ພິທີ ມອບ – ຮັບເຄື່ອງອຸປະຖໍາຈາກ ເລຂາທິການໃຫ່ຍ, ປະທານປະເທດແຫ່ງ ສປປ ລາວ ໃຫ້ແກ່ ໂຮງຮຽນມັດທະຍົມຊົນເຜົ່າ ແຂວງສາລະວັນ.

ໃນຕອນບ່າຍ ເວລາ 16:00 ໂມງ ຂອງວັນທີ 4 ມັງກອນ 2018 ໄດ້ມີພິທິມອບ – ​ຮັບເຄື່ອງອູປະຖຳຈາກ ເລຂາທິການໃຫ່ຍ, ປະທານປະເທດແຫ່ງ ສປປ ລາວ ໃຫ້ແກ່ ໂຮງຮຽນມັດທະຍົມຊົນເຜົ່າ ແຂວງສາລະວັນ,ເຊິ່ງໃຫ້ກຽດຕ່າງໜ້າມອບໂດຍສະຫາຍ ປອ ຄໍາຜາ ພິມມະສອນ ຮອງຫົວໜ້າຫ້ອງວ່າການສູນກາງພັກ.    

ຕ່າງໜ້າຄະນະພັກ, ອົງການປົກຄອງແຂວງເຂົ້າຮ່ວມໃນພິທີໂດຍ ສະຫາຍ ພູທົງ ຄໍາມະນີວົງ  ກຳມະການປະຈຳພັກແຂວງ, ຜູ້ຊີ້ນໍາວຽກງານວັດທະນະທໍາ – ສັງຄັມ. ເຊິ່ງໃນພິທີໄດ້ ຮັບຟັງການລາຍງານສະພາບການເຄື່ອນໄຫວ ແລະ ຄວາມເປັນມາຂອງໂຮງຮຽນຊົນເຜົ່າແຂວງສາລະວັນຈາກ ສະຫາຍ ສີລິສັກ ຖະໜອມຮັກ ກໍາມະການພັກແຂວງ, ຫົວໜ້າພະ​ແນ​ກ​ສືກສາທິການ ແລະ ກິລາແຂວງ. ການມອບເຄື່ອງອູປະຖຳໃນຄັ້ງນີ້ປະກອບມີ ເຄື່ອງຄອມພິວເຕີຕັ້ງໂຕະຈຳນວນ 10 ເຄື່ອງ ແລະ ໂນດບຸກຈຳນວນ 10 ເຄື່ອງ ລວມເປັນມູນຄ່າ: 100,000,000 ກີບ ( ໜື່ງຮ້ອຍລ້ານກີບ ) ເພື່ອນຳໃຊ້ເຂົ້າໃນການຮຽນ – ການສອນຂອງໂຮງຮຽນມັດທະຍົມຊົນເຜົ່າແຂວງສາລະວັນ, ທັງນີ້ ກໍຍ້ອນເຫັນໄດ້ຄວາມໝາຍ – ຄວາມສໍາຄັນຂອງວຽກງານການສຶກສາ ໂດຍສະເພາະຕໍ່ກັບວຽກງານການພັດທະນາການສຶກສາໃຫ້ແກ່ຊາວໜູ່ມ – ໄວໜູ່ມໃນຂົງເຂດຊົນນະບົດ ແລະ ຫ່າງໄກສອກຫຼີກທີ່ມີເງື່ອນໄຂໜ້ອຍ ໃຫ້ກາຍເປັນພະນັກງານ – ນໍາພາຜູ່ທີ່ສືບທອດໃນຂົງເຂດຊົນເຜົ່າ ແລະ ຊົນນະບົດ.