SONY DSC

ພິທີ ໂຮມຊຸມນຸມ ສະເຫຼີມສະຫຼອງ ວັນສະຖາປານາ ສປປ ລາວ ຄົບຮອບ 40 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 95 ປີ ( 13 ທັນວາ 1920 – 13 ທັນວາ 2015 )

ຕອນເຊົ້າ ຂອງວັນທີ 9 ທັນວາ 2015 ເລີ່ມແຕ່ເວລາ 5 : 00 ຫາ 7 : 00 ໂມງ, ໄດ້ມີການໂຮມຊຸມນຸມມິດຕິງ ເພື່ອ ສະເຫຼີມສະຫຼອງ ວັນສະຖາປານາ ສປປ ລາວ ຄົບຮອບ 40 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 95 ປີ ( 13 ທັນວາ 1920 – 13 ທັນວາ 2015 ) ຢູ່ທີ່ເດີ່ນສະໂມສອນໃຫຍ່ຂອງແຂວງ ( ເດີ່ນສະໜາມແດງ ), ພິທີຄັ້ງນີ້ ໃຫ້ກຽດການເປັນຄະນະປະທານໂດຍທ່ານ ພົທ ແສງນວນ ໄຊຍະລາດ, ເລຂາທິການສູນກາງພັກ, ລັດຖະມົນຕີວ່າການ ກະຊວງປ້ອງກັນປະເທດ, ທ່ານ ສີສຸວັນ ວົງຈອມສີ ເລຂາຄະນະບໍລິຫານງານພັກ ແຂວງ, ເຈົ້າແຂວງໆ ສາລະວັນ, ທ່ານ ຄຳບຸ່ນ ດ້ວງປັນຍາ ກຳມະການສູນກາງພັກ, ອາດີດເລຂາພັກແຂວງ, ອາດີດເຈົ້າແຂວງໆ ສາລະວັນ, ພະນັກງານບຳນານອາດີດການນຳ ພ້ອມດ້ວຍບັນດາຄະນະປະຈຳພັກແຂວງ ແລະ ພຣະອາຈານ. ນອກຈາກນີ້ ຍັງມີບັນດາຄະນະພັກການນຳຂັ້ນແຂວງ, ເມືອງ, ຫົວໜ້າ – ຮອງຫົວໜ້າພະແນກການ, ອໍານວຍການພາກລັດວິສະຫະກິດຕ່າງໆ, ຄອບຄົວການນໍາ, ສະມາຊິກພັກ, ພະນັກງານ, ທະຫານ, ຕ່ຳຫຼວດ, ນັກຮຽນຮູ້ປັນຍາຊົນ, ຄູ – ອາຈານ, ນັກທຸລະກິດ, ຊາວຄ້າຂາຍ ແລະ ພີ່ນ້ອງປະຊາຊົນທົ່ວເທດສະບານແຂວງ ສາລະວັນ ກໍໄດ້ເຂົ້າຮ່ວມ ເປັນຈຳນວນ 7827 ທ່ານ, ຍິງ 4403 ທ່ານ.

ງານໂຮມມິດຕິງໃນຄັ້ງນີ້ ທ່ານ ພູທົງ ຄຳມະນີວົງ ຄະນະປະຈຳພັກແຂວງ, ຮອງເຈົ້າແຂວງ ຜູ້ຊີ້ນຳວຽກງານວັດທະ ນະທຳ – ສັງຄົມ ກໍໄດ້ໃຫ້ກຽດຂຶ້ນຜ່ານບົດປະຊາມະຕິງານໂຮມຊຸມນຸມມິດຕິງສະເຫຼີມສະຫຼອງ ວັນສະຖາປານາ ສປປ ລາວ ຄົບຮອບ 40 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 95 ປີ ແລະ ໄດ້ກ່າວຈຸດປະສົງສະເໜີແຂກເຂົ້າຮ່ວມ.
ພາຍຫຼັງທີ່ເຄົາລົບທຸງແລ້ວ ທ່ານ ສີສຸວັນ ວົງຈອມສີ ເລຂາຄະນະບໍລິຫານງານພັກແຂວງ, ເຈົ້າແຂວງໆ ສາລະວັນ ກໍ ໄດ້ຂຶ້ນກ່າວຄຳປາໃສຕໍ່ງານຊຸມນຸມມິດຕິງ ເຊິ່ງເຕັມໄປດ້ວຍເນື້ອໃນອັນເລິກເຊິ່ງ, ມີຄວາມໝາຍໜັກແໜ້ນ ແລະ ທົບທວນຫວນຄືນໂດຍຫຍໍ້ ປະຫວັດຄວາມເປັນມາມູນເຊື້ອການຕໍ່ສູ້ຂອງປະຊາຊົນບັນດາເຜົ່າພາຍໃຕ້ການນຳພາອັນສະຫຼາດສ່ອງໃສ ຂອງພັກປະຊາຊົນ ປະຕິວັດລາວ ເພື່ອປົດປ່ອຍປະເທດຊາດ ແລະ ສະຖາປະນາ ສປປ ລາວ ຂຶ້ນໃນວັນຊາດ ທີ 2 ທັນວາ 1975 ໃນບົດປາໃສຍັງໄດ້ກ່າວເຖິງຜົນງານ ແລະ ຄຸນງາມຄວາມດີຂອງປະທານ ໄກສອນ ພົມວິຫານ ເຊິ່ງ ແມ່ນຜູ້ນຳທີ່ແສນເຄົາລົບຮັກຂອງປະຊາຊົນລາວ, ຜູ້ນຳຂອງພັກ – ລັດທິປີຊາສາມາດ, ສະຫຼາດສ່ອງໃສ. ຕະຫຼອດໄລຍະ 40 ປີ ແຫ່ງການປົກປັກຮັກສາ ແລະ ສ້າງລະບອບໃໝ່ ພາຍຫຼັງ ທີ່ພັກໄດ້ວາງແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກປະເທດຊາດໄດ້ກ້າວເຂົ້າສູ່ສັກກະລາດໃໝ່ແຫ່ງການຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ ໂດຍສະເພາະ ແຂວງ ສາລະວັນ ຂະບວນວິວັດແຫ່ງ ການເຕີບໃຫຍ່ຂະຫຍາຍຕົວ, ຜົນສຳເລັດໃນການປົກປັກຮັກສາ ແລະ ພັດທະນາຂອງແຂວງ ໃນ 40 ປີ ຜ່ານມາ ແລະ ຍັງໄດ້ມີການພົ້ນເດັ່ນໃນແຕ່ໄລຍະ.

ມາຮອດປະຈຸບັນນີ້ ແຂວງສາລະວັນໄດ້ກ້າວເຂົ້າໄລຍະຫັນເປັນອຸດສາຫະກໍາ ແລະ ທັນສະໄໝ, ປະຕິບັດໂຄງການຮ່ວມມືອາຊຽນ, ກະສິກໍາປ່າໄມ້ມີການຂະຫຍາຍຕົວແຮງ ແລະ ຫັນປ່ຽນຢ່າງຕັ້ງໜ້າການຜະລິດເຂົ້າ, ກາເຟຄຸນນະພາບ, ສາລີມັນຕົ້ນ, ຢາງພະລາ…ເພີ້ມຂຶ້ນຢ່າງເປັນຂະບວນຕອບສະໜອງຄວາມຕ້ອງການພາຍໃນ ແລະ ການສົ່ງອອກ. ພື້ນຖານໂຄງລ່າງການທ່ອງທ່ຽວໄດ້ຮັບການພັດທະນາມີໂຮງແຮມ ຮ້ານອາຫານເກີດຂື້ນຫຼວງຫຼາຍ, ອຸດສາຫະກໍາມີເຂື່ອນໄຟຟ້າເຊເສັດ 2, ໂຮງງານປຸງແຕ່ງແປ້ງມັນຕົ້ນ, ອົບແຫ້ງສາລີ, ໂຮງງານຊີມັງ, ການຂຸດຄົ້ນບໍ່ຖ່ານຫີນ, ສໍາເລັດການກໍ່ສ້າງເສັ້ນທາງ 15 ສາລະວັນ – ນາປົ່ງ, ສາລະວັນ – ຊາຍແດນຫວຽດນາມລະບົບຖາວອນ ແລະ ປະຕິບັດ ມະຕິ ເລກທີ 09 / ກມສພ ແລະ ຄໍາສັ່ງ ເລກທີ 13/ນຍ ຢ່າງແຂງແຮງກ່ຽວກັບວຽກງານພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກຂອງປະຊາຊົນ,ສ້າງບ້ານ ແລະ ກຸ່ມບ້ານພັດທະນາ, ຍົກລະດັບດ່ານຊາຍແດນເປັນດ່ານສາກົົນ. ດ້ານການສຶກສາໄດ້ປະກາດຈົບຊັ້ນປະຖົມບໍາລຸງໃນທົ່ວແຂວງ ແລະ ປະກາດຈົບຊັ້ນມັດທະຍົມລະບົບບໍາລຸງຢູ່ 3 ຕົວເມືອງ, ໂຮງໝໍແຂວງໄດ້ຍົກລະດັບໄປສູ່ຄວາມທັນສະໄໝເປັນໃຈກາງຂອງການປິ່ນປົວ ແລະ ການບໍລິການດ້ານສຸຂະພາບໃຫ້ແກ່ປະຊາຊົນໃນທົ່ວແຂວງປະຊາຊົນມີອາຍຸຍຶນສະເສ່ຍເພີ່ມຂື້ນເປັນ 65 ປີ. ການປະຕິບັດນະໂຍບາຍການແກ້ໄຂສັງຄົມ ມີຫຼາຍດ້ານໄດ້ຮັບການປັບປຸງດີຂື້ນ ເປັນຕົ້ນ: ວຽກງານການພັດທະນາສີມືແຮງງານ ແລະ ການຈັດຫາວຽກເຮັດງານທໍາ, ສິດ – ຜົນປະໂຫຍດດ້ານສະຫວັດດີການຂອງຜູ່ອອກແຮງງານໄດ້ຮັບການປົກປ້ອງທາງກົດໝາຍ, ລະບົບປະກັນສັງຄົມໄດ້ປຸງປຸງເປັນຢ່າງດີ, ການປະຕິບັດນະໂຍບາຍຕໍ່ຜູ່ມີຜົນງານ – ຄຸນງາມຄວາມດີຕໍ່ການປະຕິວັດຊາດມີຈໍານວນເພີ່ມຂຶ້ນ, ການຊ່ວຍເຫຼືອສົງເຄາະຜູ່ປະສົບໄພພິບັດຕ່າງໆ ແລະ ຜູ່ດ້ອຍໂອກາດໄດ້ຮັບການປົກປ້ອງ, ເບິ່ງແຍງດູແລຢ່າງເໝາະສົມຕາມເງື່ອນໄຂຕົວຈິງ.

ການພັດທະເສດຖະກິດ – ສົງຄົມ ໃນໄລຍະ 40 ປີນັບແຕ່ມື້ສ້າງລະບອບໃໝ່ ລະ ບອບປະຊາທິປະໄຕ ປະຊາຊົນ ມານີ້ແຂວງພວກເຮົາໄດ້ມີການພັດທະນາຮອບດ້ານເຊື່ອມຈອດກັບປະເທດເພື່ອນບ້ານທັງຕາເວັນອອກ ແລະ ຕາເວັນຕົກ, ສ້າງບ້ານພັດທະນາໄດ້ 145 ບ້ານ, ບ້ານວັດທະນະທໍາໄດ້ 204 ບ້ານ, ບ້ານແບບຢ່າງທາງດ້ານສາທາລະນະສຸກໄດ້ 71 ບ້ານ, ຄອບຄົວທຸກຍາ​ກ​ຫລຸດລົງຍັງເຫຼືອ 7, 58 %, ໄດ້ເຕົ້າໂຮມບ້ານນ້ອຍເຂົ້າເປັນບ້ານໃຫ່ຍ ຈາກ 724 ບ້ານໃນເມື່ອກ່ອນ ຍັງເຫຼືອ 582 ບ້ານ, ບ້ານ​ໃຫ່ຍຈໍານວນ​ໝຶ່ງ​ໄດ້​ກາຍ​ເປັນ​ໃຈກາງ​ເສດຖະກິດ – ສັງຄົມ ແລະກໍ່ຕົວ​ເປັນຮູ​ບຮ່າງຂອງ​ຕົວ​ເມືອງນ້ອຍ​ນັບມື້ຫຼາຍຂື້ນ. ​​ເຮັດໃຫ້ໂສມໜ້າຂອງຊົນນະບົດປ່ຽນແປງໃໝ່,​ ແບບແຜນການຜະລິດເສດຖະກິດ ແລະ ແບບແຜນດໍາລົງຊິວິດ ການເປັນຢູ່ມີການປ່ຽນແປງຢ່າງຕັ້ງໜ້າ.​ ຂະ​ບວນການສ້າງສາພັດທະນາຄອບຄົວ ແລະ ສັງຄົມໄດ້ຫັນໄປສູ່ອັນໃໝ່ ແລະຖືກທິດຕາມຂະບວນການແຂ່ງຂັນຮັກຊາດ ແລະ ພັດທະນາ…ການກໍ່ສ້າງພະນັກງານ, ລັດຖະກອນໃນທົ່ວແຂວງໃນ 40 ປີໄດ້ທັງໝົດ 7768 ຄົນ, ຍິງ 3296 ຄົນ, ພື້ນຖານເສດຖະກິດການ​ຂະຫຍາຍຕົວສະເລ່ຍ​ 11 % ຕໍ່​ປີ ລາຍໄດ້ສະເລ່ຍຫົວຄົນຮອດປະຈຸບັນ ບັນລຸໄດ້ 1170 ໂດລາ / ຄົນ / ປີ.

ສັງລວມແລ້ວ 40 ປີ ແຫ່ງການປົກປັກຮັກສາ ແລະ ສ້າງສາລະບອບໃໝ່ ພາຍໃຕ້ການນຳພາຂອງອົງຄະນະພັກແຂວງໃນແຕ່ລະສະໄໝ, ແຂວງສາລະວັນໄດ້ມີການພັດທະນາ ແລະ ກ້າວເດີນຢ່າງໜັກແໜ້ນ ສູ່ຈຸດໝາຍປາຍທາງທີ່ວາງໄວ້ ສາມາດຢືນຢັນດ້ວຍຄວາມພາກພູມໃຈວ່າ: ບໍ່ມີຍຸກໃດ, ສະໄໝໃດ ທີ່ປະເທດຊາດກໍ່ຄືແຂວງສາລະວັນ ທີ່ແສນຮັກຂອງພວກເຮົາ ໄດ້ມີຄວາມຮົ່ມເຢັນເປັນສຸກ, ໄດ້ຮັບການພັດທະນາກ້າວໜ້າ ຄືຊູ່ມື້ນີ້ ແລະ ມີຫລັກການຂອງພັກ,ອອກແຮງບຸກບືນສູ້ຊົນສ້າງສາພັດທະນາແຂວງສາລະວັນຕາມທິດຍືນຍົງ ແລະ ສີຂຽວ, ໃຫ້ກ້າວໜ້າຂະຫຍາຍຕົວໄປຢ່າງບໍ່ຢຸດຢັ້ງ, ສ້າງຖ່ວງທ່າ ແລະ ບັນດາປັດໃຈອັນຈຳເປັນ ໃນການສູ້ຊົນຈັດຕັ້ງປະຕິບັດຄາດໝາຍ ໂດຍສະເພາະມະຕິ VIIIຂອງອົງຄະນະພັກແຂວງ ເພື່ອພ້ອມກັນຫຼຸດພົ້ນຈາກສະຖານະພາບດ້ອຍພັດທະນາ.

ຕ້ອນທ້າຍ ທ່ານ ສີສຸວັນ ວົງຈອມສີ ເລຂາຄະນະບໍລິຫານງານພັກ, ເຈົ້າແຂວງໆ ສາລະວັນ ກໍໄດ້ສະແດງຄວາມຂອບອົກຂອບໃຈຕໍ່ການນຳພາຂອງພັກທີ່ສະຫງ່າລາສີທີ່ສຸດ ໃນປະຫວັດສາດແຫ່ງການຄົງຕົວ ແລະ ຂະຫຍາຍຕົວຂອງຊາດລາວເຮົາ.​ ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ປວງຊົນເຮົາ ຈົ່ງພ້ອມກັນອອກແຮງເສີມຂະຫຍາຍໝາກຜົນທີ່ຍາດມາໄດ້. ດ້ວຍການສືບຕໍ່ຈັດຕັ້ງປະຕິບັດສອງໜ້າທີ່ຍຸດທະສາດ, ດຳເນີນພາລະກິດປ່ຽນແປງໃໝ່ຢ່າງແຂງແຮງ, ສືບຕໍ່ສ້າງ ແລະ ບູລະນະລະບອບປະຊາທິປະໄຕປະຊາຊົນ, ສ້າງບັນດາປະຖົມປັດໃຈ ເພື່ອກ້າວຂື້ນສູ່ສັງຄົມນິຍົມ, ກ້າວເຂົ້າສູ່ອະນາຄົດອັນສົດໃສຂອງປະເທດຊາດ ຢ່າງມີໃຊ, ພາຍໃຕ້ບັນຍາກາດໃໝ່, ເພື່ອຄວາມຈະເລີນພັດທະນາຂອງປະເທດຊາດ, ເພື່ອຄວາມຮັ່ງມີຜາສຸກຂອງປະຊາຊົນລາວບັນດາເຜົ່າ, ເພື່ອສັງຄົມທີ່ມີຄວາມສາມັກຄີປອງດອງ, ປະຊາທິປະໄຕ, ຍຸດຕິທຳ ແລະ ສີວິໄລນັ້ນ, ປະຊາຊົນລາວບັນດາເຜົ່າແຂວງສາລະວັນ ຈົ່ງສາມັກຄີກັນ, ອາດຫານກ້າວຂຶ້ນ! ມາຮອດເວລາ 7: 00 ໂມງພິທີໂຮມຊຸມ ນຸມມິດຕິງໃຫຍ່ກໍໄດ້ອັດລົງຢ່າງຈົບງານ.