ທ່ານ ເລຂາພັກ – ເຈົ້າແຂວງໆ ສາລະວັນ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ບ້ານ ລານ ກຸ່ມ II ເມືອງ ວາປີ ແຂວງ ສາລະວັນ

ເພື່ອສືບ​ຕໍ່​ແຜນ​ເຄື່ອນ​ໄຫວ​ຢູ່​ຂັ້ນຮາກ​ຖານ​ຂອງ​ທ່ານ ​ເລຂາ​ພັກ – ​ເຈົ້າ​ແຂວງ ໃນຕອນເຊົ້າ ຂອງວັນທີ 25 ພຶດສະພາ 2018 ທີ່​ຜ່ານ​ມາ, ທ່ານ ສີສຸວັນ ວົງຈອມສີ ກຳມະການ​ສູນ​ກາງ​ພັກ,​​ເລຂາ​ພັກ – ເຈົ້າແຂວງໆ ສາລະວັນ ພ້ອມດ້ວຍຄະນະ ​ໄດ້​ລົງ​ເຄື່ອນ​ໄຫວ​ພົບ​ປະ​ໂອ້​ລົມ ພໍ່​ແມ່ປະຊາຊົນ ບ້ານລານ ກຸ່ມ II  ​ເມືອງ​ວາປີ, ​ໂດຍ​ມີ ອົງການການປົກຄອງບ້ານ ແລະ ພໍ່ແມ່ປະຊາຊົນ ຕ້ອນຮັບຢ່າງ​ອົບ​ອຸ່ນ.

ຫຼັງ​ຈາກ​ຮັບ​ຟັງ​ການ​ລາຍ​ງານ ສະພາບລວມຂອງ​ບ້ານ ຈາກ​ທ່ານ​ເລຂາ​ພັກ – ນາຍບ້ານ ​ແລະ ຂໍ້ສະເໜີຕ່າງໆ​ແລ້ວ ທ່ານ ​ເລຂາ​ພັກ – ​ເຈົ້າ​ແຂວງ ກໍໄດ້ໃຫ້ກຽດໂອ້ລົມ ​ໂດຍ​ເນັ້ນໜັກຊີ້​ນຳ ​ໃຫ້​ອົງການປົກຄອງ​ບ້ານ ຕ້ອງ​ໄດ້​ເພີ່ມ​ທະວີ​ຄວາມ​ເຂັ້ມ​ແຂງ​ໃນ​ການ​ນຳພາ ດ້ວຍ​ການປັບປຸງ ແບບແຜນ –  ວິທີການ​ໃຫ້​ເຂັ້ມ​ແຂງ, ເອົາໃຈໃສ່​ເຮັດ​ວຽກ​ງານ​ການ​ເມືອງ​ແນວ​ຄິດ ປຸກລະດົມພໍ່ແມ່ປະຊາຊົນ ທີ່​ມີມູນເຊື້ອ ດຸໝັ່ນ ໃນການຜະລິດ ​ເພື່ອ​ໃຫ້​ກາຍເປັນສິນຄ້າ ເປັນຕົ້ນ​ໃນ​ດ້ານ ການປູກຝັງ ​ແລະ ການລ້ຽງສັດ ເພື່ອສ້າງລາຍຮັບໃຫ້​ແກ່ຄອບຄົວ ທັງເປັນການພັດທະນາ ຄຸນນະພາບຊີວິດໃຫ້ດີຂື້ນ. ​ເດັດຂາ​ດຕ້ານໜໍ່ແໜງປະກົດການຫໍ້ຍທໍ້ ທີ່ຈະເປັນການກົດໜ່ວງຖ່ວງ​ດຶງການພັດທະນາ ​ໂດຍ​ສະ​ເພາະ​ແມ່ນ ບັນຫາຢາເສບຕິດ. ນອກ​ນັ້ນ, ກໍ​ພ້ອມ​ກັນ​ຖອດ​ຖອນ​ບົດຮຽນແກ້ໄຂຂໍ້ຄົງຄ້າງ​ໃນການນຳພາ, ສ້າງ​ຄວາມ​ເຊື່ອ​ໝັ້ນ​ໃຫ້​ແກ່​ປະຊາຊົນ, ສ້າງ​ເງື່ອນ​ໄຂໃຫ້ປະຊາຊົນໄດ້ເຂົ້າເຖິງການບໍລິການດ້ານສາທາລະນະສຸກ ໃຫ້ທົ່ວ​ເຖິງ ​ແລະ ນັບ​ມື້ກ້ວາງຂວາງ.

​ໃນ​ໂອກາດ​ດັ່ງກ່າວ ທ່ານ ສີສຸວັນ ວົງຈອມສີ  ກຳມະການສູນກາງພັກ,  ເລຂາພັກ – ​ເຈົ້າແຂວງໆ ສາລະວັນ ພ້ອມດ້ວຍຄະນະ ຍັງໄດ້ ຮ່ວມ​ກັບ​ອົງການປົກຄອງບ້ານ ​ແລະ ພໍ່ແມ່ປະຊາຊົນ ເຮັດກິດຈະກຳປູກຕົ້ນໄມ້​ໃນ​ຂອບ​ເຂດ​ບໍລິ​ເວນ​ບ້ານ ​ເພື່ອ​ເປັນ​ການຕ້ອນຮັບ ​ແລະ ສະ​ເຫຼີ​ມສະຫຼອງ​ ວັນ​​ເດັກນ້ອຍ​ສາກົນ ​ແລະ ວັນ​ປູກ​ຕົ້ນ​ໄມ້​ແຫ່ງ​ຊາດ (1 ມີຖຸນາ)ທີ່ຈະມາເຖິງ ພ້ອມ​ທັງ​ຮຽກຮ້ອງ​ໃຫ້ ອົງການ​ປົກຄອງ​ບ້ານ, ພໍ່​ແມ່​ປະຊາຊົນ ​ພ້ອມ​ກັນ​ປົກ​ປັກ​ຮັກສາ​ຕົ້ນ​ໄມ້​ທີ່​ປູກ​ແລ້ວ ໃຫ້​ເຕີບ​ໃຫ່ຍ ​ແລະ ​ຍືນ​ຍົງ.