ພິທີ ປາຖະກະຖາລະນຶກວັນຍຶດອຳນາດ ຄົບຮອບ 70 ປີ ແລະ 40 ປີ

ຕອນເຊົ້າ ຂອງວັນທີ 26 ສີງຫາ 2015 ນີ້ ຢູ່ທີ່ສະໂມສອນໃຫ່ຍແຂວງສາລະວັນ ໄດ້ຈັດພິທີ ປາຖະກະຖາ ລະນຶກວັນຍຶດອຳນາດຄົບຮອບ 70 ປີ ແລະ 40 ປີ (23 ສິງຫາ 1945 ແລະ 23 ສິງຫາ 1975 – 23 ສິງຫາ 2015 ). ໃຫ້ກຽດເຂົ້າຮ່ວມ ແລະ ເປັນປະທານ ໃນພິທີ ຄັ້ງນີ້ ໂດຍ ທ່ານ ຄຳຈັນ ແຈ່ມສະໝອນ ຄະນະປະຈຳພັກແຂວງ, ປະທານກວດກາພັກ – ລັດ, ມີບັນດາທ່ານຄະນະປະຈຳພັກແຂວງ, ພະແນກການ, ທະຫານຕ່ຳຫຼວດ ແລະ ພະນັກງານ – ລັດຖະກອນ ອ້ອມຂ້າງແຂວງ, ເຂົ້າຮ່ວມຈໍານວນ 240 ທ່ານ, ຍິງ 80 ທ່ານ. ເຊິ່ງ ທ່ານ ຄຳຈັນ ແຈ່ມສະໝອນ ຄະນະປະຈຳພັກແຂວງ, ປະທານກວດກາພັກ – ລັດ ໄດ້ຂື້ນເລົ່າມູນເຊື້ອ, ປະຫວັດຄວາມເປັນມາຂອງວັນຍຶດອຳນາດ ໃນແຕ່ລະໄລຍະ ເພື່ອໃຫ້ຜູ້ເຂົ້າຮ່ວມຊຸມນຸມຮັບຊາບ. ໃນນັ້ນ ທ່ານກໍຍັງຮຽກຮ້ອງມາຍັງຄະນະນຳຂອງພັກ – ລັດ, ພະນັກງານ – ລັດຖະກອນ ທຸກຊັ້ນຄົນຊາວ ແຂວງສາລະວັນ ເພື່ອສືບຕໍ່ເອົາໃຈໃສ່ເສີມຂະຫຍາຍມູນເຊື້ອ 23 ສິງຫາ ຕື່ມອີກ.
1. ເພີ່ມທະວີການສຶກສາອົບຮົມພະນັກງານ, ສະມາຊິກພັກ, ທະຫານ, ຕ່ຳຫລວດ ແລະ ປະຊາຊົນພົນລະເມືອງ ເປັນຕົ້ນ ຄົນລຸ້ນ ໜຸ່ມໃຫ້ມີຄວາມຮັບຮູ້ເຂົ້າໃຈກ່ຽວກັບມູນເຊື້ອ 23 ສິງຫາ ດ້ວຍຮູບການຕ່າງໆໃຫ້ມີຄວາມກ້ວາງຂວາງເລິກເຊິ່ງ.
2. ປຸກລະດົມເສີມຂະຫຍາຍມູນເຊື້ອ 23 ສີງຫາ ເຂົ້າໃນຂະບວນການເຄື່ອນໄຫວຈັດຕັ້ງປະຕິບັດມະຕິກອງປະຊູມໃຫຍ່ຂອງພັກ ແລະ ແຜນພັດທະນາເສດຖະກິດ – ສັງຄົມຂອງລັດ ຕິດພັນກັບຂະບວນການແຂ່ງຂັນ ແລະ ຮັກຊາດພັດທະນາ ແລະ ວຽກງານ 3 ສ້າງໃຫ້ປະກົດຜົນເປັນຈິງ.
3. ຕັ້ງໜ້າປັບປຸງ, ຮັດແໜ້ນຄວາມສາມັກຄີປອງດອງທົ່ວປວງຊົນ ພາຍໃຕ້ຮົ່ມທູງຂອງພັກ. ຍົກສູງສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິ ຂອງພວກຄົນບໍ່ດີ, ເອົາໃຈໃສ່ຕ້ານ ແລະ ສະກັດກັ້ນສີ່ງຫຍໍ້ທໍ້ຕ່າງໆໃນສັງຄົມ.
4. ເພີ່ມທະວີການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ໃຫ້ມີຄວາມສັກສິດ, ເຊີດຊູນໍ້າໃຈເພີ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອພັດທະນາຕົນເອງ, ຄອບຄົວ ແລະ ປະເທດຊາດ ໃຫ້ຫຼຸດພົ້ນອອກຈາກຄວາມທຸກຍາກ.
5. ເອົາໃຈໃສ່ປະຕິບັດແນວທາງຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໜີຕົ້ນ ສະເໜີປາຍ, ເປັນເຈົ້າການເຊື່ອມໂຍງກັບພາກພື້ນ ແລະ ສາກົນ ປະກອບສ່ວນຢ່າງຕັ້ງໜ້າໃນປະຊາຄົມອາຊຽນ, ພິທີດັ່ງກ່າວ ໄດ້ດຳເນີນມາດ້ວຍບັນຍາກາດຟົດຟຶນ ແລະ ອັດລົງໃນເວລາ 11:30 ໂມງ ຂອງວັນດຽວກັນ.