ທ່ານ ເລຂາພັກ – ເຈົ້າແຂວງໆ ສາລະວັນ ລົງເຄື່ອນໄຫວຢ້ຽມຍາມ ແລະ ເຮັດວຽກຢູ່ເມືອງ ລະຄອນເພັງ.

ໃນວັນທີ 26 ກູມພາ 2018 ທີ່​ຜ່ານ​ມາ​ນີ້, ທ່ານ ສີ​ສຸວັນ ວົງ​ຈອມ​ສີ ກຳມະການ​ສູນ​ກາງ​ພັກ, ​ເລຂາ​ພັກ – ​ເຈົ້າ​ແຂວງໆ ສາລະ​ວັນ ພ້ອມ​ດ້ວຍ​ຄະນະ 10 ພະ​ແນ​ກການ​ຂອງ​ແຂວງ ​ໄດ້​ລົງ​ ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງລະຄອນ​ເພັງ, ​ໃຫ້​ກຽດຕ້ອນຮັບ ​ໂດຍ ທ່ານ ແກ້ວຜາ ສີລາດວງໃຈ ຮັກສາການເລຂາພັກ – ເຈົ້າເມືອງໆ ລະຄອນເພັງ ພ້ອມດ້ວຍຄະນະ.

​ໃນ​ໂອກາດ​ເຄື່ອນ​ໄຫວ​ຢ້ຽມຢາມ​ຄັ້ງນີ້, ທ່ານ ສີ​ສຸວັນ ວົງ​ຈອມ​ສີ ກຳມະການ​ສູນ​ກາງ​ພັກ, ​ເລຂາ​ພັກ – ​ເຈົ້າ​ແຂວງໆ ສາລະ​ວັນ​ ກໍ​ໄດ້​ພົບ​ປະ​ກັບ​ຄະນະ​ພັກ, ຄະນະ​ປົກຄອງ​ເມືອງ, ພະນັກງານຫຼັກ​ແຫຼ່ງ ອາວຸໂສ – ບຳນານ, ຄະນະນຳກົມກອງເອກະລາດຂອງເເຂວງປະຈຳເມືອງ, ເລຂາຄະນະພັກຮາກຖານກຸ່ມບ້ານ, ເລຂາໜ່ວຍພັກ ແລະ ນາຍບ້ານ. ໄດ້ຮັບຟັງການລາຍງານຫຍໍ້ການນຳພາ ຮອບດ້ານຈາກອົງຄະນະພັກເມືອງລະຄອນເພັງໄລຍະ 1 ປີຜ່ານມາ ແລະ ວຽກງານພົ້ນເດັ່ນໄລຍະ 2 ເດືອນ ຕົ້ນປີ 2018 ຈາກ​ ທ່ານຮັກສາການເລຂາພັກ – ເຈົ້າເມືອງໆ ລະຄອນເພັງ ທີ່​ໄດ້​ຕີ​ລາຄາ​ວ່າ ມາ​ຮອດ​ປັດຈຸບັນ​ນີ້ ເມືອງ​ລະຄອນ​ເພັງ​ໄດ້​ມີ​ໃບ​ໜ້າ​ໃໝ່, ປະຊາຊົນ​ເຊື່ອ​ໝັ້ນຕໍ່​ການ​ນຳພາ​ຂອງ​ພັກ -​ ລັດ ​ແລະ ມີ​ຄວາມ​ສະຫງົບ​ໂດຍ​ພື້ນຖານ, ​ເສດຖະກິດມີ​ການ​ຂະຫຍາຍຕົວ ​ແລະ ມີ​ທ່າ​ອ່ຽງດີ​ຂຶ້ນ, ​ໂດຍ​ສະ​ເພາະ​​ ແມ່ນ​ມີໜໍ່​ແໜງ​ການ​ຜະລິດ​ຕົວ​ແບບ​ເກີດ​ຂຶ້ນ.

​ໃນ​ໂອກາດ​ນີ້, ທ່ານ​ເລຂາ​ພັກ –  ເຈົ້າແຂວງໆ ສາລະວັນ ຍັງໄດ້ໃຫ້ກຽດໂອ້ລົມ ໂດຍເໜັ້ນໜັກ​ໃຫ້ເອົາໃຈໃສ່​ໃນ​ການສືກສາອົບຮົມ ດ້ານການເມືອງ – ແນວຄິດໃຫ້ແກ່ຄະນະນຳ, ພະນັກງານ – ສະມາຊິກ​ພັກຂອງ​ເມືອງ ໃຫ້ມີ​ຄວາມໜັກແໜ້ນ, ເຂັ້ມແຂງ, ເລີກ​ເຊິ່ງ, ທົ່ວເຖີງ​ໃນ​ໝູ່ຄະນະ, ພະນັກງານຢູ່ຂັ້ນຮາກຖານ, ຈຳກັດ​ໃຫ້​ໄດ້​ການຕັດໄມ້ທຳລາຍປ່າ, ການສໍ້ລາດບັງຫຼວງ, ​ເດັດຂາດຕ້ານປະກົດການຫຍໍ້ທໍ້, ຍົກສູງສະຕິລະວັງຕົວຕໍ່ສັດຕູ, ປຸກລະດົມ​ປະຊາຊົນໃຫ້ມີນ້ຳໃຈຮັກ​ຊາດ, ​ເປັນ​ເຈົ້າຕົນ​ເອງ, ມີ​ຄວາມສາມັກຄີປອງດອງ, ຮັກບ້ານເກີດເມືອງນອນ ແລະ ເຮັດຫຼ້ອນໜ້າທີ່ຂອງຕົນ ດ້ວຍຄວາມຮັບຜີດຊອບສູງ. ສຸມໃສ່ສ້າງເສດຖະກິດ ຫັນ​ເປັນວິຊາຊີບຜະລິດເປັນສີນຄ້າໃຫ້ນັບມື້ນັບກ້ວາງຂວາງ. ​ໂດຍຖືເອົາການພັດທະນາຄົນເປັນໃຈກາງໃນການພັດທະນາເສດຖະກິດ – ສັງຄົມ.