ພິທີສະເຫຼີມສະຫຼອງ ວັນທີ 1 ມີຖຸນາ ວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ທີ່ເມືອງຕະໂອ້ຍ ແຂວງສາລະວັນ

ຕອນ​ເຊົ້າ​ຂອງ​ວັນ​ທີ 1 ມີ​ຖຸນາ 2015 ຢູ່ທີ່​ສະ​ໂມ​ສອນ​ເມືອງຕະ​ໂອ້​ຍ ​ແຂວງສາລະ​ວັນ ​ໄດ້​ຈັດ​ພິທີ​ສະ​ເຫຼີ​ມສະຫຼອງວັນ​ເດັກນ້ອຍ​ສາກົນ ​ແລະວັນ​ປູກ​ຕົ້ນ​ໄມ້​ແຫ່ງ​ຊາດ ​ຂື້ນ​ຢ່າງ​ເປັນ​ຂະ​ບວນຟົດ​ຟື້ນ ​ແລະ ມ່ວນ​ຊື່ນ.​ໃນ​ພິທີ​ພາຍ​ໃຕ້ການເປັນ​ປະທານ​ຂອງທ່ານບົວ​ວັນຈັນ​ທະວິ​ໄລຮອງ​ເຈົ້າ​ເມືອງໆຕະ​ໂອ້​ຍ (ຜູ້​ຊີ້​ນຳ​ວຽກງານ​ວັດທະນະທຳ​ສັງຄົມ), ປະ ທານຄະນະ​ກຳ​ມາ​ທິການ​ເພື່ອ​ຄວາມ​ກ້າວໜ້າຂອງ​ແມ່ຍິງ, ວຽກ​ແມ່ ​ແລະ ​ເດັກ​ເມືອງຕະ​ໂອ້​ຍ ​ແລະ ​ເປັນກຽດ​ເຂົ້າ​ຮ່ວມ​ໃນ​ພິທີ​ຄັ້ງ​ນີ້​ມີ ທ່ານ ບຸນ​ໂຮມ ໂກມສຸ​ນີ ກຳມະການ​ພັກ​ແຂວງ, ​ເລຂາ​ພັກ – ເຈົ້າ​ເມືອງໆຕະໂອ້ຍ, ມີບັນດາທ່ານຄະນະປະຈຳພັກເມືອງ, ຫົວໜ້າ​ຫ້ອງການ-ຮອງ​ຫ້ອງການ​ຂັ້ນ​ເມືອງ, ພະ​ແນ​ກກະສິກຳ​ປ່າ​ໄມ້​ແຂວງ, ກອງ​ເລຂາ ຄມດ ​ແຂວງ, ພໍ່​ແມ່ຜູ້​ປົກຄອງ​ຂອງ​ເດັກ ແລະ ​ເດັກນ້ອຍ​ເຂົ້າ​ຮ່ວມ​ທັງໝົດ 300 ກ່ວາ​ຄົນ, ຍິງ 170 ຄົນ.
ວາລະ​ດຳ​ເນີນ​ພິທີ ​ທ່ານ​ປະທານ ​ໄດ້​​ເຫຼົ່າ​ຄືນ​ປະຫວັດ​ຄວາມ​ເປັນ​ມາ​ຂອງ​ວັນ​ເດັກນ້ອຍ​ສາກົນ ​ແລະ ວັນ​ປູກ​ຕົ້ນ​ໄມ້​ແຫ່ງ​ຊາດວັນ​ທີ 1 ມີ​ຖຸນາ ​ເຊີ່ງ​ສະ​ແດງ​ໃຫ້​ເຫັນ​ເຖິງ​ຄວາມໝາຍຄວາມ​ສຳ​ຄັນ​ຂອງ​ເດັກ ​ຄື: ເດັກ​ທຸກ​ຄົນ​ເກີດ​ມາ​ຄວນ​ໄດ້​ຮັບ​ການ​ສັກ​ຢາປ້ອງກັນພະຍາດ​ຢ່າງ​ຄົບ​ຖ້ວນ, ​ເດັກ​ທຸກ​ຄົນ​ຄວນ​ໄດ້​ຮັບ​ໂພ​ສະນາ​ການ​ທີ່​ດີ, ພໍ່​ແມ່​ຜູ້​ປົກຄອງ​ຄວນ​ສົ່ງ​ເສີມ ​ແລະ ປົກ​ປ້ອງ​ສິດທິ​ຂອງເດັກທຸກ​ຄົນຮ່ວມ​ໃຈ​ກັນ​ຢຸດຕິ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ, ຮຽກຮ້ອງ​ໃຫ້​ສັງ​ຄົມ​ມີ​ຄວາມ​ຍຸດຕິ​ທຳ​, ສຳລັບ​ເດັກ​ໃຫ້​ຫ່າງ​ໄກ​ຈາກ​ສິ່ງ​ເສບ​ຕິດ ​ແລະ ​ໃຫ້​ທຸກ​ຄົນ​ຮ່ວມ​ແຮງ​ຮ່ວມ​ໃຈ​ປູກ​​ໄມ້​ໃຫ້​ເປັນ​ປ່າ​ເພື່ອ​ອະນາ​ຄົດ​ທີ່​ສົດ​ໃສ. ຈາກ​ນັ້ນ, ກໍ່​ໄດ້​ຊົມ​ການສະ​ແດງ​ສິນລະປະ-​ວັນນະຄະດີ ຈາກ​ຫຼານ​ນ້ອຍ​ແຕ່ລະ​ໂຮງຮຽນ, ກວດ​ສຸ​ຂະພາບ ​ແລະ ຢອດ​ຢາ​ໃຫ້ເດັກ ​ແລະ ນອກຈາກ​ນັ້ນ​ກໍ່​ຍັງ​ໄດ້​ຈັດ​​ກິດຈະກຳ​ຕ່າງໆອີກ​ຈຳນວນໜຶ່ງ.

ຕອນ​ທ້າຍ​ຄະນະ​ນຳ​ຂັ້ນ​ເມືອງ ​ແລະ ​ແຂກ​ທຸກ​ທ່ານ​ທີ່​ເຂົ້າ​ຮ່ວມ​ພິທີຍັງ​ໄດ້​ຮ່ວມ​ກັນ​ປູກ​ຕົ້ນ​ໄມ້​ຕາມ​ສາຍ​ທາງ​ເຂົ້າ​ຫ້ອງ​ວ່າການ​ປົກຄອງ ເມືອງ ​ແລະ​ ເດີ່ນ​ຫ້ອງ​ວ່າການ​ປົກຄອງເມືອງຕະ​ໂອ້​ຍ ນຳ​ອີກ.