ພິທີປະກາດຫ້ອງວ່າການປົກຄອງແຂວງສາລະວັນ ເປັນຫ້ອງການຕົວແບບດ້ານວັດທະນະທໍາ ຕິດພັນກັບການຫັນເປັນທັນສະໄໝ

ໂດຍປະຕິບັດຕາມຂໍ້ຕົງລົງຂອງທ່ານເຈົ້າແຂວງໆສາລະວັນ, ສະບັບເລກທີ 180/ຈຂ.ສວ ລົງວັນທີ 6/4/2015 ວ່າດ້ວຍ: ການຮັບ ຮອງເອົາສຳນັກງານຫ້ອງວ່າການປົກຄອງແຂວງສາລະວັນ ເປັນຫ້ອງການຕົວແບບດ້ານວັດທະນະທຳຂັ້ນແຂວງ. ຕອນບ່າຍຂອງວັນທີ 21 ພຶດສະພາ 2015 ເວລາ 14: 00 ​ໂມງ, ທີ່​ຫ້ອງ​ປະຊຸມ​ຊັ້ນ III ຫ້ອງ​ວ່າການປົກຄອງແຂວງໄດ້ຈັດພິທີປະກາດຫ້ອງວ່າການປົກຄອງແຂວງສາລະວັນ ເປັນຫ້ອງການຕົວແບບດ້ານວັດທະນະທຳ ຕິດພັນກັບທັນສະໄໜຂຶ້ນຢ່າງເປັນທາງການ. ພິທີຄັ້ງນີ້ໃຫ້ກຽດເຂົ້າຮ່ວມ ແລະ ເປັນປະທານຂອງ ທ່ານ ສີເຮັງ ຫອມສົມບັດ, ກຳມະການປະຈຳພັກແຂວງ – ຮອງເຈົ້າ ແຂວງໆສາລະວັນ, ມີ ທ່ານ ສົມເລັດ ຈູລະມະນີ ກໍາມະການພັກແຂວງ, ຫົວໜ້າຫ້ອງວ່າການປົກຄອງແຂວງ , ທ່ານ ບຸນຍັງ ເທບຈັນທະວົງ ກໍາມະການພັກແຂວງ , ຫົວໜ້າພະແນກຖະແຫຼງຂ່າວວັດທະນະທຳ ແລະ ທ່ອງທ່ຽວແຂວງ, ມີຄະນະກຳມະການ ກວດກາ ແລະ ປະເມີນຜົນການສ້າງ ຫ້ອງການຕົວແບບດ້ານວັດທະນະທຳຂັ້ນແຂວງ, ພະແນກການ – ອົງການຕ່າງໆທີ່ກ່ຽວຂ້ອງ ຕະຫຼອດຮອດພະນັກງານລັດຖະ ກອນພາຍໃນຫ້ອງວ່າການປົກຄອງແຂວງ ແລະ ພະນັກງານຫ້ອງການໃນສັງກັດ ເຂົ້າຮ່ວມ ຈຳນວນ 37 ທ່ານ, ຍິງ 11 ທ່ານ.
ຈາກນັ້ນ; ທ່ານ ສົມເລັດ ຈຸລະມະນີ ໄດ້ຂຶ້ນຜ່ານເອກະສານບົດສະຫຼຸບຕີລາຄາປະເມີນຜົນການຈັດຕັ້ງປະຕິບັດໂຄງ ການສ້າງຫ້ອງ ວ່າການປົກຄອງແຂວງ ເປັນຫ້ອງການຕົວແບບດ້ານວັດທະນະທຳ ຕິດພັນກັບທັນສະໄໝ ຕໍ່ກອງປະຊຸມຊາບ ແລະ ທັງຂຶ້ນຮັບໃບຢັ້ງ ຢືນ ຫ້ອງການຕົວແບບດ້ານວັດທະນະທຳຈາກ ທ່ານ ສີເຮັງ ຫອມສົມບັດ ຮອງເຈົ້າແຂວງໆ ສາລະວັນ.
​ພ້ອມດຽວກັນນັ້ນ; ທ່ານ ຮອງເຈົ້າແຂວງ ຍັງໄດ້ມີຄໍາເຫັນໂອ້ລົມຕໍ່ກອງປະຊຸມເຊິ່ງທ່ານໄດ້ຕີລາຄາສູງ ແລະ ຍ້ອງຍໍຊົມເຊີຍພະ ນັກງານ – ລັດຖະກອນຂອງຫ້ອງວ່າການປົກຄອງແຂວງ ທີ່ມີຄວາມເອົາໃຈໃສ່ຈັດຕັ້ງປະຕິບັດໜ້າທີ່ວຽກງານ ແລະ ກິດຈະກຳຕ່າງໆ ຈົນຄົບເງື່ອນໄຂມາດຖານທີ່ຄະນະກຳມະການສ້າງຫ້ອງການຕົວແບບດ້ານທະນະທຳ ຕິດພັນກັບທັນສະໄໜກຳນົດໄວ້ ແລະ ທ່ານ ກໍຍັງຮຽກຮ້ອງມາຍັງພະນັກງານຂັ້ນນຳຂອງຫ້ອງວ່າການປົກຄອງແຂວງ ຕະຫຼອດຮອດພະນັກງານ – ລັດຖະກອນທັງໝົດ ໃຫ້ເພີ່ມ ທະວີ ແລະ ເອົາໃຈໃສ່ຕື່ມບາງບັນຫາ ເປັນຕົ້ນ: ການເປັນເສນາທິການໃຫ້ແກ່ການນຳຂອງແຂວງ; ໃຫ້ສືບຕໍ່ຈັດຕັ້ງປະຕິບັດ ແລະ ປົກ ປັກຮັກສາຜົນງານ ແລະຜົນສຳເລັດທີ່ຍາດມາໄດ້ນີ້ໃຫ້ມີຜົນງານດີຍິ່ງໆຂື້ນ.
ຕອນ​ທ້າຍ; ທ່ານ ສົມເລັດ ຈຸລະມະນີ ຫົວໜ້າຫ້ອງວ່າການປົກຄອງແຂວງ ກໍ່ໄດ້ຂື້ນຮັບເອົາຄຳໂອວາດ ຈາກ ທ່ານ ຮອງ ເຈົ້າແຂວງ ພ້ອມທັງຈະນໍາເອົາຄໍາຊີ້ແນະດັ່ງກ່າວໄປຈັດຕັ້ງປະຕິບັດໃຫ້ມີປະສິດທິຜົນດີລື່ນເກົ່າ ແລະ ຜູ້ແທນກອງປະຊຸມຍັງໄດ້ລົງ ໄປຮ່ວມພິທີເປີດປ້າຍຫ້ອງວ່າການປົກຄອງແຂວງ ເປັນຫ້ອງການຕົວແບບດ້ານວັດທະນະທຳຂັ້ນແຂວງ ຢູ່ຕໍ່ໜ້າສຳນັກງານຫ້ອງ ວ່າການປົກຄອງແຂວງສາລະວັນ ນຳອີກ.