ພິທີເປີດຂະບວນການປຸກລະດົມ ການສັກວັກຊິນກັນໄຂ້ສະໝອງອັກເສບຍີ່ປຸ່ນໃຫ້ເດັກກຸ່ມເປົ້າໝາຍອາຍຸລຸ່ມ 15 ປີລົງມາຂອງຄະນະກຳມາທິການເພື່ອແມ່ ແລະ ເດັກແຂວງ ສາລະວັນ ວັນທີ 21 ເມສາ 2015

ຕອນ​ເຊົ້າ​ ຂອງ​ວັນ​ທີ 21 ​ເມສາ 2015 ທີ່​ສະ​ໂມ​ສອນ​ຂອງ​ໂຮງຮຽນມັດທະຍົມ​ສົມບູນ​ເທດສະບານ​​ເມືອງ ​ແລະ ​ແຂວງສາລະ​ວັນຄະນະ​ກຳມາ​ທິການ​ເພື່ອ​ແມ່ ​ແລະ ​ເດັກ​ແຂວງສາລະ​ວັນ ​ໄດ້​ຈັດ​ພິທີ​ເປີດ​ຂະ​ບວນການ​ກ່ຽວກັບ​ການ​ປຸກລະດົມ​ການ​ເຂົ້າ​ຮ່ວມ​ສັກ​ຢາ​ກັນ​​ໄຂ້​ສະໝອງອັກ​ເສບ​ຍີ່ປຸ່ນ.ພາຍ​ໃຕ້​ການ​ເປັນ​ປະທານ​ຂອງ​ ທ່ານ ສີ​ສຸວັນ ວົງ​ຈອມ​ສີ ຮອງ​ເຈົ້າ​ແຂວງ (​ຜູ້​ຊີ້​ນຳ​ວຽກງານ​ວັດທະນະ ທຳ​-ສັງ​ຄົມ) ​ປະທານ​ຄະນະ​ກຳມາ​ທິການ​ເພື່ອ​ແມ່ ​ແລະ ​ເດັກ​ຂັ້ນ​ແຂວງ. ພ້ອມ​ດ້ວຍ​ປະທານ​ຄະນະ​ກຳມາ​ທິການ​ເພື່ອ​ແມ່ ​ແລະ ​ເດັກ 8 ​ເມືອງ, ຄະນະ​ກຳມາ​ທິການ​ເພື່ອ​ແມ່ ​ແລະ ​ເດັກ​ພະ ​ແນ​ກການ​ອ້ອມ​ຂ້າງ​ແຂວງ 30 ພາກສ່ວນ, ພະນັກງານ​ວິຊາ​ການຈາກ​ພະ​ແນ​ກສາທາລະນະ​ສຸກ​ແຂວງ, ກອງ​ເລຂາ​ຄະນະ​ກຳມາ​ທິການ​ເພື່ອ​ແມ່ ​ແລະ ​ເດັກ​ແຂວງ, ຄູ​ອາຈານ ​ແລະນ້ອງ​ນ້ອຍ​ນັກຮຽນ​ເຂົ້າ​ຮ່ວມ​ທັງໝົດ 2.472 ຄົນ, ຍິງ 1.254 ຄົນ.
ໃນ​ພິທີ​ທ່ານ​ປະທານ​ໄດ້​ກ່າວ​ເປີດ​ຂະ​ບວນການ​ຢ່າງ​ເປັນ​ທາງ​ການ​ແລ້ວ​ຍັງ​ມີ​ການ​ຕັດ​ແຖບ​ຜ້າ ​ແລະທິມງານ​ແພດ​ໄດ້​ລົງ​ສັກ​ຢາ​ໃຫ້​ເດັກ​ກຸ່ມ​ເປົ້າໝາຍຕົວ​ຈິງ. ທັງ​ນີ້​ກໍ່​ເພື່ອ​ໃຫ້​ຄະນະ​ກຳມາ​ທິການ​ເພື່ອ​ແມ່ ​ແລະ ​ເດັກ​ຂັ້ນ​ແຂວງ, ຂັ້ນ​ເມືອງ ​ແລະພາກສ່ວນ​ທີ່​ກ່ຽວຂ້ອງ​ເອົາ​ໃຈ​ໃສ່​ເປັນເຈົ້າ​ການ​ໃນ​ການ​ປຸກລະດົມ​ການ​ມີ​ສ່ວນ​ຮ່ວມ​ນຳພາ​ລູກ​ຫຼານ​ຂອງ​ຕົນ​ໄປ​ສັກ​ຢາ​ໃຫ້​ທົ່ວ​ເຖິງ ​ແລະ ບັນລຸ​ຕາມ​ເປົ້າໝາຍ​ເພື່ອ​ສະກັດ​ກັ້ນ​ບໍ່​ໃຫ້​ລູກ​ຫຼານ​ຕິດ​ເຊື້ອ​ພະຍາດ​ໄຂ້​ສະໝອງອັກ​ເສບ​ຍີ່ປຸ່ນ ເພາະວ່າ​ເຊື້ອ​ພະຍາດ​ນີ້​ເປັນ​ພະຍາດ​ທີ່​ຊຶມ​ເຊື້ອ​ຮ້າຍ​ແຮງ​ຊະນິດໜຶ່ງທີ່​ມັກ​ເກີດ​ນຳ​ເດັກ​ທີ່​ມີ​ອາຍຸ​ຕ່ຳ​ກ່ວາ15ປີລົງ​ມາ​ຫາ1ປີ.