ບໍລິສັດ ລາວສຶມຸລະ ຈໍາກັດ ປະຈໍາຢູ່ລາວ ໄດ້ເຂົ້າພົບ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆ ສາລະວັນ

ເຊົ້າຂອງວັນທີ 10 ກັນຍາ 2015 ເວລາ 9:30 ໂມງ; ທ່ານ ອິຈິກິ ຜູ້ຊ່ວຍອໍານວຍການໃຫຍ່ ບໍລິສັດ ລາວສຶມຸລະ ຈໍາກັດ ປະຈໍາຢູ່ລາວ, ຕັ້ງຢູ່ບ້ານ ເຕເມ ພໍ່ປູນ ເມືອງ ເລົ່າງາມ ແຂວງ ສາລະວັນ ພ້ອມວິຊາການ ໄດ້ເຂົ້າພົບ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆ ສາລະວັນ ທີ່ຫ້ອງຮັບແຂກຂອງຫ້ອງວ່າການປົກຄອງແຂວງ ສາລະວັນ. ໃນການເຂົ້າມາພົບປະ ທ່ານ ເລຂາພັກແຂວງ, ເຈົ້າແຂວງໆ ສາລະວັນ ໃນຄັ້ງນີ້ ມີຈຸດປະສົງ ເພື່ອລາຍງານຄວາມຄືບໜ້າ ແລະ ຜົນສຳເລັດວຽກງານໂຄງການປູກພືດສະໝຸນໄພ, ໃນຂອບເຂດເມືອງ ເລົ່າງາມ ແລະ ເມືອງ ສາລະວັນ ແຂວງ ສາລະວັນ, ນອກ ຈາກນັ້ນ ທາງບໍລິສັດ ສຶມຸລະ ຍັງໄດ້ລາຍງານສະພາບບາງບັນຫາທີ່ຍັງຄ້າງຄາ ແລະ ການເຊັນສັນຍາໃນການສຳປະທານເນື້ອທີ່ຂອງການເຮັດສວນປູກພຶດສະໝຸນໄຟ ແລະ ຍັງໄດ້ສຶບຕໍ່ສະເໜີ ເພື່ອທົດລອງຄຸນນະພາບຂອງດິນອີກດ້ວຍ.
ພາຍຫຼັງທີ່ທາງ ບໍລິສັດສຶມຸລະ ລາຍງານແລ້ວ ທ່ານ ສີສຸວັນ ວົງຈອມສີ, ເລຂາພັກແຂວງ, ເຈົ້າແຂວງ ສາລະວັນ ກໍໄດ້ໃຫ້ທິດຊີ້ ນຳ ແລະ ແລກປ່ຽນຄໍາຄິດຄໍາເຫັນ ເພື່ອແກ້ໄຂບັນຫາ ກ່ຽວກັບ ການຜະລິດໃນແຕ່ລະໄລຍະ. ຫຼັງຈາກນັ້ນ ທ່ານ ເລຂາພັກແຂວງ, ເຈົ້າແຂວງໆ ສາລະວັນ ກໍໄດ້ສະແດງຄວາມຍ້ອງຍໍ້ຊົມເຊີຍມາຍັງທາງ ບໍລິສັດ ສຶມຸລະ ທີ່ໄດ້ມາລົງທືນ ສ້າງໃຫ້ແຂວງມີໃບໜ້າໃບຕາ ແລະ ຍັງເຮັດໃຫ້ປະຊາຊົນມີວຽກເຮັດງານທຳ.
ນອກຈາກນັ້ນ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆ ສາລະວັນ ກໍໄດ້ສະເໜີ ເພື່ອແລກປ່ຽນປຶກສາຫາລືກ່ຽວ ກັບການຜະລິດປູກພຶດສະໝຸນໄພ ໃນແຕ່ລະໄລຍະໄດ້ເທົ່າໃດ, ເສຍເທົ່າໃດ ເພື່ອໃຫ້ມີຜົນງານໃນການລາຍງານລັດຖະບານ ແລະ ຢາກໃຫ້ມີການສົ່ງເສີມໃຫ້ປະຊາຊົນຮູ້ການນຳໃຊ້ເຕັກນິກວິທີການກ້າເບ້ຍ, ວິທີປູກພຶດຊະນິດຕ່າງໆທີ່ ບໍລິສັດ ສຶມຸລະ ໄດ້ປູກ ເພື່ອເຮັດໃຫ້ປະຊາຊົນມີລາຍຮັບເພີ່ມຂຶ້ນ ແລະ ຫຼຸດຜ່ອນລາຍຈ່າຍຕື່ມອີກ.
ຕອນທ້າຍ ທ່ານ ອິຈິກິ ຜູ້ຊ່ວຍອໍານວຍການໃຫຍ່ ບໍລິສັດ ລາວສຶມຸລະ ຈໍາກັດ ປະຈໍາຢູ່ລາວ ໄດ້ມອບກະຕ່າດອກໄມ້ ເພື່ອເປັນຂອງຂວັນໃຫ້ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງໆ ສາລະວັນ.