ພະນະ ທ່ານ ຄຳໄຕ ສີພັນດອນ ອາດີດ ປະທານພັກ – ປະທານປະເທດ ແຫ່ງ ສປປ ລາວ ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ສາລະວັນ ຄັ້ງວັນທີ 21 – 22 ທັນວາ 2015

ໃນຕອນ ບ່າຍ ຂອງວັນທີ 21 ທັນວາ 2015 ພະນະ ທ່ານ ຄຳໄຕ ສີພັນດອນ, ອາດີດ ປະທານພັກ – ປະທານ ປະເທດ ແຫ່ງ ສປປ ລາວ ໄດ້ເດີນທາງມາແຂວງ ສາລະວັນ ເພື່ອເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ສາລະວັນ ໃຫ້ກຽດຕ້ອນຮັບນຳໂດຍ ທ່ານ ສີສຸວັນ ວົງຈອມສີ ເລຂາຄະນະບໍລິຫານງານພັກແຂວງ, ເຈົ້າແຂວງໆ ສາລະວັນ ພ້ອມດ້ວຍຄະນະນຳຂັ້ນແຂວງຢ່າງອົບອຸ່ນ. ຕອນເຊົ້າວັນທີ 22 ທັນວາ 2015 ນີ້, ເລີ່ມແຕ່ເວລາ 8 : 00 ຢູ່ທີ່ສະໂມສອນໃຫຍ່ຂອງແຂວງໄດ້ຈັດກອງປະຊຸມເພື່ອລາຍງານ ແລະ ຮັບຟັງການໂອ້ລົມ, ກອງປະຊຸມຄັ້ງນີ້ ໃຫ້ກຽດການເປັນປະທານຂອງ ພະນະ ທ່ານ ຄຳໄຕ ສີພັນ ດອນ, ອາດີດ ປະທານພັກ – ປະທານປະເທດ ແຫ່ງ ສປປ ລາວ ໂດຍມີການນຳຂັ້ນສູນກາງ, ການນຳຂັ້ນແຂວງ, ເມືອງ ພ້ອມດ້ວຍ ຫົວໜ້າ – ຮອງ ຫົວໜ້າ ຂອງບັນດາພະແນກການ, ອົງການທຽບເທົ່າອ້ອມຂ້າງແຂວງ, ທະຫານ, ຕ່ຳຫຼວດ, ລັດວິສາຫະກິດຕ່າງໆ, ຕະຫຼອດຮອດພະນັກງານ – ລັດຖະກອນ ເຂົ້າຮ່ວມຮັບຟັງລວມທັງໝົດ 256 ທ່ານ, ຍິງ 54 ທ່ານ.

ເຊິ່ງ ທ່ານ ສີສຸວັນ ວົງຈອມສີ ເລຂາຄະນະບໍລິຫານງານພັກແຂວງ, ເຈົ້າແຂວງໆ ສາລະວັນ ຕ່າງໜ້າຄະນະພັກ – ອຳນາດການປົກຄອງ, ພະນັກງານ -​ ສະມາຊິກພັກ ແລະ ປະຊາຊົນບັນດາເຜົ່າຊາວແຂວງ ສາລະວັນ ໄດ້ກ່າວຄຳຕ້ອນຮັບ ພະນະ ທ່ານ ຄຳໄຕ ສີພັນດອນ, ອາດີດ ປະທານພັກ – ປະທານປະເທດ ແຫ່ງ ສປປ ລາວ ແລະ ລາຍງານສະພາບລວມ ຂອງ ແຂວງ ສາລະວັນ ໂດຍສະເພາະ ຜົນສຳເລັດການດຳເນີນກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ໃນ ເດືອນທີ 7 / 2015 ທີ່ຜ່ານມາ ເປັນຕົ້ນ: ແມ່ນໂຄ່ງຮ່າງການຈັດຕັ້ງຂອງແຂວງ, ການຈັດຕັ້ງຜັນຂະຫຍາຍມະຕິກອງປະຊຸມ ໃຫຍ່ຄັ້ງ IX ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ ສາລະວັນ, ວຽກງານປ້ອງກັນຊາດ – ປ້ອງກັນຄວາມສະຫງົບມີຄວາມສະຫງົບ, ສັງຄົມມີຄວາມເປັນລະບຽບຮຽບຮ້ອຍ, ວຽກງານພັດທະນາເສດຖະກິດ – ສັງຄົມເຊັ່ນ:ວຽກງານແຜນການ – ການລົງທຶນ, ວຽກກະສິກຳ ແລະ ປ່າໄມ້, ວຽກງານອຸດສາຫະກຳ ແລະ ການຄ້າ, ວຽກງານພະລັງ ງານ ແລະ ບໍ່ແຮ່, ວຽກງານໂຍທາທິການ ແລະ ໂທຄົມມະນາຄົມ, ວຽກຊັບພະຍາກອນທຳມະຊາດ ແລະ ສິ່ງແວດລ້ອມ, ວຽກງານການສຶກສາ – ກິລາ, ວຽກສາທາລະນະສຸກ, ວຽກຖະແຫຼງຂ່າວວັດທະນະທຳ ແລະ ທ່ອງທ່ຽວ, ວຽກແຮງງານສະ ຫວັດດີການສັງຄົມ, ວຽກງານ ຕ່າງປະເທດ, ວຽກງານແກ້ໄຂຄວາມທຸກຍາກຂອງປະຊາຊົນ. ນອກຈາກນັ້ນ ຍັງໄດ້ເວົ້າເຖິງວຽກກໍ່ສ້າງພັກ – ກໍ່ສ້າງພະນັກງານ, ຂົງເຂດແນວລາວສ້າງຊາດ – ອົງການຈັດຕັ້ງມະຫາຊົນ, ຂົງເຂດອົງການປົກຄອງ ແລະ ແຜນພັດທະນາເສດຖະກິດ – ສັງຄົມ ສົກປີ 2015 – 2016 ຂອງແຂວງ.

ຈາກນັ້ນ ພະນະ ທ່ານ ຄຳໄຕ ສີພັນດອນ, ອາດີດ ປະທານພັກ – ປະທານປະເທດ ແຫ່ງ ສປປ ລາວກໍໄດ້ສະແດງ ຄວາມເປັນຫ່ວງເປັນໄຍ ແລະ ໄດ້ໂອ້ມລົມຕໍ່ ກອງປະຊຸມຫຼາຍວຽກງານ ເພື່ອນໍາໄປຈັດຕັ້ງປະຕິບັດໂດຍສະເພາະ ວຽກງານ ການເມືອງ – ແນວຄິດ, ສ້າງຄວາມສາມັກຄີ ແໜ້ນແຟ້ນທຸກຊົນເຜົ່າ, ວຽກງານປ້ອງກັນຊາດ – ປ້ອງກັນຄວາມສະຫງົບ, ວຽກງານຊັບພະຍາກອນທຳມະຊາດ, ພະລັງງານ ແລະ ບໍ່ແຮ່, ອຸດສະຫະກຳ ແລະ ການຄ້າ, ວຽກງານກະສິກຳ ແລະ ປ່າໄມ້ ແລະ ວຽກງານອື່ນໆ ແລະ ຍັງໄດ້ຊີ້ນຳການປູກຝັງ, ລ້ຽງສັດ ເພື່ອເຮັດໃຫ້ປະຊາຊົນຮັ່ງມີ ແລະ ວິໄສທັດໃນຕໍ່ໜ້າຕ້ອງປະກອບສ່ວນເຮັດໃຫ້ໝົດທຸກຂົງເຂດມີການພັດທະນາ ແລະ ຫັນເປັນອຸດສາຫະກຳທີ່ຕິດພັນກັບການຫັນເປັນທັນສະໄໝ ຫຼື ການສ້າງລະ ບອບໃໝ່ແມ່ນການປັບປຸງລະບົບການເມືອງໃຫ້ໜັກແໜ້ນເຂັ້ມແຂງ, ການພັດທະນາຕ້ອງຖືເອົາຄົນເປັນໃຈກາງ ແລະ ຖືເອົາຄົນຜູ້ທີ່ມີຄວາມຮູ້ຄວາມສາມາດເປັນໃຈກາງໃນການຍົກສູງຄຸນະພາບຊີວິດຂອງປະຊາຊົນລາວໃຫ້ດີຂຶ້ນ.

ຕອນທ້າຍ ທ່ານ ສີສຸວັນ ວົງຈອມສີ ເລຂາຄະນະບໍລິຫານງານພັກແຂວງ, ເຈົ້າແຂວງໆ ສາລະວັນ ພ້ອມດ້ວຍ ຄະນະພັກການນຳຂັ້ນແຂວງ ກໍໄດ້ມອບກະຕ່າດອກໄມ້ພ້ອມທັງອວຍພອນ ພະນະ ທ່ານ ຄຳໄຕ ສີພັນດອນ, ອາດີດ ປະທານພັກ – ປະທານປະເທດ ແຫ່ງ ສປປ ລາວເນື່ອງໃນວັນສຳຄັນຕ່າງໆ ພິເສດ ກໍຄື ວັນປີໃໝ່ສາກົນ 2016 ທີ່ຈະມາເຖິງ ຈົ່ງມີສຸຂະພາບ ແຂງແຮງ ແລະ ຊີີ້ນຳໆພາປະເທດຊາດໃຫ້ຈະເລີນຮຸ່ງເຮືອງຕະຫຼອດໄປ.