ສະຫະພັນກໍາມະບານຮາກຖານຫ້ອງວ່າການແຂວງ ສະຫຼຸບຂະບວນແຂ່ງຂັນ 5 ເປັນເຈົ້າປະຈຳປີ 2018 ແລະ ເປີດຂະບວນແຂ່ງຂັນປະຈຳປີ 2019.

ໃນ​​ຕອນ​ເຊົ້າ ຂອງ​ວັນ​ທີ 7 ກັນຍາ 2018 ​ນີ້, ທີ່​ຫ້ອງ​ປະຊຸມ​ຊັ້ນ III ຂອງຫ້ອງ​ວ່າການແຂວງ ສາລະ​ວັນ​ ສະຫະພັນ​ກຳມະການ​ຮາກ​ຖານ​ຫ້ອງ​ວ່າການ​ແຂວງໄດ້ສະຫຼຸບຂະບວນການແຂ່ງຂັນ 5 ເປັນເຈົ້າ ປະຈໍາປີ 2018 ແລະ ເປີດຂະບວນການແຂ່ງຂັນ ປະຈຳ​ປີ 2019. ​ໂດຍການເປັນປະທານ ຂອງ ສະຫາຍ ສົມຄິດ ວົງສາລີ ປະທານສະຫະພັນກໍາມະບານຮາກຖານ​ຫ້ອງ​ວ່າການ​ ແຂວງ​ສາລະ​ວັນ​, ຮອງຫົວໜ້າຫ້ອງວ່າການແຂວງ ​​ໃຫ້​ກຽດ​ເຂົ້າຮ່ວມ​ເປັນ​ຄະນະ​ປະທານ​ໂດຍ ສະຫາຍ ປອ ສະໄໝ ໂພທິສານ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການແຂວງ ແລະ ສະຫາຍ ຈິດຕະກອນ ສາຍສະໝຸດ ຮອງປະທານກໍາມະບານແຂວງ. ມີ​ຄະນະ​ປະທານ​ສະຫະພັນກໍາມະບານຮາກ​ຖານອ້ອມຂ້າງໃກ້ຄຽງ, ອົງການຈັດຕັ້ງສະຫະພັນແມ່ຍິງ, ຊາວໜຸ່ມ ​ແລະ ສະມາຊິກ​ສະຫະພັນ​ກຳມະບານຫ້ອງວ່າການແຂວງ ເຂົ້າຮ່ວມທັງໝົດ 51 ທ່ານ, ຍິງ 15 ທ່ານ.
ກອງປະຊຸມໄດ້ຮັບຟັງບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈໍາປີ 2018 ແລະ ວາງ​ທິດ​ທາງ​ແຜນການປະຈໍາປີ 2019 ​​ເຊິ່ງ​ໄດ້​ຍົກ​ໃຫ້​ເຫັນ​ບັນດາ​ຜົນງານ​ການ​ເຄື່ອນ​ໄຫວ​ຕະຫຼອດ​ໄລຍະ 7 ​ເດືອນ​ຜ່ານ​ມາ ​ແລະ ​ເພື່ອ​ເປັນ​ການ​ຢັ້ງຢືນ​ຕໍ່​ຜົນງານ​ດັ່ງກ່າວ ຄະນະ​ພັກ​ຮາກ​ຖານ​ຫ້ອງ​ວ່າການ​ແຂວງ​ກໍ​ໄດ້ມອບປື້ມຕິດຕາມ​ເພື່ອຢັ້ງຢືນບຸກຄົນ 5 ​ເປັນ​ເຈົ້າໃຫ້ສະມາຊິກກໍາມະບານຮາກຖານຫ້ອງວ່າການແຂວງຜູ້​ທີ່​ມີ​ຜົນງານ​ດີ​ເດັ່ນ​ໃນ​ຂະ​ບວນການ ​ເຊິ່ງ​ໄດ້​ກາຍ​ເປັນ​ເງື່ອນ​ໄຂ​ໃຫ້​ສະຫະພັນ​ກຳມະບານ​ຮາກ​ຖານ​ຫ້ອງ​ວ່າການ​ກາຍ​ເປັນ​ກຳມະນະກໍາມະບານຮາກຖານ 5 ​ເປັນ​ເຈົ້າສະ​ໄໝ​ທີ 1.
ໃນຕອນທ້າຍນີ້ ກອງປະຊຸມຍັງໄດ້ຟັງການໂອ້ລົມຈາກ ສະຫາຍ ປອ ສະໄໝ ໂພທິສານ ກຳມະ ການ​ພັກ​ແຂວງ, ​ເລຂາ​ຄະນະ​ພັກ​ຮາກ​ຖານ, ຫົວໜ້າ​ຫ້ອງ​ວ່າການ​ແຂວງ ​ແລະ ທ່ານ ຈິດຕະກອນ ສາຍສະໝຸດ ຮອງປະທານກໍາມະບານແຂວງ  ເຊິ່ງທັງສອງສະຫາຍກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້, ​ແຕ່​ເພື່ອ​ເຮັດ​​ໃຫ້​ວຽກ​ງານ​ກຳມະບານ​ຮາກ​ຖານ​ຫ້ອງ​ວ່າການ​ມີ​ຂະ​ບວນການ​ກວ່າ​ເກົ່າ​ໃນ​ຕໍ່ໜ້າຕ້ອງໄດ້ເພີ່ມທະວີວຽກງານການສຶກສາອົບຮົມການເມືອງແນວຄິດ, ລົງ​ເລິກ ​ແລະ ສອດ​ຫ້ອຍ​ກັບ​ວຽກ​ງານ​ວິຊາ​ສະ​ເພາະ​, ຍົກ​ລະດັບ​ດ້ານ​ວິຊາ​ການ ​ແລະ ຄວາມ​ເປັນ​ເຈົ້າການ, ສ້າງ​ເງື່ອນ​ໄຂ​, ສ້າງ​ແຜນ​ງານ, ​ໂຄງການຕິດພັນກັບການ​ສ້າງ​ໜ່ວຍ​ພັກ​ປອດ​ໃສ, ​ເຂັ້ມ​ແຂງ, ໜັກ​ແໜ້ນ​ຂອງ​ພັກ, ​ເດັດຂາດຕ້ານປະກົດການຫຍໍ້ທໍ້ຕ່າງໆ, ກໍາແໜ້ນພາລະບົດບາດ ແລະ ສິດໜ້າທີ່ຂອງຕົນ, ເອົາໃຈໃສ່ຕໍ່ການປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງ​ກຳມະບານໃຫ້ປະກົດຜົນເປັນຈິງ. ນອກ​ນັ້ນ, ຄະນະໜ່ວຍພັກ, ຄະນະກໍາມະບານຮາກ​ຖານຫ້ອງວ່າການແຂວງ ຕ້ອງ​ໄດ້ຊ່ວຍກັນຊີ້ນໍາ – ນໍາພາຢ່າງໃກ້ຊິດ ຊຸກຍູ້ຜັກດັນໃຫ້ການຈັດຕັ້ງກໍາມະບານຮາກ​ຖານ​ໄດ້ເຄື່ອນ​ໄຫວຢ່າງເຕັ້ມສ່ວນ ຕາມພາລະບົດບາດ ກໍຄືການຈັດຕັ້ງວຽກງານຕ່າງໆທີ່ພັກ – ລັດມອບໝາຍໃຫ້ມີ​ຜົນສຳ​ເລັດ ​ແລະ ທ່ວງທັນຕາ​ມກຳນົດ​​ເວລາ​ທີ່​ວາງ​ໄວ້.