ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 65 ປີ

ຕອນ​ເຊົ້າຂອງວັນທີ 20 ສິງຫາ 2015 ທີ່​ຜ່ານ​ມາ​ນີ້ ຢູ່ທີ່ສະໂມສອນໃຫຍ່ ຂອງແຂວງ ສາລະວັນ ໄດ້ຈັດພິທີໂຮມຊຸມນຸມສະເຫຼີມ ສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 65 ປີ ( 13 / 08 / 1950 – 13 / 08 / 2015 ) ໃຫ້ກຽດເປັນປະທານຂອງ ທ່ານ ສີສຸວັນ ວົງຈອມສີ, ເລຂາພັກແຂວງ, ເຈົ້າແຂວງໆ ສາລະວັນ ແລະ ມີ ຄະນະປະຈຳພັກແຂວງ, ພຣະສົງ, ກຳມະການພັກແຂວງ,​ ພະ​ແນ​ກການ, ອົງການ, ລັດ​ວິ​ສາຫະ​ກິ​​ດ, ທະຫານຕ່ຳຫຼວດ ຕະຫຼອດຮອດພະນັກງານ – ລັດຖະກອນອ້ອມ​ຂ້າງ​ແຂວງເຂົ້າຮ່ວມ ຈຳ​ນວນ 365 ທ່ານ, ຍິງ 65 ທ່ານ. ​ໃນພິທີ ທ່ານ ບົວສີ ຄ່ຽມມະນີຂັນໄຊ, ອາດີດຮອງເລຂາພັກແຂວງ, ປະທານແນວລາວສ້າງຊາດແຂວງ ສາລະວັນ ​ໄດ້ ຂຶ້ນຜ່ານບົດປາໄສ,​ເລົ່າ​ຄືນ​ມູນ​ເຊື້ອການກຳເນີດ ແລະ ປະຫວັດ​ຄວາມເປັນມາຂອງແນວລາວສ້າງຊາດ ໃນໄລຍະ 65 ປີຜ່ານມາ ພາຍ ຫຼັງປະເທດຊາດທີ່ໄດ້ຮັບການປົດປ່ອຍຢ່າງສົມບູນ, ພັກກໍໄດ້ເຄື່ອນໄຫວເປີດເຜີຍມີອົງການລັດເຮັດບົດບາດບໍລິຫານຄຸ້ມຄອງ, ແຕ່ ແນວລາວສ້າງຊາດ ກໍຍັງໄດ້ຍົກສູງບົດບາດໃນການເຕົ້າໂຮມຄວາມສາມັກຄີປອງດອງທົ່ວປວງຊົນ, ໂຄສະນາ – ສຶກສາອົບຮົມປະຊາ ຊົນຢ່າງກວ້າງຂວາງ, ເສີມຂະຫຍາຍສິດເປັນເຈົ້າຂອງປະຊາ ຊົນ, ປຸກລະດົມປະຊາຊົນບັນດາເຜົ່າ ປະຕິບັດແຜນນະໂຍບາຍຮຳບາດ ແຜສົງຄາມໄລຍະ 10 ປີທຳອິດ ແລະ ປະຕິ ບັດ 2 ໜ້າທີ່ຍຸດທະສາດ ກໍຄື: ປົກປັກຮັກສາ ແລະ ສ້າງສາປະເທດຊາດ. ນອກຈາກນັ້ນ ກໍຍັງໄດ້ປະຕິບັດພາລະກິດປ່ຽນແປງໃໝ່ຢ່າງຮອບດ້ານທີ່ມີຫຼັກການຂອງພັກ, ປຸກລະດົມຂະບວນການແກ້ໄຂຄວາມທຸກຍາກ, ຫັນ ລົງກໍ່ສ້າງຮາກຖານການ ເມືອງຕິດພັນກັບການພັດທະນາຊົນນະບົດຮອບດ້ານ, ສ້າງບ້ານ – ກຸ່ມບ້ານພັດທະນາ, ຍູ້ແຮງວຽກງານ 3 ສ້າງທີ່ໄດ້ປະກອບສ່ວນອັນສຳຄັນໃຫ້ແກ່ການຫຼຸດຜ່ອນຄວາມທຸກຍາກຂອງປະຊາຊົນ ແລະ ສ້າງເງື່ອນໄຂໃຫ້ແກ່ການນຳພາປະເທດ ຊາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020.
ຈາກຜົນສຳເລັດດັ່ງກ່າວ ຂອງອົງການແນວລາວສ້າງຊາດ ໄດ້ຮັບຄວາມເຊື່ອໝັ້ນຈາກປະຊາຊົນລາວບັນດາ ເຜົ່າ ແລະ ໄດ້ຮັບການ ຍ້ອງຍໍສັນລະເສີນຈາກພັກ -​ ລັດຖະບານລາວ, ປະດັບຫຼຽນຄໍາແຫ່ງຊາດ 2 ໜ່ວຍ ແລະ ປະດັບຫຼຽນໄຊດາວຄຳເປັນຫຼຽນສູງສຸດ ຂອງ ພັກ – ລັດຖະບານ ສສ ຫວຽດນາມ 1 ໜ່ວຍ. ສະເພາະ ແຂວງ ສາລະວັນໄດ້ປະດັບຫຼຽນໄຊອິດສະຫຼະຊັ້ນໜຶ່ງ 3 ໜ່ວຍ, ( ໜ່ວຍແນວລາວສ້າງຊາດຂັ້ນແຂວງ 1 ໜ່ວຍ, ເມືອງເລົ່າງາມ ແລະ ເມືອງຕະໂອ້ຍ ເມືອງລະ 1 ໜ່ວຍ ) ແລະ ອີກ 6 ເມືອງໄດ້ຮັບ ຫຼຽນໄຊອິດສະຫຼະຊັ້ນສອງ ເມືອງລະ 1 ໜ່ວຍ.
ຕອນ​ທ້າຍ ທ່ານ ສີສຸວັນ ວົງຈອມສີ, ເລຂາພັກແຂວງ, ເຈົ້າແຂວງໆ ສາລະວັນ ​ໃຫ້​ກຽດຂຶ້ນກ່າວບົດໂອ້ລົມໃນຄັ້ງນີ້ ເຊິ່ງທ່ານ ໄດ້ສະແດງຄວາມຢື້ຢາມຖາມຂ່າວອັນອົບອຸ່ນ, ຄວາມສາມັກຄີຮັກແພງ ແລະ ເຊື່ອໝັ້ນມາຍັງການ ຈັດຕັ້ງຂອງພັກ – ລັດອົງການຈັດ ຕັ້ງແນວລາວສ້າງຊາດ ແລະ ອໍານາດການປົກຄອງຂັ້ນຕ່າງໆຕະຫຼອດພະນັກງານ, ນັກຮົບປະຊາຊົນບັນດາເຜົ່າທຸກຊັ້ນຄົນທົ່ວແຂວງ ສາລະວັນ ທີ່ໄດ້ອອກແຮງແຂ່ງຂັນເຂົ້າຮ່ວມພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ແລະ ກໍໄດ້ໃຫ້ທິດຊີ້ນຳສືບຕໍ່ເພີ່ມທະວີຄວາມ ເອົາໃຈໃສ່ປຸກຈິດສຳນຶກດ້ານຄວາມສາມັກ ຄີປອງດອງ, ພົວພັນຮ່ວມມືກັບບັນດາປະເທດເພື່ອນມິດ ໂດຍສະເພາະ ແນວໂຮມຂອງ ປະເທດເພື່ອນມິດຍຸດທະສາດ ແລະ ບັນດາການຈັດຕັ້ງສາກົນ, ເຮັດໜ້າທີ່ການເມືອງໃນໄລຍະໃໝ່ ຂອງອົງການແນວລາວສ້າງຊາດ ຂັ້ນຕ່າງໆໃຫ້ມີຄຸນະພາບໜັກແໜ້ນກວ່າເກົ່າ, ປັບປຸງເນື້ອໃນ, ຮູບການ ແລະ ວິທີການເຄື່ອນໄຫວ, ແບບແຜນວິທີເຮັດວຽກໃຫ້ມີ ຄຸນະພາບ ແລະ ມີປັດໃຈໃໝ່ ທີ່ສູງເດັ່ນຂຶ້ນ ຈິ່ງສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະ ໃໝ່, ມາຮອດ​ເວ​ລາ 11: 30 ໂມງ ຂອງວັນ​ດຽວ​ກັນ​ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 65 ປີ ກໍໄດ້ອັດລົງ.