ມວນຊົນຊາວແຂວງສາລະວັນຕ້ອນຮັບຄະນະນັກກິລາ ກັບມາຈາກການແຂ່ງຂັນງານມະຫາກຳກິລາແຫ່ງຊາດ ຄັ້ງທີ X ທີ່ແຂວງອຸດົມໄຊ

ຕອນ​ເຊົ້າ​ຂອງ​ວັນ​ທີ 23 ທັນວາ 2014 ນີ້ຄະນະ​ນຳ​ຂອງ​ແຂວງ,​ ພະນັກງານ, ທະຫານ,​ ຕຳຫຼວດ, ຄູ​ອາຈານ, ນັກຮຽນຮູ້ນັກ​ສຶກສາຕະຫຼອດຮອດ​ພໍ່​ແມ່​ປະຊາຊົນ​ເທດສະບານ​ເມືອງ​ສາລະ​ວັນ ​ໄດ້​ອອກ​ຕ້ອນຮັບ​ຄະນະ​ນັກ​ກິລາ​ຂອງ​ແຂວງ​ສາລະ​ວັນທີ່​ກັບ​ມາ​ຈາກ​ການ​ແຂ່ງຂັນ​ງານ​ມະຫາ​ກຳ​ກິລາ​ແຫ່ງ​ຊາດຄັ້ງ​ທີ X ທີ່​ແຂວງ​ອຸດົມ​ໄຊ ​ເຊິ່ງ​ໄດ້​ຈັດ​ຂຶ້ນ​ໃນ​ລະຫວ່າງ​ວັນ​ທີ 13-21 ທັນວາ 2014 ທີ່​ຜ່ານ​ມາ​ນີ້ຢ່າງ​​ເປັນ​ຂະ​ບວນການ​ຟົດ​ຟື້ນ ​ແລະ ອົບ​ອຸ່ນ.​ ​ແຂວງ​ສາລະ​ວັນ​​ໄດ້​ຈັດ​ສົ່ງ​ນັກ​ກິລາ​ເຂົ້າ​ຮ່ວມ​ການ​ແຂ່ງຂັນ​ທັງໝົດ 12 ປະ​ເພດຄື: ກະຕໍ້​ຊາຍ, ​ເປ​ຕັງ​ຊາຍ-ຍິງ, ​ແລ່ນ-ລານ​ຊາຍ, ກ໊ອຟຊາຍ, ມວຍ​ສາກົນ​ຊາຍ​-ຍິງ, ມວຍ​ປໍ້ຳຍິງ, ມວຍ​ຄາ​ຣາ​ເຕ​ໂດ​ຊາຍ-ຍິງ​, ດອກ​ປີກ​ໄກ່​ຊາຍ-ຍິງ ​ແລະໝາກ​​ແລ້​ຊາຍ-ຍິງ. ມີ​ນັກ​ກິລາ ​ແລະຄະນະ​ນຳ​ເຂົ້າ​ຮ່ວມ​ທັງໝົດ 131 ຄົນ, ຍິງ 27 ຄົນ. ຜ່ານ​ການ​ເຂົ້າ​ຮ່ວມ​ການ​ແຂ່ງຂັນ​ນັກ​ກິລາ​ແຂວງ​ສາລະ​ວັນ​ຂອງ​ພວກ​ເຮົາສາມາດ​ຍາດຫຼຽນລາງວັນ​ໄດ້ 22 ຫຼຽນຄື: 03 ຫຼຽນຄຳ, 08 ຫຼຽນ​ເງີ​ນ ​ແລະ 11 ຫຼຽນທອງ. ພ້ອມ​ກັນ​ນັ້ນ, ​ແຂວງ​ສາລະ​ວັນ​ກໍ່​ໄດ້​ຈັດ​ເປັນ​ລະ​ດັບ​ທີ 14 ​ໃນ​ຈຳນວນ​ຄະນະ​ນັກ​ກິລາ​ເຂົ້າ​ຮ່ວມ​ທັງໝົດ 25 ພາກສ່ວນ.

ອັນ​ນີ້​ໄດ້​ສະ​ແດງ​ເຖິງ​ຄວາມ​ພາກພູມ​ໃຈ ​ແລະຜົນງານ​​ທີ່​ນັກ​ກິລາ​ແຂວງ​ສາລະ​ວັນ​ ຂອງ​ພວກ​ເຮົາ​ຍາດ​ມາ​ໄດ້. ຜົນງານ​ດັ່ງກ່າວ​ແມ່ນ​ໄດ້​ມາຍ້ອນ​ຄວາມ​ເອົາ​ໃຈ​ໃສ່ ​ຊີ້​ນຳ-ນຳພາ​ ຢ່າງ​ໃກ້ຊິດຕິດ​ແທດ​ຂອງ​ຄະນະ​ພັກ​ອຳນາດ​ການ​ປົກຄອງ​ທຸກ​ຂັ້ນບວກ​ກັບ​ຄວາມ​ເປັນ​ເຈົ້າ​ການ ​ແລະ​ ຄວາມ​ຕັດສິນ​ໃຈ​ໃສ່​ສູງ​ຂອງ​ນັກ​ກິລາ​ແຕ່ລະ​ປະ​ເພດ.