ພິທີ ສະເຫຼີມສະຫຼອງວັນສົນທິສັນຍາວ່າດ້ວຍ: ສິດທິເດັກ (ຄົບຮອບ 25 ປີ)

ຕອນ​ເຊົ້າ ​ເວລາ 8:00 ​ໂມງ ຂອງ​ວັນ​ທີ 14 ມັງກອນ 2015 ຜ່ານ​ມາ​ນີ້ ຫ້ອງ​ວ່າການ​ປົກຄອງ​ແຂວງ​ສາລະ​ວັນ​ໄດ້​ຈັດ​ພິທີ ສະ​ເຫຼີມສະຫຼອງວັນສົນທິສັນຍາ ວ່າ​ດ້ວຍ: ສິດທິ​ເດັກ ຄົບຮອບ 25 ປີ (20/11/1989-20/11/2014) ທີ່​ຫ້ອງ​ປະຊຸມ​ຊັ້ນ III ຫ້ອງວ່າການປົກຄອງແຂວງສາລະວັນ. ພາຍໃຕ້ການເປັນປະທານຂອງ ທ່ານ ດຣ ສະໄໝ ໂພທິສານ ຄະນະພັກຮາກຖານ, ຮອງຫົວໜ້າຫ້ອງວ່າການປົກຄອງແຂວງສາລະວັນ, ເຊິ່ງມີຫົວໜ້າຫ້ອງການ, ຮອງຫ້ອງການໃນສັງກັດແລະພະນັກ ງານ-ລັດຖະກອນເຂົ້າຮ່ວມຈຳນວນ 41 ທ່ານ, ຍິງ 21 ທ່ານ. ພິທີສະເຫຼີມສະຫຼອງຄັ້ງນີ້ ໄດ້ດຳເນີນຕາມວາລະຢ່າງຄົບຖ້ວນ ເຊິ່ງມີເອກະສານ ຈຳນວນ 4 ສະບັບ ທີ່ນຳມາເຜີຍແຜ່ ເພື່ອໃຫ້ຜູ້ເຂົ້າຮ່ວມໄດ້ຮັບຟັງ ແລະເຊື່ອມຊືມ ຄື:

– ເອກະສານ 25 ປີແຫ່ງການຈັດຕັ້ງປະຕິບັດສົນທິສັນຍາວ່າດ້ວຍ: ສິດທິເດັກ (ວັນທີ 20 ພະຈິກ).
– ເອກະສານໂອ້ລົມຂອງທ່ານອາຊາງລາວລີກຳມະການກົມການເມືອງສູນກາງພັກ, ຮອງນາຍົກລັດຖະມົນຕີແຫ່ງສປປລາວເນື່ອງໃນໂອກາດສະເຫຼີມສະຫຼອງວັນສົນທິສັນຍາວ່າດ້ວຍ: ສິດທິເດັກຄົບຮອບ25 ປີ ທີ່ຫໍປະຊຸມແຫ່ງຊາດ.
– ເອກະສານດຳເນີນງານແຫ່ງຊາດກ່ຽວກັບການປ້ອງກັນແລະລຶບລ້າງຄວາມຮຸນແຮງຕໍ່ເດັກ (2014-2020).
– ເອກະສານສົນທິສັນຍາວ່າດ້ວຍ: ສິດທິເດັກ.
ຕອນທ້າຍ ທ່ານ ປະທານ ຍັງໄດ້ມີຄຳເຫັນຊີ້ນຳຕື່ມບາງດ້ານທີ່ຕ້ອງເອົາໃຈໃສ່ ຄື: ຫ້ອງວ່າການປົກຄອງແຂວງ ກໍ່ຄືຫ້ອງການໃນສັງກັດ ຕ້ອງໄດ້ນຳເອົາເນື້ອໃນຈິດໃຈຂອງ ເອກະສານນີ້ ໂດຍສະເພາະແມ່ນບັນດາແຜນງານ, ໂຄງການໃນຕໍ່ໜ້າ ກ່ຽວກັບວຽກງານສິດທິເດັກ ໃຫ້ສອດຫ້ອຍເຂົ້າໃນທຸກແຜນງານ-ທຸກໂຄງການຂອງຂະແໜງການ, ໜ່ວຍງານທັງວຽກພັກ-ວຽກລັດ. ເພື່ອເປັນການຢ້ຳຄືນໃຫ້ກຳແໜ້ນເນື້ອໃນຄາດໝາຍ ເຊິ່ງພວກເຮົາຕ້ອງໄດ້ເປັນຫົວໜ່ວຍໜຶ່ງໃນການຈັດຕັ້ງປະຕິບັດ; ຕ້ອງໄດ້ນຳ ເອົາເນື້ອໃນຈິດໃຈເອກະສານເຫຼົ່ານີ້ ໄປເຊື່ອມຊືມໃຫ້ເລິກເຊິ່ງ, ຫັນເອົາເປັນແນວຄິດ, ຫັນເອົາເປັນສະຕິໃນການດຳລົງຊີວິດ, ໃນຄອບຄົວ, ໃນການປະຕິບັດໜ້າທີ່ວຽກ ງານ, ໃນອົງການ-ສຳນັກງານໃຫ້ກວ້າງຂວາງ.