ພິທີປະກາດການຈັດຕັ້ງຫ້ອງວ່າການປົກຄອງແຂວງສາລະວັນ

ໂດຍ​ປະຕິບັດ​ຕາມ ​ຂໍ້​ຕົກລົງ​ຂອງຄະນະ​ປະຈຳ​ພັກ​ແຂວງ​ສາລະ​ວັນ ສະບັບ​ເລກທີ 83/ຄຈພຂ.ສວ, ລົງ​ວັນ​ທີ 08 ພຶດສະພາ 2015 ວ່າ​ດ້ວຍ: ການ​ຍົກຍ້າຍ​ພະນັກງານ​ການ​ນຳ​ໄປ​ຮັບໜ້າທີ່​ໃໝ່ ​ແລະ ສະບັບ​ເລກທີ 85/ຄຈພຂ.ສວ, ລົງ​ວັນ​ທີ 08 ພຶດ ສະພາ 2015 ວ່າ​ດ້ວຍ: ການ​ແຕ່ງ​ຕັ້ງຜູ້​ຮັກສາ​ການ​ຫົວໜ້າຫ້ອງ​ວ່າການ​ປົກຄອງ​ແຂວງ​ສາລະ​ວັນ.​ເວລາ 10:30 ​ໂມງ ຂອງ​ວັນ​ທີ 02 ມິຖຸນາ 2015 ຜ່ານ​ມາ​ນີ້ ຢູ່​ທີ່​ຫ້ອງ​ປະຊຸມ​ຊັ້ນ III ຫ້ອງ​ວ່າການ​ປົກຄອງ​ແຂວງ​ສາລະ​ວັນ ​ໄດ້​ຈັດ​ພິທີ​ປະກາດ​ການຈັດ​ຕັ້ງ​ຂອງ​ຫ້ອງ​ວ່າການ​ປົກຄອງ​ແຂວງ, ​ໃນ​ພິທີ​ໃຫ້ກຽດ​ເຂົ້າ​ຮ່ວມ ​ແລະ ​ເປັນ​ປະທານ​ຂອງ ທ່ານ ບົວທອງ ຄຸນ​ຍອດ​ປັນຍາ ຮອງ​ເລຂາ​ພັກ​ແຂວງ – ຫົວໜ້າຄະນະ​ຈັດ​ຕັ້ງ​ແຂວງ,​​ ມີຫົວໜ້າພະ​ແນ​ກ-ຮອງ​ພະ​ແນ​ກທີ່​ກ່ຽວຂ້ອງ, ຫົວໜ້າ-ຮອງ​ຫົວໜ້າຫ້ອງການ​ໃນ​ສັງກັດ, ມີ​ຄະນະ​ຫ້ອງ​ວ່າການປົກຄອງ​ແຂວງ ພ້ອມ​ດ້ວຍ​ພະນັກງານ-ລັດຖະກອນ​ ທົ່ວ​ຫ້ອງ​ວ່າການ​ເຂົ້າ​ຮ່ວມ​ຢ່າງຫຼວງຫຼາຍ.

ພິທີ​ຄັ້ງ​ນີ້​ໄດ້​ຮັບ​ຟັງການ​ຂຶ້ນ​ຜ່ານ​ຂໍ້​ຕົກລົງ​ຂອງຄະນະ​ປະຈຳ​ພັກ​ແຂວງ​ສາລະ​ວັນ ຈາກ ທ່ານ ສົມໝາຍ ​ແກ້ວ​ບຸນ​ເຮືອງ ຮອງ​ຫົວໜ້າຄະນະ​ຈັດ​ຕັ້ງ​ແຂວງ ກ່ຽວກັບ​ການ​ຍົກຍ້າຍ​ບ່ອນ​ປະຈຳການ ຂອງ​ຫົວໜ້າຫ້ອງ​ວ່າການ​ປົກຄອງ​ແຂວງ​ສາລະ​ວັນ​ຄົນ​ເກົ່າ ຄື: (ທ່ານ ສົມ​ເລັດ ຈູ​ລະ​ມະນີ ກຳມະການ​ພັກ​ແຂວງ, ຫົວໜ້າຫ້ອງ​ວ່າການ​ປົກຄອງ​ແຂວງ) ​ໄປ​ຮັບໜ້າທີ່​ໃໝ່ ຢູ່​ໂຮງຮຽນການ​ເມືອງ​ການ​ປົກຄອງ​ທ້ອງ​ຖິ່ນ​ແຂວງ​ສາລະ​ວັນ ​ແລະ ຂໍ້​ຕົກລົງ​ຂອງ​ຄະນະ​ປະຈຳ​ພັກ​ແຂວງ ກ່ຽວກັບ​ການ​ແຕ່ງ​ຕັ້ງ​ຜູ້​ຮັກສາ​ການ​ຫົວໜ້າຫ້ອງ​ວ່າການ​ປົກຄອງ​ແຂວງ ຄື: (ທ່ານ ສະ​ໄໝ ​ໂພທິ​ສານ ຮອງ​ຫົວໜ້າຫ້ອງ​ວ່າການ​ປົກຄອງ​ແຂວງ) ​ເປັນ​ຜູ້​ຮັກສາ​ການ​ຫົວໜ້າຫ້ອງ​ວ່າການ​ປົກຄອງ​ແຂວງ​ສາລະ​ວັນ​.

ຕອນ​ທ້າຍ, ທ່ານ ບົວທອງ​ ຄຸນ​ຍອດ​ປັນຍາ ກໍ່​ໄດ້​ໂອ້​ລົມ ​ແລະ ​ໃຫ້​ຄຳ​ຄິດ​ຄຳ​ເຫັນ​ຕໍ່​ພິທີ​ຄັ້ງ​ນີ້ ​ເຊິ່ງທ່ານ​ຊີ້​ນຳ ​ແລະ ​ເນັ້ນໜັກບາງ​ບັນຫາ ຕໍ່​ຜູ້​ທີ່​ຖືກ​ຍົກຍ້າຍ​ໃຫ້​ໄປ​ຮັບໜ້າທີ່​ໃໝ່ຢູ່​ກົມ​ກອງ​ອື່ນ ​ແລະ ຜູ້​ທີ່​ຖືກ​ແຕ່ງ​ຕັ້ງ​ໃຫ້​ຮັກສາ​ການ​ຫົວໜ້າຫ້ອງ​ວ່າການ​ປົກຄອງ​ແຂວງ​ສາລະ​ວັນ ​ໃຫ້​ສຶບຕໍ່​ເອົາ​ໃຈ​ໃສ່​ຈັດ​ຕັ້ງ​ປະຕິບັດໜ້າທີ່​ວຽກງານ​ທີ່​ຖືກ​ມອບໝາຍຈາກ​ຄະນະ​ພັກ​ຂັ້ນ​ເທີ​ງ​ດ້ວຍ​ຄວາມ​ຮັບຜິດຊອບ​ສູງ ​ເຮັດໃຫ້​ມີ​ຜົນສຳ​ເລັດ ​ແລະ ບັນລຸ​ຕາມ​ລະດັບ​ຄາດໝາຍທີ່​ວາງ​ໄວ້. ນອກຈາກ​ນັ້ນ, ທ່ານ ກໍ່​ຍັງ​ຊີ້​ນຳ​ບັນຫາ​ຕ່າງໆອີກ​ຈຳນວນໜຶ່ງ ຕໍ່​ສະມາຊິກ​ພັກ, ພະນັກງານ-ລັດຖະກອນ​ ຂອງ​ຫ້ອງ​ວ່າການປົກຄອງ​ແຂວງ​ສາ​ສາລະ​ວັນ.

ພິທີ​ປະກາດ​ການຈັດ​ຕັ້ງ​ຫ້ອງ​ວ່າການ​ປົກຄອງ​ແຂວງ​ສາລະ​ວັນ​ຄັ້ງ​ນີ້ ​ໄດ້​ດຳ​ເນີນ​ໄປ​ດ້ວຍ​ບັນຍາກາດ​ຟົດ​ຟື້ນ ​ແລະ ປິດ​ລົງ​ໃນ​ເວລາ 11: 30 ​ໂມງ ຂອງ​ວັນ​ດຽວກັນ.