງຂັນ​ປີ 2018. ໂດຍພາຍໃຕ້ການເປັນປະທານ​ຂອງ​ ທ່ານ​ ນາງ ​ເນ​ດ ນຳ​ມະ​ວົງ ປະທານ​ສະຫະ​ພັນ​ແມ່ຍິງ​ຮາກ​ຖານ​ຫ້ອງ​ວ່າການ​ແຂວງ, ​ໃຫ້​ກຽດ​ເຂົ້າ​ເປັນປະທານຮ່ວມຂອງ ທ່ານ ປອ ສະໄໝ ໂພທິສານ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການແຂວງສາລະ​ວັນ, ທ່ານ ນາງ ວາດສະໜາ ໂພໄຊຍະວົງ ຮອງປະທານຄະນະບໍລິຫານງານສະຫະພັນແມ່ຍິງແຂວງ, ມີ​ຫົວໜ້າ​ຂະ​ແໜງ – ຮອງ​ຂະ​ແໜງ​ການ​ຂອງ​ຫ້ອງ​ວ່າການ​ແຂວງ, ຄະນະໜ່ວຍ​ສະຫະພັນ​ແມ່ຍິງ​ອ້ອມ​ຂ້າງ​ໃກ້​ຄຽງ, ອົງການ​ຈັດຕັ້ງພາ​ຄື ( ຊາວ​ໜຸ່ມ, ກຳມະບານ ) ​ແລະ ສະມາຊິກ​ສະຫະ​ພັນ​ແມ່ຍິງ​ພາຍ​ໃນ​ຮາກ​ຖານ​​ເຂົ້າຮ່ວມ​ຢ່າງ​ພ້ອມພຽງ.
ກອງປະຊຸມ​ໄດ້​ຮັບ​ຟັງ​ບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງໜ່ວຍຕະຫຼອດໄລຍະ 1 ປີ          (2017-2018) ທີ່ຜ່ານມາ  ​ເຊິ່ງຜ່ານການ​ປະ​ເມີນສາມາດຄັດເລືອກສະມາຊິກ 3 ດີ ປະເພດ 1 ຄັ້ງທີ I – II ໄດ້ 29 ສະຫາຍເທົ່າກັບ 100 %, ໃນນັ້ນມີບຸກຄົນ 3 ດີ ປະເພດ 1 ຄັ້ງທີ I ຈຳນວນ 13 ສະຫາຍ  ແລະ ບຸກຄົນ 3 ດີ ປະເພດ 1 ຄັ້ງທີ II  ຈຳນວນ 16 ສະຫາຍ. ທັງ​ໝົດ​ໄດ້​ຮັບ​ໃບຢັງຢືນ 3 ດີ ​ຈາກ​ຄະນະ​ພັກ​ຮາກ​ຖານ​ຫ້ອງ​ວ່າການ​ແຂ​ວງ, ສະຫະພັນ​ແມ່ຍິງ​ຮາກ​ຖານ​ຫ້ອງ​ວ່າການ​ແຂວງ​ໄດ້​ກາຍ​ເປັນ​ຮາກ​ຖານ 3 ດີ​ເປັນຄັ້ງທີ 2. ຈາກນັ້ນ ກໍໄດ້ມີການເປີດຂະບວນການ 3 ດີ ​ແລະ ຈັບ​ມືແຂ່ງຂັນ ໃນສົກປີ 2018 – 2019 ມີ​ສະມາຊິກ​ສະຫະພັນ​ແມ່ຍິງ​ເຂົ້າຮ່ວມ​ທັງ​ໝົດ 33 ສະຫາຍ, ​ໄດ້​ວາງ​ຄາດໝາຍ​ຈັດ​ຕັ້ງປະຕິບັດ​ໃຫ້​ໄດ້ 100%.
ຕອນທ້າຍຜູ້ເຂົ້າຮ່ວມຍັງໄດ້ຮັບຟັງການໂອ້ລົມຈາກ ທ່ານ ປອ ສະໄໝ ໂພທິສານ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການແຂວງສາລະ​ວັນ ແລະ ທ່ານ ນາງ ວາດສະໜາ ໂພໄຊຍະວົງ ຮອງປະທານ ຄະນະບໍລິຫານງານສະຫະພັນແມ່ຍິງແຂວງ, ​ເຊິ່ງທັງ​ສອງ​ທ່ານ ກໍ​ໄດ້​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່​ຜົນງານ​ທີ່​ເອື້ອຍນ້ອງ​ສະຫະພັນ​ແມ່ຍິງ​ຮາກ​ຖານ​ຫ້ອງ​ວ່າການ​ແຂວງ​ຍາດ​ມາ​ໄດ້ ​ແລະ ຮັກສາ​ມູນ​ເຊື້ອ ພ້ອມ​ທັງຮຽກຮ້ອງໃຫ້ຄະນະ​ປະທານ – ສະມາຊິກສະຫະພັນແມ່ຍິງພາຍໃນໜ່ວຍ ​ເອົາ​ໃຈ​ໃສ່​ໃນ​ການ​ສືບ​ຕໍ່​ພັດທະນາ​ອົງການ​ຈັດຕັ້ງ​ແມ່ຍິງ ​ແລະ ​ເພື່ອ​ຮອງ​ຮັບ​ໃຫ້​​ແກ່​ຄວາມ​ຮຽກຮ້ອງ​ຕ້ອງການ​ຂອງ​ໜ້າທີ່​ວຽກ​ງານ​ໃນ​ໄລຍະ​ໃໝ່, ​ໂດຍ​ສະ​ເພາະລະດັບການສຶກສາທາງ​ດ້ານ​ທິດ​ສະ​ດີ ​ແລະ ວິຊາ​ສະ​ເພາະ, ສຶກສາອົບຮົມວຽກ​ງານການເມືອງ – ແນວຄິດ, ສ້າງທຸກເງື່ອນໄຂໃຫ້ແມ່ຍິງໄດ້ຮັບການພັດທະນາໃນທຸກດ້ານ, ເຕົ້າໂຮມຄວາມສາມັກຄີພາຍ​ໃນ​ເອື້ອຍ​ນ້ອງ​ແມ່ຍິງໃຫ້ເປັນ ປຶກແຜ່ນແໜ້ນໜາ ​ເພື່ອພ້ອມກັນ ຈັດຕັ້ງປະຕິບັດຂໍ້ແຂ່ງຂັນ 3 ດີ ໃຫ້ບັນລຸຕາມລະດັບຄາດໝາຍທີ່ວາງໄວ້.