ທ່ານ ເລຂາພັກແຂວງ, ເຈົ້າແຂວງສາລະວັນ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ບ້ານດອນເຂົ້າເໜັ້ນ ກຸມ IV ເມືອງວາປີ ແຂວງ ສາລະວັນ

ເພື່ອເຮັດໃຫ້ການຜັນຂະຫຍາຍມະຕິ, ກອງປະຊຸມໃຫ່ຍ ຄັ້ງທີ X ຂອງພັກຕິດພັນກັບມະຕິກອງປະຊຸມຄົບຄະນະບໍລິຫານງານສູນກາງສູນກາງພັກ ຄັ້ງທີ 6 ມະຕິ VIII ຂອງອົງຄະນະພັກແຂວງ ແລະ ແຜນພັດທະນາເສດຖະກິດ – ສັງຄົມຂອງແຂວງເຂົ້າສູ່ລວງເລີກ ແລະ ແທດເຖິງຮາກຖານຕົວຈິງຫຼາຍຂື້ນ, ໃນຕອນເຊົາວັນທີ 11 ພຶດສະພາ 2018 ທີ່ຜ່ານມານີ້ ທ່ານ ສີສຸວັນ ວົງຈອມສີ ກໍາມະມະການສູນກາງພັກ, ເລຂາພັກ – ເຈົ້າແຂວງໆ ສາລະວັນ  ພ້ອມດ້ວຍພະນັກງານວິຊາການຂະແໜງການຈໍານວນໜື່ງໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ບ້ານດອນເຂົ້າເໝັ້ນ ກຸມ IV ເມືອງວາປີ , ເຊິ່ງໃຫ້ກຽດຕ້ອນຮັບຈາກອົງການປົກຄອງ 13 ໜູ່ບ້ານທີ່ຂື້ນກັບກຸ່ມ 4 ( ຄອນສາຍ ) ເມືອງ ວາປີ ແລະ ພໍ່ແມ່ປະຊາຊົນຢ່າງຫຼວງຫຼາຍ ແລະ ອົບອຸ່ນ.

ໃນໂອກາດການເຄື່ອນໄຫວຢ້ຽມຢາມຄັ້ງນີ້ ທ່ານ ສີສຸວັນ ວົງຈອມສີ ກໍາມະມະການສູນກາງພັກ, ເລຂາພັກ – ເຈົ້າແຂວງໆ ສາລະວັນ ກໍໄດ້ຮັບຟັງລາຍງານສະພາບລວມ ການຈັດຕັ້ງປະຕິບັດ, ການພັດທະນາເສດຖະກິດ – ສັງຄົມຂອງບ້ານດອນເຂົ້າເໝັ້ນ ທີ່ສະເໜີໂດຍ ຮອງນາຍບ້ານ ເຊິ່ງໄດ້ຍົກໃຫ້ເຫັນ ຈຸດພິເສດ ດ້ານທີ່ຕັ້ງຂອງບ້ານທີ່ໄດ້ອໍານວຍຄວາມສະດວກໃຫ້ແກ່ການພັດທະນາ ຕະຫຼອດຮອດບັນດາຜົນສໍາເລັດຕ່າງໆ ແລະ ຈຸດອ່ອນຂໍ້ຄົງຄ້າງທີ່ຍັງບໍ່ທັນບັນລຸຕາມທິດທາງແຜນການ ການພັດທະນາພາຍໃນບ້ານ ພ້ອມທັງສະເໜີຂໍ້ຫຍຸງຍາກ ຕໍ່ຄະນະພັກ – ອົງການປົກຄອງແຂວງຈໍານວນໜື່ງ.

ຕອນທ້າຍ ທ່ານ ສີສຸວັນ ວົງຈອມສີ ກໍາມະມະການສູນກາງພັກ, ເລຂາພັກ – ເຈົ້າແຂວງໆ ສາລະວັນ ກໍໄດ້ໃຫ້ກຽດໂອ້ລົມ ໂດຍເນັ້ນໜັກໃຫ້ອົງການປົກຄອງບ້ານ ເອົາໃຈໃສ່ວຽກງານການສືກສາອົບຮົມແນວຄິດ, ປົກປັກຮັກສາເສັ້ນທາງໃຫ້ໄດ້ນໍາໃຊ້ຍາວນານ, ເຊື່ອມຊືມບັນດາເອກະສານທາງການໃຫ້ແກ່ປະຊາຊົນຮັບຊາບ ແລະ ທົ່ວເຖິງ, ເອົາໃຈໃສ່ປຸກລະດົມໃຫ້ລູກຫຼານໄດ້ເຂົ້າເຖິງການສືກສາ, ຕິດພັນກັບການຜັນຂະຫຍາຍແນວທາງນະໂຍບາຍຂອງພັກ, ແນວທາງປ້ອງກັນຊາດ – ປ້ອງກັນຄວາມສະຫງົບ, ການພັດທະນາເສດຖະກິດ ແລະ ວັດທະນະທໍາ – ສັງຄົມ ເຂັ້ມງວດສະກັດກັ້ນບັນດາປະກົດການຫຍໍ້ທໍ້ຕ່າງໆ ໃຫ້ຫຼຸດໜ້ອຍຖອຍລົງເທື່ອລະກ້າວ ພ້ອມກັນນັ້ນ ທ່ານກໍໄດ້ຊີ້ນໍາ ມອບໃຫ້ພະແນກໂຍທາທິການ ແລະ ຂົນສົ່ງ ກໍ່ສ້າງສ້ອມແປງເສັ້ນທາງເຂົ້າບ້ານ ແຕ່ບ້ານຄອນສາຍ ຫາ ບ້ານກອງລືນ້ອຍ.