ພິທີ ມອບ-ຮັບ ໜ້າທີ່ຫົວໜ້າຫ້ອງວ່າການປົກຄອງແຂວງສາລະວັນ ລະຫວ່າງ ຜູ້ເກົ່າ ແລະ ຜູ້ໃໝ່

ຕອນ​ບ່າຍ ​ເວລາ 14:30 ​ໂມງ ຂອງ​ວັນ​ທີ 12 ມິຖຸນາ 2015 ນີ້ ຢູ່​ທີ່​ຫ້ອງ​ປະຊຸມ​ຊັ້ນ III ຫ້ອງ​ວ່າການ​ປົກຄອງ​ແຂວງ​ສາລະ​ວັນ ​ໄດ້​ຈັດ​ພິທີ ມອບ-ຮັບ ໜ້າທີ່​ຫົວໜ້າຫ້ອງ​ວ່າກາ​ນ ປົກຄອງ​ແຂວງ​ສາລະ​ວັນ ລະຫວ່າງ ທ່ານ ສົມ​ເລັດ ຈູ​ລະ​ມະນີ ກຳມະການ​ພັກ​ແຂວງ, ຫົວໜ້າຫ້ອງ​ວ່າການ​ປົກຄອງ​ແຂວງສາລະ​ວັນ (ຜູ້​ເກົ່າ) ກັບ ທ່ານ ສະ​ໄໝ ​ໂພທິ​ສານ ຮັກສາ​ການ​ຫົວໜ້າຫ້ອງ​ວ່າການ​ປົກຄອງ​ແຂວງສາລະ​ວັນ (ຜູ້​ໃໝ່) ຂຶ້ນ​ຢ່າງ​ເປັນ​ທາງ​ການ. ​ໂດຍ​ໃຫ້ກຽດ​ເຂົ້າ​ຮ່ວມ ​ແລະ ​ເປັນ​ປະ ທານ​ຂອງ ທ່ານ ສີ​ເຮັງ ຫອມ​ສົມບັດ ກຳມະການ​ປະຈຳ​ພັກ​ແຂວງ, ຮອງ​ເຈົ້າ​ແຂວງໆສາລະ​ວັນ, ມີ​ບັນດາ​ຫົວ ໜ້າ-ຮອງຫົວໜ້າພະ​ແນ​ກການ​, ອົງການທຽບ​ເທົ່າ ອ້ອມ​ຂ້າງ​ແຂວງ, ຫົວໜ້າ-ຮອງ​ຫົວໜ້າຫ້ອງ​ວ່າການ​ປົກຄອງ​ເມືອງ 8 ຕົວ​ເມືອງ, ຫົວໜ້າຫ້ອງ ການ​ໃນ​ສັງກັດ ພ້ອມ​ດ້ວຍ​ພະນັກງານ​ລັດຖະກອນ​ຫ້ອງ​ວ່າການ​ປົກຄອງ​ແຂວງ ​ເຂົ້າ​ຮ່ວມ ຈຳນວນ 60 ທ່ານ, ຍິງ 7 ທ່ານ.

​ໃນ​ພິທີ​ ທ່ານ ສົມ​ເລັດ ຈູ​ລະ​ມະນີ ​ໄດ້ລາຍ​ງານຄືນ​ບັນດາ​ວຽກງານ​ຕ່າງໆ ທີ່​ໄດ້​ຈັດ​ຕັ້ງ​ປະຕິບັດ​ໃນ​ໄລຍະ​ຜ່ານ​ມາ​ຊ່ວງ​ທີ່​ມາປະຈຳການ ​ແລະ ດຳລົງຕຳ​ແໜ່ງ​ເປັນ​ຫົວໜ້າຫ້ອງ​ວ່າການ​ປົກຄອງ​ແຂວງຈົນ​ຮອດ​ປະຈຸ​ບັນ ​ແລະ ພ້ອມ​ທັງ​ໄດ້​ກ່າວ​ມອບໜ້າທີ່​ ​ແລະ ວຽກງານ​ຮອບດ້ານ ຂອງ​ຫ້ອງ​ວ່າການ​ປົກຄອງ​ແຂວງ​ສາລະ​ວັນໃຫ້ ​​ຜູ້​ຮັກສາ​ການ​ຫົວໜ້າຫ້ອງ​ວ່າການ​ປົກຄອງ​ແຂວງຄົນ​ໃໝ່ ​ເປັນ​ຜູ້​ສຶບຕໍ່​ຊີ້​ນຳໆພາ​ຈັດ​ຕັ້ງ​ປະຕິບັດ​ໃນ​ໄລຍະ​ຕໍ່​ໄປ ​ແລະ ທ່ານ ສະ​ໄໝ ​ໂພທິ​ສານ ກໍ່​ໄດ້​ຂຶ້ນ​ກ່າວ​ຮັບ​ເອົາໜ້າທີ່​ອັນ​ມີ​ກຽດດັ່ງກ່າວ. ພ້ອມ​ກັນ​ນັ້ນ, ທັງ​ສອງ​ທ່ານ​ກໍ່​ໄດ້​ຂຶ້ນ​ເຊັນ​ບົດ​ບັນທຶກ​ ມອບ-ຮັບ ໜ້າທີ່ ​ໂດຍຊ້ອງໜ້າປະທານ ​ແລະ ​ແຂກ​ທີ່​ເຂົ້າ​ຮ່ວມ​ກອງ​ປະຊຸມ​.

ຫຼັງຈາກ​ນັ້ນ, ທ່ານ ສີ​ເຮັງ ຫອມ​ສົມບັດ ກຳມະການ​ປະຈຳ​ພັກ​ແຂ​ວງ, ຮອງ​ເຈົ້າ​ແຂວງ ກໍ່​ໄດ້​ໂອ້​ລົມ ​ແລະ ມີ​ຄຳ​ຄິດ​ຄຳ​ເຫັນ​ຕໍ່​ກອງ​ປະຊຸມ. ​​ໃນ​ນັ້ນ, ທ່ານ​ໄດ້​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່​ບັນດາຜົນງານ ທີ່​ຫ້ອງ​ວ່າການ​ປົກຄອງ​ແຂວງ​ສາ ລະ​ວັນ ຍາດ​ມາ​ໄດ້​ໃນ​ໄລຍະ​ຜ່ານ​ມາ ​ເຊິ່ງ​ມັນ​ໄດ້​ສະ​ແດງ​ເຖິງ​ຄວາມ​ເອົາ​ໃຈ​ໃສ່​ຊຸກຍູ້ ​ແລະ ຊີ້​ນຳ-ນຳພາ​ ຂອງ​ຫົວໜ້າຫ້ອງ​ວ່າການ​ປົກຄອງ​ແຂວງ (ຜູ້​ເກົ່າ) ​ໂດຍ​ສະ​ເພາະ​ແມ່ນ​ວຽກງານ​​ເປັນ​ເສນາ​ທິການ​ໃຫ້​ແກ່​ການ​ນຳ​ຂອງ​ແຂວງ. ນອກ ຈາກ​ນັ້ນ, ທ່ານ​ກໍ່​ຍັງ​ຮຽກຮ້ອງ​ໃຫ້​ຜູ້​ຮັກສາ​ການ​ຫົວໜ້າຫ້ອງ​ວ່າການ​ປົກຄອງ​ແຂວງ (ຜູ້​ໃໝ່) ຈົ່ງ​ສຶບຕໍ່​ຄົ້ນຄວ້າ​ຮ່ຳຮຽນ​ເອົາ​ບັນດາ​ບົດຮຽນທີ່​ດີ​ຈາກ​ຫົວໜ້າຫ້ອງ​ວ່າການ​ປົກຄອງ​ແຂວງ​ຜູ້​ເກົ່າ ​ແລະ ຄະນະ​ຫ້ອງ​ດ້ວຍ​ກັນ; ຈົ່ງ​ສຶບຕໍ່​ຊີ້​ນຳ-ນຳພາ​ວຽກງານ​ການ​ເມືອງ​-ແນວ​ຄິດ ​ໃຫ້​ແກ່​ອ້າຍ​ນ້ອງ​ພະນັກງານ ​ໂດຍຈັດ​ຕັ້ງ​ຄົ້ນຄວ້າ​ຮ່ຳຮຽນ ມະຕິ,​ ຄຳ​ສັ່ງ, ລະບຽບ ກົດ ໝາຍອື່ນໆ; ສຶບຕໍ່​ຄົ້ນຄວ້າ​ປະກອບ​ພະນັກງານ​ໃຫ້​ພຽງພໍ​ກັບ​ຄວາມ​ຕ້ອງການ, ຕຳ​ແໜ່ງງານ ​ແລະ ​ແທດ​ເໝາະກັບ​ສະພາບ​ຕົວ​ຈິງ; ​ເອົາ​ໃຈ​ໃສ່​ຄົ້ນຄວ້າ​ສ້າງ​ແຜນການດ້ານ​ຕ່າງໆ ​ເພື່ອ​ກະກຽມ​ໃສ່ຜົນສຳ​ເລັດ​ກອງ​ປະຊຸມ​ໃຫຍ່ຂອງ​ອົງຄະ​ນະ​ພັກ​ແຂວງ​ໃນ​ມໍ່ໆນີ້ ​ແລະ ທ່ານ​ກໍ່ຍັງ​ຮຽກຮ້ອງ​ໃຫ້​ມີ​ຄວາມ​ສາມັກຄີ​ເປັນ​ປຶກ​ແຜ່ນ​ໃນ​ບັນດາ​ພະນັກງານ​ດ້ວຍ​ກັນ ​ແລະ ພາຍ​ນອກ ​ໂດຍ​ສະ​ເພາະ​ແມ່ນ​ການ​ປະສານ​ສົມທົບ​ ລະຫວ່າງ ​ຫ້ອງ​ວ່າການ​ປົກຄອງ​ເມືອງ ​ແລະ ຫ້ອງ​ວ່າການ​ປົກຄອງ​ແຂວງ ​ໃຫ້​ມີ​ຄວາມຮັດແໜ້ນ ​ແລະ ກົມກຽວ ​ກັນຫຼາຍຂຶ້ນ​ກວ່າ​ເກົ່າ.

ຕອນ​ທ້າຍ ທ່ານ ສະ​​ໄໝ ​ໂພທິ​ສານ ຮັກສາ​ການ​ຫົວໜ້າຫ້ອງ​ວ່າການ​ປົກຄອງ​ແຂວງ ​ໄດ້​ຂຶ້ນ​ກ່າວ​ຮັບ​ເອົາ​ຄຳ​ໂອວາດ ຈາກ​ທ່ານ​ປະທານ ​ເພື່ອ​ນຳ​ໄປ​ຈັດ​ຕັ້ງ​ປະຕິບັດ ​ແລະ ຊີ້​ນຳ-ນຳພາ ພະນັກງານ​-ລັດຖະກອນ​ ທົ່ວ​ຫ້ອງ​ວ່າການ​ປົກຄອງ​ແຂວງ​ໃນ​ການ​ເປັນ​ເສນາ​ທິການ​​ໃຫ້​ແກ່​ການ​ນຳ​ຂ​ອງ​ແຂວງ​ຢ່າງ​ມີ​ຜົນສຳ​ເລັດ ​ແລະ ​ເກີດ​ດອກ​ອອກ​ຜົນ​ໃນ​ຕໍ່ໜ້າ.