ພິທີ ມອບ-ຮັບ ໜ້າທີ່ ເລຂາພັກແຂວງ-ເຈົ້າແຂວງໆສາລະວັນ

ພິທີມອບ-ຮັບໜ້າທີ່ເລຂາພັກແຂວງ, ເຈົ້າແຂວງໆສາລະວັນ ລະຫວ່າງ ທ່ານ ຄຳບຸ່ນ ດ້ວງປັນຍາ ກຳມະການສູນກາງພັກ, ເລຂາພັກ ແຂວງ, ເຈົ້າແຂວງໆສາລະວັນຜູ້ເກົ່າ ແລະ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆສາລະວັນຜູ້ໃໝ່ ໄດ້ຈັດຂື້ນຢ່າງ ເປັນທາງການ ໃນຕອນເຊົ້າຂອງວັນທີ 10 ສີງຫາ 2015 ຢູ່ທີ່ສະໂມສອນໃຫຍ່ຂອງແຂວງສາລະວັນ ໂດຍໃຫ້ກຽດເຂົ້າຮ່ວມຂອງ ທ່ານ ດຣ ບຸນປອນ ບຸດຕະນະວົງ ກໍາມະການກົມການ ເມືອງສູນກາງພັກ, ຮອງນາຍົກລັດຖະມົນຕີ ແລະ ມີບັນດາທ່ານ ຄະນະ ປະຈຳພັກແຂວງ, ກຳມະການພັກແຂວງ, ຫົວໜ້າພະແນກການ, ອົງການທຽບເທົ່າອອ້ມຂ້າງແຂວງ ກໍ່ໄດ້ເຂົ້າຮ່ວມ.
ໂອກາດນີ້ ທ່ານ ນາງ ວິໄລວັນ ພິມສະຫວັດ ຕາງໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານລັດ ຖະດຳລັດຂອງປະທານປະເທດ ສະ ບັບເລກທີ ​​​053/ປປທ, ລົງວັນທີ 29 ກໍລະກົດ 2015 ແລະ ລັດຖະດຳລັດຂອງປະທານປະເທດ ສະບັບເລກທີ 108/ປປທ, ລົງວັນ ທີ 31 ກໍລະກົດ 2015 ວ່າດ້ວຍ: ການແຕ່ງຕັ້ງເຈົ້າແຂວງໆສາລະວັນ.
ໃນໂອກາດດຽວກັນນີ້ ທ່ານ ຄຳບຸ່ນ ດ້ວງປັນຍາ ກຳມະການສູນກາງພັກ, ເລຂາພັກ, ເຈົ້າແຂວງໆສາລະວັນຜູ້ເກົ່າ ກໍ່ໄດ້ລາຍງານຕະ ຫຼອດໄລຍະ 12 ປີ ທີ່ຜ່ານມາ ໄດ້ຄຽງບ່າຄຽງໄລ່ກັບບັນດາຄະນະນໍາຂອງແຂວງ, ເມືອງ ແລະ ອຳນາດການປົກຄອງທຸກຂັ້ນ ເຊີ່ງເຮັດ ໃຫ້ຄວາມສາມັກຄີພາຍໃນການນຳ, ພາຍໃນພັກ ແລະ ປະຊາຊົນທົ່ວແຂວງ ໄດ້ຮັບການຍົກສູງຂຶ້ນເປັນກ້າວໆ ໄດ້ກາຍເປັນການປະ ກອບສ່ວນອັນສຳຄັນ ເຂົ້າໃນການປົກປັກຮັກສາ ແລະ ພັດ ທະນາເສດຖະກິດ-ສັງຄົມຂອງແຂວງ ກ້າວຂຶ້ນຢ່າງໜັກແໜ້ນ, ເຮັດໃຫ້ເສດຖະກິດຂອງແຂວງສືບຕໍ່ຂະຫຍາຍຕົວຢ່າງຕໍ່ເນື່ອງ ເຮັດໃຫ້ລວມຍອດຜະລິດຕະພັນພາຍໃນເພີ່ມຂຶ້ນ 11,48%ຕໍ່ປີ. ໃນ ນັ້ນ; ຂະແໜງກະສິກຳ-ປ່າໄມ້ ເພີ່ມຂຶ້ນສະເລ່ຍ 5,58% ຕໍ່ປີ, ຂະແໜງອຸດສາຫະກຳເພີ່ມຂຶ້ນສະເລ່ຍ 15,66%ຕໍ່ປີ ແລະ ຂະແໜງ ບໍລິການເພີ່ມຂຶ້ນສະເລ່ຍ 15,51% ຕໍ່ປີ. ລາຍໄດ້ສະເລ່ຍຕໍ່ຫົວຄົນຕໍ່ປີ ບັນລຸໄດ້ 9,450,000 ກີບ ຫລື ເທົ່າກັບ 1,170 ໂດລາສະຫະ ລັດ ເພີ່ມຂຶ້ນ 3 ເທົ່າຕົວທຽບໃສ່ປີ 2003.
ຈາກນັ້ນ; ທ່ານເລຂາພັກແຂວງ, ເຈົ້າແຂວງໆສາລະວັນຜູ້ໃໝ່ ກໍ່ໄດ້ກ່າວຮັບໜ້າທີ່ຕຳແໜ່ງ ເຊີ່ງທ່ານໄດ້ກ່າວວ່າ: ເພື່ອສືບຕໍ່ເຮັດສຳ ເລັດໜ້າທີ່ ທີ່ໄດ້ມອບໝາຍໃຫ້ນີ້, ຂ້າພະເຈົ້າພ້ອມດ້ວຍພະນັກງານການນຳ, ພະນັກງານຫຼັກແຫຼ່ງພາຍໃນແຂວງ ຈະສຸມທຸກສະຕິປັນ ຍາ-ເຫື່ອແຮງ ຈົນສຸດຄວາມສາມາດຂອງຕົນ ເພື່ອປະກອບສ່ວນເຂົ້າໃນໜ້າທີ່ວຽກງານ ພ້ອມທີ່ຈະຄຽງບ່າຄຽງໄລ່ກັບໜູ່ຄະນະ, ສືບຕໍ່ເຕົ້າໂຮມຄວາມສາມັກຄີພາຍໃນພັກ, ພະນັກງານ ກຳລັງປະກອບອາວຸດ ແລະປະຊາຊົນບັນດາເຜົ່າ, ໃຫ້ມີຄວາມໜັກແໜ້ນ ເຂັ້ມແຂງ, ສູ້ຊົນຈັດຕັ້ງປະຕິບັດບັນດາຄາດໝາຍຕ່າງໆທີ່ພັກ ແລະ ລັດ ວາງອອກເວົ້າລວມ, ເວົ້າສະເພາະ ກໍ່ແມ່ນບັນດາຄາດໝາຍ ທີ່ໄດ້ກຳນົດໄວ້ຢູ່ໃນມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແແຂວງ ເພື່ອໃຫ້ບັນລຸຕາມຄາດໝາຍທີ່ວາງໄວ້.
ໂອກາດດັ່ງກ່າວ ທ່ານ ດຣ ບຸນປອນ ບຸດຕະນະວົງ ກຳມະການກົມການເມືອງສູນກາງພັກ, ຮອງນາຍົກລັກຖະມົນຕີ ກໍໄດ້ໃຫ້ກຽດ ໂອ້ລົມ ພ້ອມທັງໃຫ້ທິດຊີ້ນຳໃນການປະຕິບັດວຽກງານໃນແຕ່ລະດ້ານ ເພື່ອເຮັດໃຫ້ການພັດທະນາເສດ ຖະກິດ-ສັງຄົມ ຢູ່ແຂວງສາລະວັນສືບຕໍ່ຂະຫຍາຍຕົວຢ່າງບໍ່ຢຸດຢັ້ງ.
ພິທີໄດ້ດຳເນີນມາຮອດເວລາ 11.00 ໂມງ ວັນດຽວກັນກໍ່ໄດ້ປິດລົງຢ່າງເປັນທາງການ.