ພິທີ ປາຖະກະຖາວັນລັດຖະທຳມະນູນ ແລະ ວັນສ້າງຕັ້ງສານປະຊາຊົນ ແຫ່ງ ສປປ ລາວ 15 ສິງຫາ 1982 – 1991 – 15 ສິງຫາ 2015 ຄົບຮອບ 24 – 33 ປີ

ຕອນເຊົ້າ ວັນທີ 26 ສິງຫາ 2015 ເວລາ 8:00 – 10:00 ໂມງ ທີ່ຜ່ານມາ ຢູ່ທີ່ສະໂມສອນໃຫ່ຍແຂວງ ສາລະວັນ ໄດ້ຈັດພິທີປາ ຖະກະຖາລະນຶກວັນລັດຖະທຳມະນູນແຫ່ງຊາດ ແລະ ວັນສ້າງຕັ້ງສານປະຊາຊົນ; ພາຍໃຕ້ການເປັນປະທານຂອງ ທ່ານ ບຸນທຽມ ພົມມະສະຖິດ ຮອງເລຂາພັກແຂວງ, ປະທານສະພາແຫ່ງຊາດເຂດເລືອກຕັ້ງທີ 14 ແຂວງ ສາລະວັນ ມີບັນດາທ່ານຫົວໜ້າພະແນກການ, ອົງການທຽບເທົ່າອ້ອມຂ້າງແຂວງ, ທະຫານຕ່ຳຫຼວດ ພ້ອມດ້ວຍພະນັກງານ-ລັດຖະກອນ ເຂົ້າຮ່ວມຈຳນວນ 240 ທ່ານ. ເຊິ່ງ ທ່ານ ບຸນທຽມ ພົມມະສະຖິດ ຮອງເລຂາພັກແຂວງ, ປະທານສະພາແຫ່ງຊາດເຂດເລືອກຕັ້ງທີ 14 ແຂວງ ສາລະວັນ ກໍໄດ້ບັນລະຍາຍເອກະສານ ວັນປະກາດໃຊ້ລັດຖະທຳມະນູນ, ສ່ວນເອກະສານ ວັນສ້າງຕັ້ງສານປະຊາຊົນ ບັນລະຍາຍໂດຍ ທ່ານ ບຸນທຽມ ແກ້ວໄຊຍະວົງ ຄະນະປະຈຳພັກແຂວງ, ປະທານສານປະຊາຊົນແຂວງ ສາລະວັນ ໄດ້ຍົກໃຫ້ເຫັນສະພາບການຈັດຕັ້ງປະຕິບັດລັດຖະທຳມະນູນ – ກົດໝາຍ ແລະ ຕີລາຄາໄດ້ດ້ານດີ ແລະ ຜົນງານຫຼາຍປະການຕະຫຼອດໄລຍະ 24 – 33 ປີ ຜ່ານມາມີບາງຕອນທ່ານໃຫ້ຮູ້ວ່າ: ລັດຖະທໍາມະນູນເປັນກົດໝາຍພື້ນຖານຂອງຊາດ, ທັງເປັນການຫັນແນວທາງປ່ຽນແປງໃໝ່ຢ່າງຮອບດ້ານທີ່ມີຫຼັກການຂອງພັກປະຊາຊົນປະຕິວັດລາວ ມາເປັນກົດໝາຍພື້ນຖານຂອງລະບອບປະຊາທິປະໄຕ ປະຊາຊົນລາວ ເພື່ອສຶກສາອົບ ຮົມປະຊາຊົນລາວບັນດາເຜົ່າໃຫ້ຍົກສູງ, ມີນ້ຳໃຈຮັກຊາດຮັກລະບອບໃໝ່, ເພີ່ມທະວີຄວາມສາມັກຄີຂອງປວງຊົນລາວທັງຊາດ, ເຊີດຊູບົດບາດເປັນເຈົ້າການໃນການປົກປັກຮັກສາ ແລະ ສ້າງສາພັດນາປະເທດຊາດ ທັງເປັນຂີດໝາຍໃໝ່ແຫ່ງການຫັນໄປສູ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍເທື່ອລະກ້າວ, ສ່ອງແສງໃຫ້ເຫັນເຖິງລັກສະນະທາດແທ້ຂອງການເຕີບໃຫຍ່ຂະຫຍາຍຕົວຂອງລະບອບປະຊາທິປະໄຕ ປະຊາຊົນລາວ ພາຍໃຕ້ການນຳພາອັນຖືກຕ້ອງຂອງພັກທັງເປັນການຢັ້ງຢືນຕໍ່ໂລກກ່ຽວກັບຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນຂອງ ສປປ ລາວ. ລັດຖະທຳມະນູນແຫ່ງ ສປປ ລາວ ໃນດ້ານທາດແທ້ ກໍແມ່ນການສ້າງສະຕິຊາດ ເອກະພາບອັນໜຶ່ງອັນດຽວກັນ ພາຍໃຕ້ການນຳພາຂອງພັກ, ຮັບຮູ້ ແລະ ປົກປ້ອງການດຳລົງຄົງຕົວທີ່ບໍ່ຕັດແຍກອອກຈາກກັນໄດ້ຂອງປະຊາຊົນບັນດາເຜົ່າ, ເປັນພາຫະນະທີ່ສຳຄັນ ເພື່ອສຶກສາອົບຮົມປະຊາຊົນໃນການຍົກສູງນ້ຳໃຈຮັກຊາດ, ຮັກລະບອບປະຊາທິປະໄຕປະຊາຊົນ, ເພີ່ມທະວີຄວາມສາມັກຄີປອງດອງທົ່ວປວງຊົນທັງຊາດ, ເຊີດຊູບົດບາດ ແລະ ຄວາມສາມັກຄີເປັນເຈົ້າປະເທດຊາດຂອງປະຊາຊົນບັນດາເຜົ່າ ເພື່ອພ້ອມກັນສຸມທຸກກຳລັງແຮງ ແລະ ຄວາມສາມາດຂອງຕົນປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມແນວທາງການປ່ຽນແປງໃໝ່ ແນໃສ່ເຮັດໃຫ້ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ມີປະຊາທິປະໄຕ, ຍຸຕິທຳ ແລະ ສີວິໄລ.
ຄຽງຄູ່ກັນນັ້ນ, ກໍປາສະຈາກບໍ່ໄດ້ດ້ານອ່ອນ ແລະ ຂໍ້ຄົງຄ້າງບາງປະການທີ່ຕ້ອງເອົາໃຈໃສ່ແກ້ໄຂ ເປັນຕົ້ນ ກໍຄືການຫັນລັດຖະທຳມະ ນູນເປັນກົດໝາຍບໍ່ທັນກວ້າງຂວາງ ແລະ ເປັນລະບົບຄົບຊຸດກວມເອົາທຸກຂົງເຂດຊີວິດສັງຄົມ, ກົດໝາຍຈຳນວນໜຶ່ງທີ່ສ້າງຂຶ້ນພັດມີລັກສະນະຟ້າວຟັ່ງ, ບໍ່ແທດເໝາະກັບສະພາບຕົວຈິງເຮັດໃຫ້ການປະຕິບັດໄດ້ຍາກ ແລະ ເກີດມີສ່ອງຫວ່າງຈຳຕ້ອງໄດ້ປັບປຸງເລື້ອຍໆ ແລະ ອື່ນໆ ທີ່ພັກ – ລັດເຮົາຈະຕ້ອງໄດ້ເພີ່ມທະວີຄວາມຮູ້ – ຄວາມສາມາດເຂົ້າໃນການຄົ້ນຄວ້າຫັນເນື້ອໃນລັດຖະທຳມະ ນູນອອກເປັນກົດໝາຍ ໃຫ້ເປັນລະບົບຄົບຊຸດໃນຂົງເຂດຕ່າງໆ ຕິດພັນກັບການກວດກາຄືນ ແລະ ປັບປຸງກົດໝາຍທີ່ປະກາດໃຊ້ແລ້ວໃຫ້ສອດຄ່ອງກັບສະພາບການຕົວຈິງ.
ຕອນທ້າຍ, ທ່ານ ບຸນທຽມ ພົມມະສະຖິດ ຮອງເລຂາພັກແຂວງ, ປະທານສະພາແຫ່ງຊາດເຂດເລືອກຕັ້ງທີ 14 ແຂວງ ສາລະວັນ ຍັງເນັ້ນໃຫ້ພະນັກງານການນຳ, ພະນັກງານທຸກພາກສ່ວນທີ່ກ່ຽວຂ້ອງ ຈົ່ງສືບຕໍ່ເພີ່ມທະວີການໂຄສະນາສຶກສາອົບຮົມໃຫ້ພົນ ລະເມືອງລາວທຸກຄົນຮັບຮູ້ເຊື່ອມຊຶມ ແລະ ກຳແໜ້ນກ່ຽວກັບ ລັດຖະທຳມະນູນ ແລະກົດໝາຍຕ່າງໆ, ສ້າງເງື່ອນໄຂໃຫ້ເຂົາເຈົ້າປະ ຕິບັດກົດໝາຍຢ່າງເຂັ້ມງວດ, ຮູ້ນຳໃຊ້ກົດໝາຍ ເພື່ອປົກປ້ອງສິດຜົນປະໂຫຍດອັນຊອບທຳ ແລະ ປະຕິບັດພັນທະຂອງຕົນຢ່າງຖືກ ຕ້ອງ, ສ້າງສະຕິກົດໝາຍ ເຮັດໃຫ້ ທຸກຄົນເຄົາລົບ, ຮັບຮູ້ຢ່າງຖືກຕ້ອງກ່ຽວກັບທາດແທ້, ພາລະບົດບາດ ຂອງກົດໝາຍໃນລະບອບ ປະຊາທິປະໄຕ ປະຊາຊົນ ຕໍ່ການຄຸ້ມຄອງລັດ, ຄຸ້ມຄອງສັງຄົມ, ຕໍ່ຄອບຄົວ, ໝູ່ເພື່ອນ ແລະ ແຕ່ລະບຸກຄົນ; ອົງການໄອຍະການ, ສານປະຊາຊົນ, ຕ້ອງປະຕິບັດຄຳຕັດສິນຂອງສານ ແລະ ເຈົ້າໜ້າທີ່ສືບສວນ – ສອບສວນຂັ້ນຕ່າງໆ ເຊິ່ງເປັນຜູ້ປົກປ້ອງກົດໝາຍ ຕ້ອງດຳເນີນງານດ້ວຍຄວາມສຸຂຸມຮອບຄອບ, ທ່ຽງທຳ ເພື່ອປົກປ້ອງຄວາມຍຸຕິທຳ, ປົກປ້ອງຜົນປະໂຫຍດອັບຊອບທຳຂອງລັດ ແລະ ພົນລະເມືອງ ໂດຍຍຶດໜັ້ນໃນທິດນຳທີ່ວ່າ: ຜູ້ກະທຳຜິດຕ້ອງຖືກລົງໂທດຕາມກົດໝາຍ, ຜູ້ບໍ່ກະທຳຜິດແມ່ນບໍ່ຖືກລົງໂທດ ເພື່ອສ້າງລັດເຮົາໃຫ້ເປັນ ລັດແຫ່ງກົດໝາຍຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ.