ສະຫະພັນກໍາມະບານຮາກຖານ ຫ້ອງວ່າການປົກຄອງແຂວງ ສຳເລັດກອງປະຊຸມໃຫ່ຍຄັ້ງທີ V ຂອງຕົນ.

ໃນ​​ຕອນ​ເຊົ້າ ເວລາ 8:00 ​ໂມງ, ຂອງ​ວັນ​ທີ 2 ກຸມພາ 2018 ທີ່​ຜ່ານ​ມາ​ນີ້, ທີ່​ຫ້ອງ​ປະຊຸມ​ຊັ້ນ III ຂອງຫ້ອງ​ວ່າການ​ປົກຄອງ​ແຂວງ ສາລະ​ວັນ​ ໄດ້ເປີດກອງປະຊຸມໃຫຍ່ຄັ້ງທີ V ຂອງສະຫະ​ພັນກໍາມະບານຮາກຖານຫ້ອງ​ວ່າການ​ປົກຄອງ​ແຂວງຂື້້ນ, ​ໂດຍການເປັນປະທານ ຂອງສະຫາຍ ບົວຜັນ ສິນລະປະກິດປະທານສະຫະພັນກໍາມະບານຮາກຖານ​ຫ້ອງ​ວ່າການ​ປົກຄອງ​ແຂວງ​ສາລະ​ວັນ​, ໃຫ້ກຽດເປັນປະທານຮ່ວມຂອງ ສະຫາຍ ປອ ສະໄໝ ໂພທິສານ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການປົກຄອງແຂວງ ແລະ ສະຫາຍ ຄໍາປ່ຽນ ອັກຊັງຕິນ ຮອງປະທານກໍາມະບານແຂວງ. ມີ​ຄະນະ​ປະທານ​ສະຫະພັນກໍາມະບານອ້ອມຂ້າງໃກ້ຄຽງ, ອົງການຈັດຕັ້ງສະຫະພັນແມ່ຍິງ, ຊາວໜຸ່ມ ​ແລະ ສະມາຊິກ​ສະຫະພັນ​ກຳມະບານຫ້ອງວ່າການປົກຄອງແຂວງ ເຂົ້າຮ່ວມທັງໝົດ 43 ທ່ານ, ຍິງ 15 ທ່ານ.

ກອງປະຊຸມໄດ້ຮັບຟັງບົດລາຍງານການເມືອງ ​ແລະ ທິດ​ທາງ​ແຜນການ, ພ້ອມ​ທັງ​ປະກອບ​ຄຳ​ເຫັນ, ນອກ​ນັ້ນ, ຍັງ​ໄດ້​ຮັບ​ຟັງ​ການຜ່ານບົດສໍາຫຼວດລວມຂອງຄະນະໜ່ວຍສະຫະພັນກໍາມະບານຮາກຖານຫ້ອງວ່າການປົກຄອງແຂວງຕະຫຼອດ​ສະ​ໄໝ​ທີ IV. ພ້ອມ​ດຽວ​ກັນ, ກອງປະຊຸມຍັງໄດ້ມອບປື້ມ ສະມາຊິກກໍາມະບານລາວ 5 ເປັນເຈົ້າ ​ເພື່ອ​ເປີດ​ຂະ​ບວນການ​ສຳລັບ​ປີ 2018. ​ເພື່ອ​ສືບ​ຕໍ່​ໃນ​ສະ​​ໄໝ​ທີ V ກອງປະຊຸມໄດ້ໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະ​ໜ່ວຍກໍາມະບານຮາກຖານຫ້ອງວ່າການປົກຄອງແຂວງຊຸດໃໝ່ ເພື່ອສຶບຕໍ່ນໍາພາໃນຕໍ່ໜ້າປະກອບມີ 3 ສະຫາຍ ຄື: ສະຫາຍ ສົມຄິດ ວົງສາລີ ເປັນປະທານ; ສະຫາຍ ສົມໃຈ ບຸດສະຫະນິມິດ ເປັນຮອງປະທານ; ສະຫາຍ ນ ແສງອໍາພອນ ຊາວົງໄຊ ຮອງປະທານ ທັງເປັນປະທານກວດກາຂອງ​ໜ່ວຍ​ສະຫະພັນ​ກຳມະບານ​ຮາກ​ຖານ​ຫ້ອງ​ວ່າການ​ປົກຄອງ​ແຂວງ.

ໃນຕອນທ້າຍນີ້ ກອງປະຊຸມໄດ້ຟັງການໂອ້ລົມ ​ແລະ ຊີ້ທິດເຍືອງທາງຈາກສະຫາຍ ຄໍາປ່ຽນ ອັກຊັງຕິນ ຮອງ​ປະທານ​ສະຫະພັນ​ກຳ​ມະ​ບານ​ແຂວງ ແລະ ສະຫາຍ ປອ ສະໄໝ ໂພທິສານ ກຳມະການ​ພັກ​ແຂວງ, ​ເລຂາ​ຄະນະ​ພັກ​ຮາກ​ຖານ, ຫົວໜ້າ​ຫ້ອງ​ວ່າການ​ປົກຄອງ​ແຂວງ, ເຊິ່ງທັງສອງສະຫາຍກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້,​ແຕ່​ເພື່ອ​ເຮັດ​​ໃຫ້​ວຽກ​ງານ​ກຳມະບານ​ຮາກ​ຖານ​ຫ້ອງ​ວ່າການ​ມີ​ຂະ​ບວນການດີຂື້ນ​ກວ່າ​ເກົ່າ​ໃນ​ຕໍ່ໜ້າຕ້ອງໄດ້ເພີ່ມທະວີວຽກງານການສຶກສາອົບຮົມການເມືອງແນວຄິດ, ລົງ​ເລິກ ​ແລະ ສອດ​ຫ້ອຍ​ກັບ​ວຽກ​ງານ​ວິຊາ​ສະ​ເພາະ​, ຍົກ​ລະດັບ​ດ້ານ​ວິຊາ​ການ ​ແລະ ຄວາມ​ເປັນ​ເຈົ້າການ, ສ້າງ​ເງື່ນ​ໄຂ​ໃຫ້​ມີການຝຶກອົບຮົມຢູ່​ຂັ້ນສູ​ນກາງ ​ແລະ ລະຫວ່າງ​ແຂວງ, ສ້າງ​ແຜນ​ງານ, ​ໂຄງການຕິດພັນກັບການ​ສ້າງ​ໜ່ວຍ​ພັກ​ເຂັ້ມ​ແຂງ- ຮຸ້ນຳພາ​ຮອບດ້ານ​ຂອງ​ໜ່ວຍ​ພັກ, ຕິດ​ພັນກັບ 2 ອົງການຈັດຕັ້ງພາຄີ ຊາວ​ໜຸ່ມ, ​​ແມ່ຍິງ  ຕ້ານປະກົດການຫຍໍ້ທໍ້ຕ່າງໆ, ກໍາແໜ້ນພາລະບົດບາດ ແລະ ສິດໜ້າທີ່ຂອງຕົນ, ເອົາໃຈໃສ່ຕໍ່ການປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງ​ກຳມະບານໃຫ້ປະກົດຜົນເປັນຈິງ.